ތައިލޭންޑްގައި ކުރިއަށް ގެންދިޔަ އާންމު އިންތިހާބުގެ ވޯޓު ގުނުމުގައި އޮޅުވާލުންތަކެއް އޮޅުވާލާފައިވާކަމަށް، އިންތިހާބު ވިލަރެސް ކުރުމުގައި ހަރަކާތްތެރިވި ބައިނަލްއަގުވާމީ އޮބްޒާވަރުންގެ ގުރޫޕަކުން ބުނެފިއެވެ.
އާދީއްތަ ދުވަހު ތައިލޭންޑުގައި ކުރިއަށް ގެންދިޔަ އާންމު އިންތިހާބަކީ، 2014 ވަނަ އަހަރު އަސްކަރީ ބަޣާވާތަކުން ތައިލޭންޑްގެ ވެރިކަން ބަދަލުކުރި ފަހުން އެގައުމުގައި ފުރަތަމަ ފަހަރަށް ކުރިއަށް ގެންދިޔަ އިންތިހާބަށްވީއިރު، އެ އިންތިހާބުގެ ވަގުތީ ނަތީޖާތައް ތައްކާ ގޮތުން، ކުރީގައި އޮތީ އަސްކަރިއްޔާއަށް ތާއީދުކުރާ ޕާޓީއެވެ.
ތައިލޭންޑްގެ އާންމު އިންތިހާބުގެ ކަންކަން ވިލަރެސް ކުރުމުގައި ހަރަކާތްތެރިވި އޭޝިއަން ނެޓްވާކް ފޯ ފްރީ އިލެކްޝަންސްއިން ބުނީ، ވޯޓުގެ ނަތީޖާ ތާވަލުތަކަށް އަޅާ، ޖުމުލަ ނަތީޖާ ނެރުމުގައި ބޮޑެތި މައްސަލަތަކެއް ހުރި ކަމަށެވެ. އަދި އެކަމުގެ ސަބަބުން ނަތީޖާގެ ސައްހަކަން ވަރަށް ބޮޑަށް ގެއްލިފައިވާކަމަށްވެސް އެ ގުރޫޕުންވަނީ ބުނެފައެވެ.
ކަންމިހެން އޮތްއިރު، ތައިލޭންޑްގެ އިންތިހާބާ ބެހޭ ކޮމިޝަނުން ވަނީ ނަތީޖާ ދިފާއުކޮށްފައެވެ. އަދި ވަގުތީ ނަތީޖާގެ ރަސްމީ ލިޔެކިއުންތައް ހުކުރު ދުވަހު އާންމު ކުރާނެ ކަމަށްވެސް ބުނެފައެވެ.
