މި މަހުގެ 14 ވަނަ ދުވަހު މޮޒަމްބީކަށް އެރި ވަރުގަދަ ތޫފާން، "އިޑާއީ" އަކީ، މޫސުމީ ގޮތުން އަންނަ ނޭދެވޭ ބަދަލުތަކުގެ އިންޒާރުގެ ރަނގަބީލެއް ކަމަށް އދގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒް ވިދާޅުވެއްޖެއެވެ.
އާދަޔާ ހިލާފު ގަދަ ބާރުކަމަކާއެކު ގިނަ ދުވަސްތަކަކަށް ދެމިގެންދިޔަ ތޫފާން އީޑާއީގައި މޮޒަމްބީކު، ޒިމްބާބްވޭ އަދި މަލާވީއިން މަރުވި މީހުންގެ އަދަދު 680 އަށްވުރެ މައްޗަށް އަރާފައިވާއިރު، މޮޒަމްބީކުން އެކަނިވެސް 1.85 މިލިއަން މީހުން ވަނީ އިންސާނީ އެހީތެރިކަމަށް ބޭނުންޖެހިފައެވެ.
އދގެ މަރުކަޒީ އިދާރާގައި ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން ގުޓެރޭޒް ވިދާޅުވީ، މިލިއަނެއްހާ ކުޑަކުދިންނަށް އެހީ ބޭނުންވެފައިވާކަމަށާ، މިއަދަދު އަދިވެސް އިތުރަށް މައްޗަށް ދިއުން އެކަށީގެންވާކަމަށެވެ.
ގުޓެރޭޒް އިތުރަށް ވިދާޅުވީ މިހާތަނަށް ލިބިފައިވާ ރިޕޯޓްތަކަށް ބަލާއިރު، މިހާތަނަށް ލިބިފައިވާ އުމްރާނީ ގެއްލުމުގެ އަގު 1 ބިލިއަން ޑޮލަރަށް އަރާކަމަށެވެ.
ތޫފާނުގައި ބޮޑުވި ފެންގަނޑު ހިނދެން ފަށާފައިވާއިރު ބޮޑު ބަލިމަޑުކަމެއްވެސް އެސަރަހައްދުގައި ވަނީ ފެތުރިފައެވެ.
