އެމެރިކާގެ ސައުތުވެސްޓް އެއާލައިންސްގެ ފްލީޓްގައި ބޭނުންކުރަމުން އައި ބޮއިންގް 737 މެކްސް މަރުކާގެ މަތިންދާބޯޓެއް ރަންވޭއިން އުދުއްސާލިތާ މާ ގިނަ އިރުތަކެއް ނުވަނީސް، މައްސަލަތަކެއް ޖެހި، އަނބުރާ އެއާޕޯޓަށް ޖައްސައިފިއެވެ.
ފެޑެރަލް އޭވިއޭޝަން އެޑްމިނިސްޓްރޭޝަން އިން މައުލޫމާތުދޭ ގޮތުގައި މި ބޯޓު އަނބުރާ ޖައްސާފައިވަނީ އިންޖީނަށް ދިމާވި މައްސަލަތަކަކާ ގުޅިގެންނެވެ.
މާޗްމަހުގެ 10 ވަނަ ދުވަހު އިތިއޮޕިއަން އެއާލައިންސްއިން އޮޕަރޭޓްކުރަމުންދިޔަ ބޮއިންގް 737 މެކްސް 8 މަރުކާގެ ބޯޓެއް ވެއްޓި، ހުރިހާ ފަސެންޖަރުންނާ ކުރޫއިން މަރުވި ހާދިސާއާއި، މިދިޔަ އަހަރުގެ އޮކްޓޯބަރު މަހު ލަޔަން އެއާއިން އޮޕަރޭޓްކުރި ހަމަ މިމަރުކާގެ މަތިންދާ ބޯޓެއް ޖާވާ ކަނޑަށް ވެއްޓި، ހުރިހާ ފަސެންޖަރުންނާއި ކުރޫއިން މަރުވި ހާދިސާއާއި ގުޅިގެން ބޮއިންގް ކުންފުނިން ވަނީ މެކްސް މޮޑެލްގެ ހުރިހާ ބޯޓުތަކެއް ގުރައުންޑް ކުރުމަށް އަންގާފައެވެ.
ސައުތުވެސްޓް އެއާލައިންސްއިން ކުށްލި ހާލަތުގައި އަނބުރާ ރަންވޭއަށް ޖެއްސި މެކްސް މޮޑެލްގެ މަތިންދާބޯޓުގެ އެ ދަތުރަކީ އެ މޮޑެލްގެ ބޯޓުތައް ވައިގެ އުދުހުންތަކުގައި ބޭނުން ކުރުން އެމެރިކާގައި މަނާކޮށްފައި އޮތުމުގެ ސަބަބުން، އެ ބޯޓުވެސް ކެލިފޯނިއާގެ ޒޯނެއްގައި ޕާކު ކުރުމަށް ކުރަން އުޅުނު ދަތުރެކެވެ. އެ ދަތުރުގައި އެއްވެސް ފަސެންޖަރަކު އުފުލާފައެއް ނުވެއެވެ.
ބޮޑެތި އެއާޕޯޓުތަކުގައި ގުރައުންޑްކޮށްފައިވާ މެކްސް މޮޑެލްގެ ބޯޓުތައް، ޕާކިންގް ސަރަހައްދުތަކަށް ބަދަލު ކުރުމުގެ ގޮތުން އުދުއްސުމުގެ ހުއްދަ އޮވެއެވެ.
ދުނިޔޭގެ ހުރިހާ ހިސާބެއްގައި އޮޕަރޭޓްކުރާ ބޮއިންގް މެކްސް މޮޑެލްގެ ހުރިހާ ފްލައިޓެއް ގްރައުންޑްކޮށްފައިވާއިރު، ކަމާ ބެހޭ ފަރާތްތަކުން ދަނީ މިމޮޑެލްގެ މަތިންދާބޯޓުތަކަށް ދިމާވަމުންދާ މައްސަލަ ތަހުގީގު ކުރަމުންނެވެ.
