2014 ވަނަ އަހަރު ތައިލޭންޑަށް ގެނައި އަސްކަރީ ބަޣާވާތަށް ފަހު އެގައުމުގައި ފުރަތަމަ ފަހަރަށް ބާއްވާ އާންމު އިންތިހާބުގެ ވޯޓުލުން ފަށައިފިއެވެ.
މަގާމުން ދުރުކުރެވިފައިވާ ތައިލޭންޑުގެ ކުރީގެ ބޮޑުވަޒީރު ތަކްސީޏް ޝިނަވަޓްރާއާއި އަސްކަރިއްޔާއާއި ދެމެދު ބަދަލުކުރަމުންދާ ސިޔާސީ "ހަމާލާ"ތަކާއިއެކު އަހަރުތަކެއް ވަންދެން ނުތަނަވަސްކަމެއްގެ ތެރޭގައި އޮތް ތައިލޭންޑްގެ އާންމު އިންތިހާބުގައި 50 މިލިއަނެއްހާ މީހުން ވޯޓުލާނެ ކަމަށް ބެލެވެއެވެ.
ބަޣާވާތަކުން ތައިލޭންޑުގެ ވެރިކަމާ ހަވާލުވުމަށްފަހު އަސްކަރިއްޔާއިން ވަނީ އެގައުމުގައި ޑިމޮކްރަސީގެ އުސޫލުތައް ތަންފީޒުކުރާނެ ކަމަށް ބުނެފައެވެ. ނަމަވެސް އާންމު އިންތިހާބުގެ ވޯޓުލުން ވަނީ އެތައް ފަހަރެއްގެ މަތީން ފަސްކޮށްފައެވެ.
ފާޑުކިއާ ފަރާތްތަކުން ބުނާ ގޮތުގައި، އިންތިހާބުގެ ނަތީޖާ ކޮންމެ ގޮތަކަށް ނިކުތް ކަމުގައި ވީ ނަމަވެސް، ތައިލޭންޑްގެ ކޮންޓްރޯލް އެގައުމުގެ އަސްކަރިއްޔާއަށް ލިބިދޭ ގޮތަށް ތައިލޭންޑުގެ ގާނޫނު އަސާސީއަށް ވަނީ ބަދަލުތަކެއްވެސް ގެނެސްފައެވެ.
މިއީ 2011 ވަނަ އަހަރަށްފަހު ތައިލޭންޑުގައި ފުރަތަމަ ފަހަރަށް ކުރިއަށް ގެންދާ އާންމު އިންތިހާބު ކަމުން، އާދީއްތަ ދުވަހުގެ ވޯޓުގައި ގިނަ ބަޔަކު ބައިވެރިވާނެ ކަމަށް ބެލެވެއެވެ. އުމުރުން 18 އަހަރާއި 26 އަހަރާއި ދެމެދު ޒުވާނުންނަށް މިއީ ވޯޓުލެވޭ ފުރަތަމަ ފަހަރު ކަމަށްވާއިރު، މި އުމުރުފުރާގެ 7 މިލިއަން މީހުން ތައިލޭންޑްގައި އެބަތިއްބެވެ.
93000 މަރުކަޒެއްގައި ވޯޓުލުން ކުރިއަށްދާއިރު ހަވީރު 5 ޖެހުމާ ހަމައަށް މަރުޖަޒުތައް ހުޅުވާފައި ހުންނާނެއެވެ. ވޯޓުލުން ނިންމާލާތާ ގަޑިއިރުކޮޅެއްގެ ތެރޭގައި ވަގުތީ ނަތީޖާ އިއުލާންކުރެވުނު ނަމަވެސް، ތައިލޭންޑްގެ ސަރުކާރުގެ މުސްތަގުބަލު އޮންނާނެ ގޮތެއް ކަށަވަރުވާން ވަގުތުކޮޅެއް ނަގާނެ ކަމަށާ، އެއީ ސިޔާސީ ޕާޓީތަކާއި ކެނޑިޑޭޓުންގެ މެދުގައި ކޯލިޝަންގެ މަޝްވަރާތައް ހިނގަމުންދާ ވަގުތު ކަމަށް ބައިނަލްއަގުވާމީ ޚަބަރުތައް ބުނެއެވެ.
