ރ. އުނގޫފާރުން ވަގަށް ނެގި ތިޖޫރީ ފައިސާތަކާއެކު ފެނިއްޖެ ކަމަށް ފުލުހުން ބުނެފިއެވެ.
550،000 ރުފިޔާއާއި ޑޮލަރުގެ އިތުރުން ބިދޭސީންގެ ޕާސްޕޯޓާއި ލިޔެކިޔުންތައް ވެސް ހުރި އެ ތިޖޫރީ ފެނިފައިވަނީ އެ މައްސަލަ ތަހުގީގު ކުރުމުގެ ތެރެއިން ލިބުނު މައުލޫމާތުން އެ ރަށުގެ ފަޅު ގޯއްޗެއް ބަލާ ފާސްކުރުމުގެ ތެރެއިން ކަމަށް ފުލުހުން ބުނެއެވެ. އެގޮތުން އެ ތިޖޫރީ އޮތީ ފަޅު ގޯއްޗެއްގެ ތެރެއަށް އެއްލާލާފައި ކަމަށާއި އެ ތިޖޫރީ ހުޅުވަން މަސައްކަތް ކޮށްފައި ހުރިނަމަވެސް ހުޅުވިފައި ނުވާ ކަމަށް ވެސް ފުލުހުން ބުނެއެވެ.
ރ. އުނގޫފާރު ވެސްޓް ބީޗް ރެސްޓޯރެންޓް ހިންގާ ހަސަން މޫސާ ބުނީ އޭނާގެ ތިޖޫރީ ވަގަށް ނަގާފައިވަނީ އޭނާގެ އަންހެނުން ބަލިވެގެން ހޮސްޕިޓަލުގައި ހުއްޓާ ކަމަށާއި މި ކަން ކޮށްފައި ވަނީ ހުކުރު ގަޑީގައި ކަމަށެވެ. އިއްޔެ މެންދުރު ފުލުހުންނަށް މައުލޫމާތު ދިނުމާއި އެކު ފުލުހުން ކުރި ތަގުގީގާއި ގުޅިގެން ކޯޓު އަމުރެއްގެ ދަށުން 27 އަހަރުގެ ފިރިހެނަކު ވަނީ ހައްޔަރުކޮށްފައެވެ.
ވައްކަން ކުރުމާއި ފޭރުން މިފަހަކަށް އައިސް ގިނަވަމުން އަންނަ ކަން ވަނީ ފާހަގަކުރެވިފައެވެ. މިދިޔަ މަހުގެ ފަހުކޮޅު ގއ.ކޮލަމާފުށިން ވެސް ތިޖޫރީއެއް ވަނީ ވަގަށް ނަގާފައެވެ. މި ތިޖޫރީ ނެގިކަމަށް ތުހުމަތު ކުރެވޭ 28 އަހަރުގެ ފިރިހެނަކާއި 32 އަހަރުގެ ފިރިހެނެއް ވަނީ ހައްޔަރު ވެސް ކޮށްފައެވެ. ގއ. ކޮލަމާފުށީން ވަގަށް ނެގި ތިޖޫރީވެސް ފުލުހުން ވަނީ އެ ރަށު ވަލުތެރެއިން ހޯދާފައެވެ.
