އިންޓަނެޓް އަގު ހެޔޮ ކުރުމުގެ މަޝްވަރާތައް ކޮމިއުނިކޭޝަން، ސައިންސް އެންޑް ޓެކްނޮލަޖީ މިނިސްޓްރީން ރަސްމީ ސިފައެއްގައި މިއަދު ފައްޓައިފިއެވެ.
އެގޮތުން އިންޓަނެޓް އަގު ހެޔޮ ކުރުމުގެ ރަސްމީ މަޝްވަރާތައް ދިރާގާއެކު މިއަދު ފައްޓާފައި ވާކަމަށް ކޮމިއުނިކޭޝަން މިނިސްޓަރީން މައުލޫމާތުދެއެވެ. އަދި މި އަންނަ ހަފްތާގައި އުރީދޫ އާ އެކުވެސް މަޝްވަރާ ކުރަން ފަށަން ނިންމާފައި ވާކަމަށް ވެސް އެ މިނިސްޓްރީ ގެ ސްޓޭޓް މިނިސްޓަރު އަލީ ސޯލިހް މިއަދު ވިދާޅުވިއެވެ.
އިންޓަނެޓް އަގު ހެޔޮ ކުރުމަށްޓަކާ، 25 ގައުމެއްގައި އިންޓަނެޓް ގެ އަގު ހުންނަ މިންވަރުގެ ދިރާސާއެއްވެސް ކޮމިއުނިކޭޝަން މިނިސްޓްރީން ކޮށްފައި ވެއެވެ. އަދި ދިރާގާއި އުރީދޫ އާ އެކު ނުރަސްމީ މަޝްވަރާ ތަކެއް ވެސް ކުރިން ވަނީ ކޮށްފައެވެ.
ސަރަހައްދުގެ އެހެން ގައުމުތަކާ އަޅާ ބަލާ އިރު، ރާއްޖޭގެ އިންޓަނެޓް ގެ އަގު ވަރަށް ބޮޑުތަން މައްޗެވެ. މިކަމާ ގުޅުން ހުރި ކަން ބޮޑުވުންތައް ގިނަ ފަރާތް ތަކަކުން އެކި ފަހަރު މަތިން ފާޅު ކޮށްފައި ވެއެވެ.
އިންޓްނެޓް ގެ އަގު އަތް ފޯރާ ފަށަށް ތިރި ކޮށްދިނުމަކީ ރައީސް އިބްރާހީމް މުހައްމަދު ސޯލިހް ގެ ރިޔާސީ ވައުދުފުޅު ތަކުގެ ތެރޭގައި ހިމެނޭ ކަމެކެވެ.
