އދގެ މެންބަރު ހުރިހާ ގައުމެއް ބައިވެރިވާ އާންމު މަޖިލީހުގެ ބާރު ކަނޑުވާލުމަށް ސަލާމަތީ މަޖިލީހުން މަސައްކަތްތަކެއް ކުރަމުންދާކަމަށާއި، ހަގީގީ މައްސަލަތަކަށް ރިއާޔަތްކުރުމަށް ވުރެ ބޮޑަށް، 193 މެންބަރު ގައުމު ހިމެނޭ އދއިން ސަމާލުކަން ދެނީ އެ އިއްތިހާދުގެ އިޖުރާއަތުތަކަށް ބުނެ އިންޑިއާއިން އދއަށް ފާޑުކިޔައިފިއެވެ.
އިންޑިއާއިން އދށް ކަނޑައަޅާފައި ހުންނަވާ ޑެޕިއުޓީ ޕާމަނަންޓް ރެޕްރެޒެންޓޭޓިވް ކޭ ނާގަރާޖް ނައިދޫ ވިދާޅުވީ، ދުނިޔޭގެ ޕާލިމެންޓާއި އެންމެ އެއްގޮތް ސިފަތަކެއް ލިބިފައިވާ ބަޔަކީ އދގެ ސަލާމަތީ މަޖިލީސް ކަމުގައި ވީ ނަމަވެސް، ސަލާމަތީ މަޖިލީހުން، އާންމު މަޖިލީހުގެ ހައިބަތާއި ބާރު ކުޑަކޮށްފައިވާ ކަމަށެވެ. ސަލާމަތީ މަޖިލީހުން މިކަން ކުރަނީ ބައިނަލްއަގުވާމީ ސުލްހައާއި ސަލާމަތަށް ނުރައްކާވާ ކަންކަން ކަނޑައެޅުމަށް ގެންގުޅޭ އުސޫލުތަކާއި މިންގަނޑުތަކަށް ބަދަލު ގެނައުމަށް ސަލާމަތީ މަޖިލީހުން ތަކުރާރުކޮށް ކުރަމުންދާ މަސައްކަތްތަކުގެ ތެރެއިން ކަމަށްވެސް އިންޑިއާގެ ޑިޕްލޮމެޓް ވަނީ ތުހުމަތު ކުރައްވާފައެވެ.
ސަލާމަތީ މަޖިލީހުގައި މަޝްވަރާ ހިނގަމުންދާ ބައެއް ކަންކަމަކީ، ކަނޑައެޅިގެން އާންމު މަޖިލީހުގައި އެކަމަކާއި ބެހޭ ގޮތުން ބަހުސް ކުރެވެންޖެހޭނެ ކަންކަމަށް ނައިދޫ ވަނީ ފާހަގަކުރައްވާފައެވެ. މިކަން މިހެން ހިނގަމުންދިއުމުގެ ޒިންމާ އުފުއްލަންޖެހޭ ފަރާތްތަކުގެ ތެރޭގައި އދގެ އާންމު މަޖިލީސްވެސް ހިމެނޭ ކަމަށް އިންޑިއާގެ މަންދޫބު ވަނީ ވިދާޅުވެފައެވެ. މިމޭރުމުން ވާހަކަފުޅުދައްކަވަމުން ނައިދޫ ވިދާޅުވީ، ބައިނަލްއަގުވާމީ އެޖެންޑާ ކަނޑައެޅުމުގައި އެންމެ އިސް ދައުރެއް އަދާކުރަންޖެހޭނީ އާންމު މަޖިލީހުން ކަމަށެވެ. އަދި މިކަން ކުރުމަށް މެންބަރު ގައުމުތަކުގެ އަޒުމާއި ހިތްވަރު ބޭނުންވާނެ ކަންވެސް އިންޑިއާގެ ޑިޕްލޮމެޓް ވަނީ ފާހަގަކުރައްވާފައެވެ.
ސޫރިޔާގެ ދާހިލީ ހަނގުރާމަ ފަދަ ބޮޑެތި މައްސަލަތަކެއް ދުނިޔޭގެ އެކި ހިސާބުތަކުގައި ހިނގަމުންދަނިކޮށް، މޫސުމީ ނޭދެވޭ ބަދަލުތަކަކީ ދުނިޔޭގެ ސުލްހައާއި ހަމަޖެހުމަށް އޮތް ނުރައްކަލެއް ކަމުގައި ބަލައިގެން އެކަމާ ބެހޭ ގޮތުން ސަލާމަތީ މަޖިލީހުގައި މަޝްވަރާކުރަމުންދާކަން އިންޑިއާގެ މީޑިއާއިންވެސް ވަނީ ފާޑުވެރި ނަޒަރަކުން ފާހަގަކޮށްފައެވެ.
