މުޅި ނިއުޒީލަންޑް އޮތީ މުސްލިމް އާބާދީގެ ހައްގުގައިކަން ހާމަކޮށްދިނުމުގެ ގޮތުން، ނަމާދު ވަގުތުގެ ބަންގި، ގައުމީ ޓީވީ މެދުވެރިކޮށް ހުކުރު ދުވަހު ބްރޯޑްކާސްޓް ކުރާނެކަމަށް ނިއުޒީލަންޑްގެ ބޮޑުވަޒީރު ޖެސީންޑާ އެޑާން ވިދާޅުވެއްޖެއެވެ.
މާޗް 15 ވަނަ ދުވަހު ނިއުޒީލަންޑްގެ ކްރިސްޓްޗާޗުގެ 2 މިސްކިތަކަށް އަމާޒުކޮށް، ހުކުރު ވަގުތު ދިން ބަޑީގެ ހަމަލާތަކުގައި 50 މީހެއްގެ ފުރާނަ ގެއްލި ގިނަ އަދަދެއްގެ ބަޔަކު ޒަހަމުވެ އެތައް ބަޔަކަށް ނަފުސާނީ އަނިޔާ ދިން ޓެރަރިސްޓް ހަމަލާއަށްފަހު، ނިއުޒީލަންޑްއިން ދަނީ އެގައުމުގައި ދިރިއުޅެމުންދާ މުސްލިމުންނަށް ސަލާމަތާއި ރައްކާތެރިކަން ކަށަވަރުކޮށްދިނުމަށް ގިނަ މަސައްކަތްތަކެއް ކޮށް، ފިޔަވަޅުތަކެއް އަޅަމުންނެވެ.
ހުކުރު ދުވަހުގެ ހާދިސާގައި މަރުވި މީހުންގެ ތެރެއިން އާއިލާއާއި ހަވާލުކޮށްފައިވަނީ 6 މީހެއްގެ ހަށިގަނޑެވެ. ކަމާ ބެހޭ ފަރާތްތަކުން ބުނީ މަރުވި މީހުންގެ އޮޓޮޕްސީ ހަދާ، ނިންމަންޖެހޭ ރަސްމީ ލިޔެކިއުންތައް ނިންމުމުގެ މަސައްކަތްތައް ވީހާވެސް ހަލުވިދުވެއްޔެއްގައި ކުރިއަށްދާކަމަށެވެ.
ކްރިސްޓްޗާޗުގެ 2 މިސްކިތެއްގައި ނަމާދަށް ތިބި މީހުންނަށް އަމާޒުކޮށް އޮސްޓްރޭލިއާގެ ޓެރަރިސްޓެއް ކަމަށްވާ ބްރެންޓޮން ޓެރަންޓް ދިން ބަޑީގެ ހަމަލާތަކަށްފަހު ނިއުޒީލަންޑްގެ ގާނޫނު ހަދާ މަޖިލީހުން ފުރަތަމަ ފަހަރަށް ބޭއްވި ޖަލްސާ ފަށާފައިވަނީ ކީރިތި ޤުރުއާނުގެ ބަރަކާތުންނެވެ.
