އިންސާނެއްގެ އެމްބްރިޔޯ ނުވަތަ އަންހެނެއްގެ ރަހިމުގައި ޣަރުބަގަންނަތާ މާ ގިނަ ދުވަސް ނުވާ ދިރޭ ފުރާނައެއް ފޮށްޓަކަށް ލައިގެން އިންޑިއާއަށް އެތެރެކުރަން އުޅުނު މީހަކު ހައްޔަރުކޮށްފިއެވެ.
ގަވާއިދާ ހިލާފަށް އިންސާނެއްގެ އެމްބްރިޔޯ އެތެރެކުރަން އުޅުނުކަމުގެ ކުށުގައި މުމްބާއީގެ އެއާޕޯޓުން ހިފަހައްޓާފައި ވަނީ މެލޭޝިއާގެ ރައްޔިތެއް ކަމަށް މައުލޫމާތު ލިބެއެވެ.
މިއީ މިކަން ކުރާ ބޮޑު ނެޓްވާކެއްގެ ބައެއް ކަމަށް އިންޑިއާގެ ކަމާ ބެހޭ ފަރާތްތަކުން ތުހުމަތު ކުރެއެވެ.
މިމައްސަލައިގައި އެއާޕޯޓުން ހިފެހެއްޓި މީހާ ވަނީ، މިއީ އޭނާ އެފަދަ ކަމެއް ކުރި ފުރަތަމަ ފަހަރު ނޫންކަމަށް އިއުތިރާފުވެފައެވެ.
މިއާއެކު އިންޑިއާގެ އޮފިޝަލުންވަނީ، އެ ގައުމުގައި ފުޅާދާއިރާއެއްގައި އައި.ވީ.އެފްގެ ހިދުމަތްދޭ ކުލިނަކަކާއި ދިމާލަށް ތަހުގީގު އަމާޒުކޮށްފައެވެ. ނަމަވެސް މުމްބާއީގައި ހުންނަ މި ކުލިނިކުން ދަނީ މިފަދަ ކަމެއް ނުކުރާ ކަމަށް ބުނެ، ތުހުމަތުތަކަށް އިންކާރު ކުރަމުންނެވެ. މި ކުލިނިކު ހިންގަމުންދަނީ ޑޮކްޓާ ގޯރާލް ގާންދީ ނަމަކަށް ކިއާ މީހެއް ކަމަށް މައުލޫމާތު ލިބެއެވެ.
ކަންމިހެން އޮތް ނަމަވެސް އެއާޕޯޓުން ހިފެހެއްޓި މީހާގެ ދައުވާތަކަށް ބާރުލިބޭ ޓެކްސްޓް މެސެޖުތަކެއް އެމީހާގެ ފޯނުން ފެނިފައިވާކަމަށްވެސް އިންޑިއާގެ މީޑިއާއިންވަނީ ރިޕޯޓްކޮށްފައެވެ.
ކުލިނިކު ހިންގާ ޑޮކްޓަރުގެ ވަކީލު ބުނަމުންދަނީ، މި ކަމަކީ ވާދަވެރި ކުލިނިކަކުން ރާވައިގެން އެކުލިކު ބަދުނާމަ ކުރުމަށް ހިންގި އަމަލެއް ކަމަށެވެ.
ލެބްތަކުގައި ދަރިމައިކުރުމަށްފަހު އަންހެނެއްގެ ބަނޑުގައި ދަރިފުޅު އަށަގަންނަވާ އައި.ވީ.އެފްގެ ފަރުވާއަކީ އިންޑިއާގައި މަގުބޫލުވަމުން އަންނަ ސިއްހީ ފަރުވާއަކަށް މިހާރު އޮތީ ވެފައެވެ. އިންސާނެއްގެ އެމްބްރިޔޯއަކީ އެކަށީގެންވާ ސިއްހީ ފަރުވާތެރިކަމާއިއެކު އެތައް އަހަރަކަށް ރައްކާކުރެވޭ އެއްޗެކެވެ.
އައިވީއެފް ފަރުވާއަކީ މި ރާއްޖޭގައި ވެސް ގިނަ ބަޔަކު އެ ހިދުމަތެއް ހޯދަމުންދާ ފަރުވާއަކަށްވާއިރު، ގައުމުން ބޭރަށް ދަތުރުކޮށް އެ ފަދަ ފަރުވާތައް ހޯދާ ކުލިނިކުތަކުގެ ހިދުމަތުގެ ސައްހަކަން ކަށަވަރުކުރުން މުހިންމެވެ.
