ޓެރަރިޒަމާ ދެކޮޅަށް ޕާކިސްތާނުން މަސައްކަތްތަކެއް ކުރަމުން ދާކަން ފާހަގަކޮށް، ޗައިނާއިން ޕާކިސްތާނަށް ތައުރީފުކޮށްފިއެވެ.
ޗައިނާއިން ޕާކިސްތާނަށް ތައުރީފުކޮށްފައި މިވަނީ، ހަނގުރާމަވެރިންނަށް ޕާކިސްތާނުގެ ފަސްގަނޑުން ޖާގަ ދޭ ކަމަށް ބުނެ، ބައިނަލްއަގުވާމީ ފެންވަރުގައި ޕާކިސްތާނަށް ބޮޑެތި ފާޑުކިއުންތަކެއް އަމާޒުވަމުންދާ ދަނޑިވަޅެއްގައެވެ.
ޕާކިސްތާނުގެ ހާރިޖީ ވަޒީރާ ބައްދަލު ކުރެއްވުމަށްފަހު ނޫސްވެރިންނާއި މުހާތަބުކުރައްވާ ވާހަކަފުޅު ދައްކަވަމުން ޗައިނާގެ ހާރިޖީ ވަޒީރު ވޭންޖް ޔީ ވިދާޅުވީ، ޓެރަރިޒަމްއާއި ދެކޮޅަށް ޕާކިސްތާނުން ހިންގާ ކެމްޕޭނަށް ޗައިނާގެ ފުރިހަމަ ތާއީދު އެބައޮތް ކަމަށެވެ.
މާޗް މަހުގެ 5 ވަނަ ދުވަހުން ފެށިގެން ޕާކިސްތާނުގެ ކަމާ ބެހޭ ފަރާތްތަކުންވަނީ ހަތިޔާރުއެޅި ހަނގުރާމަވެރިން ކަމަށް ތުހުމަތު ކުރެވޭ އެތައް ސަތޭކަ ބަޔަކު ހައްޔަރުކޮށްފައެވެ. މީގެ އިތުރުން ހަނގުރާމަވެރިންނާ ގުޅުން އޮންނަ ކަމަށް ބެލެވޭ 700 އަށްވުރެ ގިނަ މަދަރުސާއާއި، މިސްކިތްތަކާއި ކުލިނިކުތައްވެސް މިހާރު ވަނީ ބަންދުކުރުވާފައެވެ.
ޕާކިސްތާނުގެ ހާރިޖީ ވަޒީރު ޝާހު މަޙްމޫދު ޤުރައީޝި އަރިހުގައި ބަހައްޓަވައިގެން ޗައިނާގެ ހާރިޖީ ވަޒީރު ވިދާޅުވީ، ޓެރަރިޒަމްއާ ދެކޮޅަށް ޕާކިސްތާނުން ކުރަމުންދާ ހަނގުރާމައާއި އެކަމަށް ޕާކިސްތާނުން ދޭ އެއްބާރުލުމާއި މެދު ބައިނަލްއަގުވާމީ މުޖުތަމައުއިން އިންސާފުވެރި ނަޒަރަކުން ބަލަންވެއްޖެ ކަމަށެވެ.
ޕާކިސްތާނަކީ ހަނގުރާމަވެރިންނަށް ހިމާޔަތާއި ރައްކާތެރިކަން ދޭ ގައުމެއް ކަމަށް އެންމެ ފާޅުގައި ބުނެ ވަކާލާތު ކުރަމުންދަނީ ޕާކިސްތާނުގެ ޒަމާންވީ ހަތުރު ކަމުގައިވާ އިންޑިއާއިންނެވެ. ވަކިން ހާއްސަކޮށް، މިދިޔަ ފެބުރުވަރީ މަހުގެ 14 ވަނަ ދުވަހު، ކަޝްމީރުގެ އިންޑީއާއާއި ވީ ފަޅީގައި އޮންނަ ޕުލްވާމާއަށް އަމާޒުކޮށް ހަނގުރާމަވެރިއަކު އަމިއްލައަށް މަރުވެގެން ދިން ބޮމުގެ ހަމަލާގައި، އިންޑިއާގެ ޕެރަމިލިޓްރީ ފުލުހުންތަކެއް މަރުވި މައްސަލާގައި އިންޑިއާގެ މި ދައުވާގެ އަޑުވަނީ ވަކިން ގަދަވެފައެވެ. މި ހަމަލާ ދީފައިވަނީ ޕާކިސްތާނުގެ ހަނގުރާމަވެރި ޖަމާއަތެއް ކަމަށްބުނާ ޖާއިޝީ މުޙައްމަދަށް ނިސްބަތްވާ ހަނގުރާމަވެރިއެއް ކަމަށް އިންޑިއާއިން ބުނާއިރު، މިކަމުގައި ޕާކިސްތާނުގެ އަތެއް ނުވާކަމަށް ޕާކިސްތާނުގެ ސަރުކާރުން ދަނީ ތަކުރާރުކޮށް ބުނަމުންނެވެ.
ޓެރަރިޒަމްއާއި ހައްދުފަހަނައަޅާފައިވާ ހަނގުރާމަވެރިންނާއި ދެކޮޅަށް ޕާކިސްތާނުގައި މިހާރު ހިންގަމުންދާ ކެމްޕޭނަކީ ޕުލްވާމާ ހަމަލާއާއި ގުޅިގެން ހިންގާ ކެމްޕޭނެއް ނޫންކަމަށާ، އެއީ މާ ކުރީއްސުރެ ރޭވިގެން ހިންގާ ހަރަކާތްތަކެއް ކަމަށް ޕާކިސްތާނުން ދަނީ ބުނަމުންނެވެ.
