މިއަހަރުގެ ރައްޔިތުންގެ މަޖިލީހުގައި ވާދަ ކުރާ ކެންޑިޑޭޓުންނަށް ނަން އަނބުރާ ގެންދިޔުމުގެ ފުރުސަތު މިއަދުން ފެށިގެން ފުރުސަތު ނުދޭން ނިންމައިފިއެވެ.
އީސީން ބުނީ ނަން އަނބުރާ ގެންދިޔުމުގެ ފުރުސަތު ނުދޭން އެ ކޮމިޝަނުން ނިންމީ، މަޖިލީސް އިންތިހާބުގެ ވޯޓު ކަރުދާސް ޗާޕު ކުރުމަށް، މިއަދު ހަވާލު ކޮށްފައި ވާތީ ކަމަށެވެ.
ވޯޓު ކަރުދާސް ޕްރިންޓް ކުރުމަށް ހަވާލު ކޮށްފައިވާ ތަނުގެ މައުލޫމާތު އީސީން އަދި ހާމަ ކޮށްފައެއް ނުވެއެވެ. އެހެން ނަމަވެސް ގާނޫނާ އެއްގޮތް ވާ ގޮތުގެ މަތީން، އިންތިހާބު ގެ ފަސް ދުވަސް ކުރީން އެތަނުގެ މައުލޫމާތު ހާމަ ކުރާނެ ކަމަށް އީސީން ބުންޏެވެ.
ނަން އަނބުރާ ގެންދިޔުމުގެ ފުރުސަތު މިއަދަށް ހަމަވެފައި ވާއިރު މިހާތަނަށް 3 ކެންޑިޑޭޓެއްގެ ނަން ގެންގޮސްފައި ވެއެވެ. އެއީ، މަހިބަދޫ ދާއިރާ އަށް ވާދަ ކުރި އެމްޑީޕީގެ ކެންޑިޑޭޓު އަލީ އަހުމަދާއި، ހިތަދޫ މެދު ދާއިރާއަށް އަމިއްލަ ގޮތުން ވާދަކުރި ޒާހިދު ރަމީޒާއި، ލޭބާ ޕާޓީގެ ފަރާތުން، ގެމަނަފުށީ ދާއިރާ އަށް ވާދަ ކުރި މުހައްމަދު އިލްހާމެވެ.
