މަޖިލީހަށް ވަންނަ އިރު ހަމައެކަނި، ބޯލްޕޮއިންޓް ގަލަމެއްގެ ދޯރި ޖީބަށް ލައިގެން ވަންނަ މެންބަރުގެ އަތުގައި، ނިމިގެން ނުކުންނަ އިރު 'ނެތް އެއްޗެއް ނެތް' ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރ އަތޮޅު ހުޅުދުއްފާރުގައި މިއަދު އޮތް ކެމްޕޭން ޖަލްސާ އެއްގައި ވަހަކަފުޅު ދައްކަވަމުން ނަޝީދު ވިދާޅުވީ، މަޖިލީހަށް ހޮވޭ އިރު ދެ ޖީބު ހުސްކޮށް ހުންނަ މެންބަރުގެ އަތުގައި، މަޖިލީހުގެ ދައުރު ހަމަވާ އިރު، ހުޅުމާލެ އާއި މާލޭގައި ފްލެޓެއް ހުންނަ ކަމަށެވެ. އަދި ރަށުގައި ބޮޑު ގެއަކާއި، ސަފާރީއަކާއި، ބޭރަށް މީހުން ފޮނުވާ އޭޖެންސީ އަކާާއި، ކޮންސްޓްރަކްޝަން ކުންފުންޏަކާއި، ބުކްޝޮޕަކާއި، ސައިހޮޓަލެއް މަޖިލީހުގެ ދައުރު ހަމަކޮށް ނިކުންނަ މެންބަރުގެ ހުންނަ ކަމަށް ވެސް ނަޝީދު ވިދާޅުވިއެވެ.

މަޖިލީހުގެ ބައެއް މެންބަރުން، ވޯޓު ވިއްކާ ކަމަށް ތުހުމަތު ކުރައްވާ ނަޝީދު ވިދާޅުވީ، މަޖިލީހުގެ ބައެއް މެންބަރުންނަށް ލިބިފައިވާ މުއްސަނދި ކަމަކީ ނުހައްގު މުއްސަނދި ކަމެއް ކަމަށެވެ.

ނަޝީދު ވިދާޅުވީ، މި އަހަރުގެ ރައްޔިތުންގެ މަޖިލީހުގެ އެމްޑީޕީ ކެމްޕޭން، އެކުލަވާލި އިރު ކުރިމަތިވި އެންމެ ބޮޑު މައްސަލަ އަކީ، މަޖިލީހުގެ ނަޒާހަތްތެރިކަން ރައްޔިތުންނަށް އަންގައިދޭނެ ގޮތެއް ހޯދުމުގެ މައްސަލަ ކަމަށެވެ. އަދި މަޖިލީހުގެ ގަދަރާއި އިތްޒަތް ރައްޔިތުންގެ ކުރިމަތީ ހިފެހެއްޓޭނެ ގޮތަކީ ކޮބައި ކަމާ މެދު ވެސް ވިސްނަވަން ޖެހިވަޑައިގެން ކަމަށްވެސް ނަޝީދު ވިދާޅުވިއެވެ.

ނަޝީދު މި މޭރުމުން ވާހަކަފުޅު ދައްކަވަފައި ވާއިރު، މަޖިލީހުގެ މެންބަރުންގެ ވޯޓު ވިއްކާ މައްސަލަ އަކީ ރައްޔިތުން އެކަމާ ނުހަނު ކަންބޮޑުވާ މައްސަލައަކަށް މިއަދު ވަނީ ވެފައެވެ.

ސިޔާސީ