'ހަކުޅި' ކެމްޕޭން މެނޭޖިން އެޕްލިކޭޝަން ގެ މައްސަލަ ގާނޫނީ ޖަމިއްޔާ އެއް ކަމަށްވާ ޕަބްލިކް އިންޓަރެސްޓް ލޯ ސެންޓާ (ޕީއައިއެލްސީ)ން ސިވިލް ކޯޓަށް ހުށައަޅައިފިއެވެ.
ކެންޕޭން މެނޭޖްމަންޓް އެޕްލިކޭޝަން ގެ މައްސަލައިގައި އެ ޖަމިއްޔާއިން ދައުވާ ކޮށްފައިވަނީ އެޕްލިކޭޝަން އުފައްދާ ވިއްކި ފަރާތް ކަމަށްވާ، އަބްދުﷲ ޝުހޫދާއި، މި އެޕްލިކޭޝަން ބޭނުން ކުރައްވަމުންދާ ފަރާތެއް ކަމައްވާ، މާފަންނު ހުޅަނގު ދާއިރާ އަށް ވާދަ ކުރާ ކެންޑިޑޭޓް އަބްދުﷲ އަބްދުއްރަހީމް ގެ މައްޗަށެވެ.
މި ދައުވާގައި ޕީއައިއެލްސީން އެދިފައިވަނީ، މީހެއްގެ ޒާތީ މައުލޫމާތު އެމީހެއްގެ ހުއްދައާ ނުލައި ބޭނުން ކުރުމަކީ ގާނޫނާ ހިލާފު ކަމެއް ކަމަށް ކަނޑައަޅާ، އާންމުންގެ ޒާތީ މައުލޫމާތު ބޭނުންކުރުމާއި ވިއްކުން ހުއްޓުމަށް ދައުވާ ރައްދުވާ ފަރާތްތަކުގެ މައްޗަށް އަމުރު ކުރުމަށެވެ.
ކެމްޕޭން މެނޭޖް ކުރުމަށް އުފައްދާފައިވާ އެ އެޕްލިކޭޝަން ގައި ގިނަ އަދަދެއްގެ އާންމުންގެ ނަމާ، އެޑްރެހާ، ތައުލީމީ ފެންވަރާ، މުސާރައިގެ ފެންވަރާ، ފޮޓޯއާ، ފޯނު ނަންބަރާ، ނިސްބަތްވާ ޕާޓީ، ފަދަ މައުލޫމާތުތައް ހިމެނޭކަމަށް ޕީއައިއެލްސީން ނެރުނު ނޫސް ބަޔާނުގައި ބުނެފައި ވެއެވެ.
މިކަމާ ގުޅިގެން ޕީއައިއެލްސީން ނެރުނު ނޫސް ބަޔާނުގައި ބުނެފައިވަނީ، އާންމުންގެ މައުލޫމާތު އެ ފަރާތްތަކުގެ ހުއްދައާ ނުލައި ވިއްކުމަކީ، ގާނޫނު އަސާސީގެ 24 ވަނަ މާއްދާއިން ލިބިދޭ ހައްގާއި އިންޓަނޭޝަނަލް ކޮވަނެންޓް އޮން ސިވިލް އެންޑް ޕޮލިޓިކަލް ރައިޓްސް (އައިސީސީޕީއާރް)ގެ 17 ވަނަ މާއްދާއާ ހިލާފު ކަމެއް ކަމަށެވެ.
ގާނޫނު އަސާސީގެ 24 ވަނަ މާއްދާގައި ބުނެފައިވަނީ ކޮންމެ މީހެއްގެ ޒަތީ އަދި އާއިލީ ދިރިއުޅުމާއި، ގޯތި ގެދޮރާއި، އަނެކުންނާ ކުރާ ޒާތީ މުއާސަލާތު ތަކަކީ، ހުރުމަތްތެރި ވެގެންވާ ކަންކަންކަމާއި ތަންތަން ކަމަށެވެ. އަދި ހަމަ ކޮންމެ މީހަކުވެސް މި ހައްގުތަކަށް ހުރުމަތްތެރިކޮށް ހިތަން ވާނެ ކަމަށް ވެސް އެ މާއްދަފައި ބުނެފައި ވެއެވެ.
އައިސީސީޕީއާރްގެ 17 ވަނަ މާއްދާގައި ވަނީ، އެއްވެސް މީހަކު އަނެކެއްގެ ޒާތީ އަދި އާއިލީ ކަންތައްތަކާ ބެހިގެން ނުވާނެ ކަމަށާއި، ގާނޫނާއި ހިލާފަށް މީހެއްގެ އިތްޒަތާއި ކަރާމާތައް ނުރައްކަލެއް ކުރިމަތި ކޮށްގެން ނުވާނެ ކަމަށެވެ. އަދި އެފަދަ ކަންތައްތަކުން، ލިބެންޖެހޭ ގާނޫނީ ހިމާޔަތް ލިބުމަކީ ކޮންމެ މީހަކަށް ވެސް ލިބިގެންވާ ހައްގެއް ކަމަށްވެސް އެމާއްދާގައި ބުނެފައިވެއެވެ.
މި އެޕްލިކޭޝަން ގެ މައްސަލައިގައި، ޝުހޫދު ކުރިން ބުނެފައިވަނީ، ޒާތީ މައުލޫމާތު އެއަށް ލެވޭ ފީޗާސްތައް ސޮފްޓް ވެއާގައި ހުރިކަމުގައި ވިޔަސް، އޭނާގެ އަތުގައި، އެކަހަލަ އެއްވެސް މައުލޫމާތެއް ހިމެނޭ ޑޭޓާއެއް ނުހުންނާނެ ކަމަށެވެ. އަދި އޭގެ ޒާތުގައި ސޮފްޓްވެއާގައި، ހަމަ އެކަނި ހިމެނިފައިވާ މައުލޫމާތު ތަކަކީ، އިލެކްޝަނުން އާންމުކޮށްފައިވާ މައުލޫމާތުތައް ކަމަށް ވެސް އޭނާ ވަނީ ބުނެފައެވެ.
