ކުރިއަށް އޮތް ރައްޔިތުންގެ މަޖިލިސް އިންތިހާބަށް އެމްޑީޕީން ހުށަހަޅާ 19 ގާނޫނީ އޮނިގަނޑު އާންމު ކޮށްފިއެވެ.

އެމްޑީޕީން ބުނީ މި އޮނިގަނޑުތަކަކީ އެޕާޓީން ދޮރުން ދޮރަށް ހިނގާ، ރައްޔިތުންގެ ކަންބޮޑުވުންތަކާއި، ހިޔާލުތައް އަޑުއެހުމަށްފަހު، ކަމާބެހޭ އިލްއިމާއި، ހިލްމުގެ އަލީގައި އެކުލަވާލައިފައިވާ އޮނިގަނޑުތަކެއް ކަމަށެވެ. އަދި މިިއޮނިގަނޑުތައް މެދުވެރިކޮށް ރައްޔިތުންގެ ޝަކުވާތަކަށް ފަރުވާ ހޯދައިދޭނީ އެޖެންޑާ 19 އިން ކަމަށްވެސް އެމްޑީޕީން ބުންޏެވެ.

މި އޮނިގަނޑުތައް ތަރުތީބުވެގެން ދަނީ މައިގަނޑު ފަސް ސުރުހީއެއްގެ ދަށުންނެވެ. އެއީ އިންސާފު، އޯގާތެރި ސަރުކާރު، ފަހުރުވެރި އާއިލާ، ޖަޒީރާ ދިރިއުޅުން އަދި ނޫ އިގްތިސާދެވެ. މި ސުރުހީތަކުގެ ދަށުން ހިމެނޭ ކަންތައްތަކުގެ ތެރޭގައި ހިމެނެނީ:

އިންސާފު

އިންސާފުގެ ދަށުން އަންނަނީ ހަތަރު ކަމެކެވެ. އޭގެތެރޭގައި އިންތިގާލީ އިންސާފު ގާއިމްކުރުމާއި ޝަރުއީ ދާއިރާގެ އޮނިގަނޑު އިސްލާހު ކުރުން އަދި ޕަބްލިކް ޑިފެންޑާސް އޮފީސް ގާއިމް ކުރުމުގެ އިތުރުން ޖަވާބުދާރީ ކުރަނިވި ދައުލަތެއް ބިނާކުރުން ހިމެނެއެވެ.

އޯގާތެރި ސަރުކާރު

އޯގާތެރި ސަރުކާރުގެ ދަށުން އަންނަނީ ތިން ކަމެކެވެ. އޭގެ ތެރޭގައި އެންމެ ކުޑަމިނުން ދެވޭނެ އުޖޫރަ ކަނޑައެޅުމާއި ވަޒީފާ ހޯދަން މަސައްކަތްކުރާ ފަރާތްތަކަށް އިނާޔަތް ދިނުން އަދި އިތުބާރު ހުރި ސިއްހީ ނިޒާމެއް ކަށަވަރުކުރުން ހިމެނެއެވެ.

ފަހުރުވެރި އާއިލާ

ފަހުރުވެރި އާއިލާގެ ދަށުން އަންނަނީ ދެ ކަމެކެވެ. އެއީ ބޯހިޔާވަހިކަން ކަށަވަރު ކުރުމާއި ދަރިވަރުންގެ ދަރަނި ކުޑަކުރުމެވެ.

ޖަޒީރާ ދިރިއުޅުން

ޖަޒީރާ ދިރިއުޅުމުގެ ދަށުން އަންނަނީ ތިން ކަމެކެވެ. އޭގެތެރޭގައި ލާމަރުކަޒުކުރުމާއި، ގޮއިފާލައްބަތަކާއި ވިލުފަޅުތައް އާލާކޮށް ބެލެހެއްޓުމުގެ އިތުރުން ނަޒާހަތްތެރި މަޖިލީހެއް އުފެއްދުން ހިމެނެއެވެ.

ނޫއިގްތިސާދު

ނޫއިގްތިސާދުގެ ދަށުން އަންނަނީ ހަތް ކަމެކެވެ. އޭގެތެރޭގައި އަމިއްލަ އާމްދަނީން ޓެކްސް ނެގުމާއި، ފެނާއި ކަރަންޓު އަގުހެޔޮ ކުރުން އަދި ދަތުރުފަތުރުގެ ވިއުގައަކުން ރާއްޖެގުޅާލުން ހިމެއެވެ. އަދި މީގެ އިތުރުން މަހަށް ހަމަ އަގު ހޯދާ ދިނުމާއި ޓުއަރިޒަމްއާއި ގެސްޓްހައުސް ވިޔަފާރި ފުޅާކުރުމާއި އެގްރިވިޔަފާރި ފަހިކުރުން އަދި ކުންޏަކީ އާމްދަނީ ލިބޭނެ ވަސީލަތަކަށް ހެދުންވެސް ހިމެނެއެވެ.

އެގޮތުން އެމްޑީޕީއިން 19 ވަނަ ރައްޔިތުންގެ މަޖިލީހުގައި ޖަޒީރާ ރާއްޖޭގެ މެނިފެސްޓޯ އަދި ރައީސް އިބްރާހީމް މުހައްމަދު ސޯލިހްގެ ރިޔާސީ ވައުދުފުޅުތަކުގައި ހަގީގީ ކުލަޖެއްސުމުގެ މަސައްކަތް ކުރާނެ ކަމަށް އެމްޑީޕީން ބުންޏެވެ. އެމްޑީޕީން ބުނީ މިކަންތައް ކުރަން ނިންމާފައިވާ ގޮތް އެޖެންޑާ 19 ގެ މެނިފެސްޓޯއިން ސާފުކޮށް ބަޔާންވެގެންދާނެ ކަމަށެވެ.

ސިޔާސީ