މިއަހަރުގެ މިހާ ހިސާބަށް އައިއިރު، ޔޫކްރޭންގައި 30000 އަށްވުރެ ގިނަ މީހުންނަށް ހިމަބިހީގެ އިންފެކްޝަން ޖެހިފައިވާއިރު 11 މީހެއްގެ ފުރާނަ ގެއްލިފައިވާކަމަށް ޚަބަރު ލިބިއްޖެއެވެ.
ދުނިޔޭގެ އެކި ހިސާބުތަކުގައި މިހާރު ހަލުވިކަމާއެކު ހިމަބިހި ފެތުރެމުންދާއިރު، ޔޫކްރޭންއަކީ ވިލާތުގެ ގައުމުތަކުން މި ބަލީގެ އަސަރު އެންމެ ބޮޑަށް ކޮށްފައިވާ ގައުމަށް ވަނީ ވެފައެވެ.
ޔޫކްރޭންގެ ސިއްހަތާއި ބެހޭ ވުޒާރާއިން ބުނީ، ހިމަބިހީގެ ނުރައްކާތެރި އިންފެކްޝަންގެ އަސަރުކޮށްގެން އެގައުމުން އެންމެ ފަހުން މަރުވި ކަމަށް ރެކޯޑްކުރެވިފައިވަނީ 9 އަހަރުގެ ކުއްޖެއް ކަމަށެވެ.
މިއަހަރުގެ މިހާ ހިސާބަށް އައިއިރު 30500 މީހަކު މި ބަޔަށް ޕޮޒިޓިވް ވެފައިވާއިރު، އޭގެ ތެރޭގައި 17000 ކުޑަކުދިން ހިމެނޭ ކަމަށް މައުލޫމާތު ލިބެއެވެ.
ޔޫކްރޭންގައި ހަލުވިކަމާއިއެކު ހިމަބިހި ފެތުރެމުންދަނީ ޔޫކްރައިންގެ އިރުމަތީ ސަރަހައްދުތަކުގައި ވަކިވެގަތުމަށް މަސައްކަތްކުރަމުންދާ މީހުންގެ އަމަލުތަކުގެ ސަބަބުން ފާއިތުވީ 5 އަހަރެއްހާ ދުވަހު އެގައުމަށް ކުރިމަތިވެފައިވާ ގޮންޖެހުންތަކާއިއެކު ކުރިމަތިވި ސިއްހީ އަދި އިގުތިސޯދީ މައްސަލަތަކުގެ ސަބަބުން ވެކްސިން ލިބުމުގައި ދަތިތަކަކާއި ދިމާވެގެން ކަމަށް، ކަމާ ބެހޭ ފަރާތްތަކުން ދަނީ ބުނަމުންނެވެ.
