ޕާކިސްތާނުގެ ކުރީގެ އަސްކަރީ ލީޑަރު ޖެނެރަލް ޕަރްވޭޒް މުޝައްރަފު، ދުބާއީގެ ހޮސްޕިޓަލެއްގައި އެޑްމިޓްކޮށްފިއެވެ.
މުޝައްރަފު ހޮސްޕިޓަލުގައި އެޑްމިޓް ކުރެވުނީ، ވަރަށް މަދުން ނޫނީ ނުފެންނަ ވައްތަރުގެ ބައްޔެއްގެ އަލާމަތްތަކެއް މުޝައްރަފުގެ ހަށިކޮޅުން ފެނުމުގެ ސަބަބުން ކަމަށް ޚަބަރު ލިބެއެވެ.
2016 ވަނަ އަހަރުގެ މާޗް މަހުން ފެށިގެން ދުބާއީގައި ދިރިއުޅުއްވަމުން ގެންދަވާ މުޝައްރަފާ ދެކޮޅަށް، ގައުމަށް ޤައްދާރުވީ ކަމުގެ ކުށުގެ ދައުވާ ޕާކިސްތާނުން ވަނީ އުފުލާފައެވެ. އެއީ 2007 ވަނަ އަހަރު، ޕާކިސްތާނުގެ ގާނޫނީ އަސާސީ އުވާލެއްވި މައްސަލައާއި ގުޅިގެންނެވެ.
ޕާކިސްތާނުގެ ގާނޫނު ބުނާގޮތުގައި، ގައުމަށް ހިޔާނާތްތެރިވެ ގައްދާރުވުމުގެ އަދަބަކީ، މަރުގެ ހުކުމް ތަންފީޒު ކުރުން ނުވަތަ އުމުރަށް ޖަލަށް ހުކުމް ތަންފީޒުކުރުމެވެ.
ސިއްހީ ބޭސްފަރުވާއަކަށް ކަމަށް ވިދާޅުވެ އަމިއްލަފުޅަށް ދުބާއީއަށް އަރުވާލެވިގެން ހުންނެވި މުޝައްރަފު ގެންދަވަނީ، ސިއްހީ "އުޒުރުތަކެއް" ދައްކަވައިގެން ޕާކިސްތާނަށް ވަޑައިގެންނެވުމަށް އިންކާރު ކުރައްވަމުންނެވެ.
އޯލް ޕާކިސްތާނު މުސްލިމު ލީގު (އޭޕީއެމްއެލް)ގެ އޯވާސީޒް ޕްރެސިޑެންޓް އަފްޒަލް ސިއްދީޤީ ވިދާޅުވީ، މުޝައްރަފަކީ އެމަލޮއިޑޯސިސްއަށް ފަރުވާ ހޯއްދަވަމުން ގެންދަވާ ބޭފުޅެއް ކަމަށެވެ. މިއީ ވަރަށް މަދުން ނޫނީ ނުފެންނަ ބައްޔެކެވެ. މިއީ ހަށިގަނޑުގެ ގުނަވަންތަކުގައި އެމަލޮއިޑް ގިނަވެގެން މެދުވެރިވާ ބައްޔެކެވެ. އެމަލޮއިޑްއަކީ އިންސާނާގެ ހަށިގަނޑުގައިވާ ބޯން މެރޯއިން އުފައްދާ އާދަޔާ ހިލާފު ޕްރޮޓީންއެކެވެ. މި ޕްރޮޓީންތަކަކީ ހަށިގަނޑުގެ ޓިޝޫތަކާއި އެތެރެހަށީގެ ގުނަވަންތަކުގައި ޖަމާވުމުގެ ގާބިލުކަން ލިބިފައިވާ ޕްރޮޓީންތަކެކެވެ.
މި ބަލީގެ ސަބަބުން ކޮޅަށް ތެދުވެވަޑައިގެން ހިނގާބިނގާވެ އުޅުއްވަންވެސް މުޝައްރަފަށް ދަތިތަކާއި ކުރިމަތިލައްވަން ޖެހިވަޑައިގެންފައި ވާކަމަށް ސިއްދީޤީ ވަނީ ވިދާޅުވެފައެވެ. މި ބައްޔަށް މުޅިން ފަރުވާ ކުރެވުމުން، އެނބުރި ގައުމަށް ވަޑައިގަންނަވާ މުޝައްރަފު ބޭނުންފުޅުވާ ކަމަށްވެސް ސިއްދީޤީވަނީ ވިދާޅުވެފައެވެ.
1999 ވަނަ އަހަރުން ފެށިގެން 2008 ވަނަ އަހަރުގެ ނިޔަލަށް ޕާކިސްތާނުގައި ވެރިކަން ކުރެއްވި މުޝައްރަފަކީ، ޕާކިސްތާނުގެ ކުރީގެ ބޮޑުވަޒީރު ބޭނަޒީރު ބުއްޓޫ އަވަހާރަކޮށްލި މައްސަލައިގެ ތަހުގީގަށް ފިއްލަވާފައިވާ ފަރާތެއްގެ ގޮތުގައި ޕާކިސްތާނުން ކަނޑައަޅާފައިވާ ފަރާތެކެވެ.
