ބަނޑޭރި ގެތަކުގައި ހުރި މައްސަލަތަކުގެ ވާހަކަ ގިނަ ގިނައިން ދައްކައިގެން ނޫނީ ރޯމާ ދުވާލު ކުރާ ވައްކަންތައް ނުހުއްޓުވޭނެ ކަމަށް ރައީސް ނަޝީދު ވިދާޅުވެއްޖެވެ.
މާފަންނު އުތުރު ދާއިރާގެ އެމްޑީޕީގެ ކެންޑިޑޭޓް އިމްތިޔާޒު ފަހުމީގެ ކެމްޕޭން ޖަލްސާގައި ވާހަކަ ދައްކަވަމުން ނަޝީދު، ބަނޑޭރި ގެތަކުގައި ހުރި މައްސަލަތަކުން މިސާލު ދައްކަވަމުން ވިދާޅުވީ މީހަކު ގޯއްޗެއް ހަދަން ކޮންޓްރެކްޓަރަކާ ހަވާލު ކޮށްގެން އެ ގޯތި ނުހެދުނީމައި ފަނޑިޔާރުގެ ތަކަށް ދިޔުމުން އެ ގޯތިވެސް، ގޯތި ހަދާ ލާރިވެސް ކޮންޓްރެކްޓަރަށް ދޭން ޖެހޭ ކަމަށެވެ.
މިއީ އިމްތިޔާޒު ފަހުމީ ދައްކަވާ އޭނާގެ ގެ [ފަނޑިޔާރުގެ] އޮތް ހާލަތު ކަމަށް ވިދާޅުވަމުން ނަޝީދު ވިދާޅުވީ، ރޯމާ ދުވާލު ވައްކަން ކޮށްދެނީ ފަނޑިޔާރުގެ ތަކުން ކަމަށާ އެވާހަކަތައް އެންމެން ދައްކަން ޖެހޭ ކަމަށެވެ. އަދި އެވާހަކަތައް ދައްކައިގެން އެ ފަނޑިޔާރުން ލަޑުގަންނަވާ ނުލަނީސް އެމީހުން އިސްލާހު ނުވާނެ ކަމަށްވެސް ވިދާޅުވިއެވެ.
"ދެން އަޅުގަނޑު މިވާހަކަ ދެއްކީމާ އަޅުގަނޑާ ނުރުހޭނެ، ހަމަ އެގޮތް އިމްތިޔާޒު ފަހުމީއަށްވެސް އޮތީ" ފަނޑިޔާރުގެ ތަކަށް ފާޑު ކިޔާ ފަރާތްތަކާ ފަނޑިޔާރުގެ ތަކުން ނުރުހޭނެކަން ހާމަ ކުރައްވަމުން ނަޝީދު ވިދާޅުވިއެވެ.
ނަޝީދު ވިދާޅުވީ އެޖެންޑާ 19 އަންނަނީ ފަނޑިޔާރުގެތައް ވެސް އިސްލާހު ކުރަން ކަމަށެވެ. މައްސަލަ އަކީ ވަކި ފަރުދަކަށް އަމާޒު ވާ މައްސަލައެއް ނޫން ކަމަށާ ކިތަންމެ ހުދުމުހުތާރު މީހަކު ނުވަތަ ބަޔަކު ތިއްބަސް ފުރިހަމަ ނިޒާމެއް ގެނެވުނީމައި ކަންކަން ހަމަ މަގަށް އެޅުވޭނެ ކަމަށެވެ. ނަޝީދު ވިދާޅުވީ އެޖެންޑާ 19 ވެގެންދާނީ އެންމެނަށް ހަމަޖެހުން ގެނެސްދޭ ބަދަލުތަކަކަށް ކަމަށެވެ.
ރާއްޖޭގެ ޝަރުއީ ނިޒާމަކީ އަބަދުވެސް ގިނަ ބައެއްގެ ފާޑު ކިޔުން އަމާޒުވާ ތަނެކެވެ.
