މަޖިލީސް އިންތިހާބުގައި ވާދަ ކުރާ ކެންޑިޑޭޓުންގެ ދެމެދުގައި ޕަބްލިކް ސާވިސް މީޑިއާ(ޕީއެސްއެމް)އިން ބޭއްވި ބަހުސްގައި، ރޫމް ބޯއީން މަޖިލީހަށް ކުފޫ ހަމަނުވާ ކަމަށް ވިދާޅުވެ، އޭދަފުށީ ދާއިރާގެ މެންބަރު އަދި މަޝްހޫރު ވިޔަފާރި ވެރިޔާ އަހްމަދު ސަލީމް (ރެޑްވޭވް ސަލީމް) ދެއްކެވި ވާހަކަ އަށް މައާފަށް އެދިނުލައްވާނަމަ، އޭނާގެ ވިޔަފާރިތައް ބޮއިކޮޓު ކުރުމަށް މޯލްޑިވްސް ލޭބާ އެންޑް ސޯޝަލް ޑިމޮކްރެޓިކް ޕާޓީ( ލޭބާ ޕާޓީ) އިން ގޮވާލައިފިއެވެ.
މި ކަމާ ގުޅިގެން ލޭބާ ޕާޓީން މިއަދު ނެރުނު ނޫސް ބަޔާނުގައި ވަނީ، ބަހުސްގައި ރޫމް ބޯއީންނަށް ނިސްބަތްކުރައްވާ ރޭޑްވޭވް ސަލީމް ވިދާޅުވި ވާހަކައިގާ އޭނާ ނުސީދާކޮށް އިޝާރާތް ކުރައްވާފައި ވަނީ، އެ ޕާޓީގެ ކެންޑިޑޭޓަކަށް ކަމަށެވެ. އަދި އޭނާގެ މި އަމަލަކީ ރާއްޖޭގެ އެންމެހާ މަސައްކަތްތެރީންނަށް މަލާމާތާއި ފުރައްސާރަ ރައްދުވާ ނާތަހުޒީބު އަމަލެއްކަމަށް ވެސް އެ ނޫސް ބަޔާނުގައި ވެއެވެ.
ލޭބާ ޕާޓީން ބުނީ، ރެޑްވޭވް ސަލީމްގެ މިއަމަލު ހަރުކަށި އިބާރާތުން ކުށްވެރި ކުރާ ކަމަށާ، އޭދަފުށީ ދާއިރާގެ މަސައްކަތްތެރީންނާ، މަސައްކަތްތެރީންގެ އާއިލާތަކާ، އެއާއިލާތަކަށް ހެޔޮ އެދޭ އެންމެހާ ފަރާތްތަކުން އޭނާއަށް މި އިންތިހާބުގައި ވޯޓު ނުދިނުމަށް ގޮވާލާ ކަމަށެވެ. މަސައްކަތްތެރީންނަށް އިހާނެތި ބަސްބުނުމަކީ ލޭބާ ޕާޓީން ތަހައްމަލު ކުރާނެ ކަމެއް ނޫންކަމަށް ވެސް އެ ޕާޓީގެ ނޫސް ބަޔާނުގައި ވެއެވެ.
މީގެ އިތުރުން ލޭބާ ޕާޓީން މި އަދު ނެރުނު ނޫސް ބަޔާނުގައި، ރެޑްވޭވް ސަލީމް ފަދަ ބައެއް މަހުޖަނުން، އިންތިހާއަށް ފައިސާގެ ބޭނުން ނަހަމަ ގޮތުގައި ހިފާ، ދައުލަތުގެ ބާރުތަށް 'ފިރުކާލައިގެން' ދައުލަތުގެ ވަސީލތްތަކުގެ މައްޗަށް އަތްގަދަ ކުރަން މަސަތްކަތް ކުރާކަމަށް ތުހުމަތު ކޮށްފައިވެއެވެ. އަދި މިކަމާ މެދު އެ ޕާޓީން ވަރަށް ކަންބޮޑު ވާކަމަށް ވެސް ނުސް ބަޔާނުގައި ވެއެވެ.
ލޭބާ ޕާޓީން ބުނީ، ކުރިއަށް އޮތް އިންތިހާބުގައި މަހުޖަނުންނަށް ވޯޓު ނުވިއްކާ، މަސައްކަތްތެރީން ބާރު ވެރި ކުރުވާ، ރައްޔިތުންގެ ހައްގުތައް ހޯދުމަށް މަސައްކަތް ކުރާ ކެންޑިޑޭޓުންނަށް ވޯޓު ދިނުމަށް ރައްޔިތުންނަށް އިލްތިމާސް ކުރާ ކަމަށެވެ.
