ޖިނާއީ ބޮޑެތި ދައުވާތަކެއްގައި ބެދިފައިވާ ފިލިޕީންސްއިން، ބައިނަލްއަގުވާމީ ޖިނާއީ ކޯޓު (އައި.ސީ.ސީ)ގެ މެންބަރުކަން މުޅިން ދޫކޮށްލައިފިއެވެ.
އައި.ސީ.ސީގެ މެންބަރުކަން ފިލިޕީންސްއިން މުޅިން ދޫކޮށްލާފައި މިވަނީ އެގައުމާއި ދެކޮޅަށް ތަހުގީގެއް ހިންގާނެކަމަށް އައި.ސީ.ސީއިން ބުނެފައިވަނިކޮށެވެ. މީގެ އަހަރެއްހާ ދުވަސްކުރިން ފިލިޕީންސްއިން ވަނީ އދއަށް މިކަން އަންގާފައެވެ.
ހަނގުރާމައިގެ ޖަރީމާ ހިންގާ ފަރާތްތަކާއި ދެކޮޅަށް ބައިނަލްއަގުވާމީ ފެންވަރުގައި ތަހުގީގު ހިންގާ ހަމައެކަނި ކޯޓުގެ މެންބަރުކަން ފިލިޕީންސްއިން ދޫކޮށްލާފައިވާއިރު، މިއީ މިކަން ކުރި 2 ވަނަ ގައުމެވެ. އައި.ސީ.ސީގެ މެންބަރުކަން ފުރަތަމަ ދޫކޮށްލި ގައުމަކަކީ ބުރުންޑީއެވެ.
އދގެ ތަރުޖަމާނު އެރީ ކަނެކޯ ވިދާޅުވީ، މާޗް 17 ވަނަ ދުވަހުން ފެށިގެން ފިލިޕީންސްއަކީ އައި.ސީ.ސީގެ މެންބަރެއް ނޫންކަމަށް ބަޔާންކުރާ ރަސްމީ ލިޔުންވެސް ސެކްރެޓަރީ ޖެނެރަލް ފޮނުއްވާފައިވާކަމަށެވެ.
އައި.ސީ.ސީއިން ވަކިވުމަށް ފިލިޕީންސްއިން އެންމެ ފުރަތަމަ މަސައްކަތް ފެށީ، މަސްތުވާތަކެއްޗާއި ދެކޮޅަށް ފިލިޕީންސްގައި ކުރި ވަރުގަދަ ހަނގުރާމައާއި ގުޅިގެން ފިލިޕީންސްގެ ސަރުކާރާއި ދެކޮޅަށް މައްސަލަ ބަލަން ފެށުމުންނެވެ.
ފިލިޕީންސްއިން ބުނަމުންދަނީ އެގައުމަކީ އައި.ސީ.ސީ އުފެދުމަށް މަގުފަހިކުރި ރޯމް ސްޓެޓިއުޓް މުއާހަދާގައި އެއްވެސް އިރެއްގައި ސޮއިކޮށްފައިވާނެ މެންބަރު ގައުމެއް ނޫންކަމަށެވެ. އެހެންކަމުން ފިލިޕީންސްއާއި ދެކޮޅަށް މައްސަލަ ބެލުމުގެ ހައްގެއް އައި.ސީ.ސީއަކަށް ނޯންނާނެ ކަމަށްވެސް އެގައުމުން ދަނީ ބުނަމުންނެވެ.
މަސްތުވާތަކެއްޗާއި ދެކޮޅަށް ފިލިޕީންސްގެ ސަރުކާރުން ފެށި ވަރުގަދަ ހަނގުރާމާގައި 5000 އަށްވުރެ ގިނަ މީހުން ވަނީ މަރާލާފައެވެ.
އައި.ސީ.ސީގެ ގަވާއިދު ބުނާ ގޮތުން ގައުމަކުން އެ ކޯޓުގެ މެންބަރުކަން ދޫކޮށްލާއިރު ބަލަން ފަށާފައިވާ މައްސަލަތައް ބަލާ، ނިންމުމުގެ ހައްގު އެ ކޯޓަށް ލިބިގެންވެއެވެ.
