މިދިޔަ ހުކުރު ދުވަހު ނިއުޒީލަންޑްގެ ކްރިސްޓްޗާޗުގެ ދެ މިސްކިތަކަށް އަމާޒުކޮށް ދިން ބަޑީގެ ހަމަލާތަކާއި ގުޅިގެން ހިންގާ ތަހުގީގުގެ ދަށުން، އޮސްޓްރެލިއާގެ ގެތަކެއް ބަލާ ފާސްކުރަން ފަށައިފިއެވެ.
ބަލާ ފާސްކުރަމުންދަނީ ނިއު ސައުތް ވޭލްސްގެ ދެ ގެއެއް ކަމަށް ޚަބަރު ލިބެއެވެ.
ހުކުރު ދުވަހުގެ ހަމަލާތަކުގައި މަރުވި މީހުންގެ އަދަދު 50އަށް އަރާފައިވާއިރު، މި ހަމަލާތައް ދިން 28 އަހަރުގެ ބްރެންޓޮން ޓެރަންޓްގެ މައްޗަށް މިހާރު ވަނީ ގަސްތުގައި މީހަކު މެރިކަމުގެ ދައުވާ އުފުލާފައެވެ. މިހާތަނަށް ލިބިފައިވާ މައުލޫމާތަށް ބަލާއިރު، މިހަމަލާތައް ދިނުމުގައި ބައިވެރިވެފައިވަނީ އޭނާ އެކަންޏެވެ.
ޓެރަންޓަކީ ސިޑްނީގެ އުތުރުން 600 ކިލޯމީޓަރެއްހާ ދުރު ސަރަހައްދުގައި އޮންނަ ގްރެފްޓަންއަށް ނިސްބަތްވާ މީހެކެވެ.
އޮސްޓްރޭލިއާގެ މީޑިއާ ރިޕޯޓްޓްތައް ބުނާ ގޮތުގައި ފުލުހުން ރެއިޑް ކުރަމުންދާ ދެ ގޭގެ ތެރެއިން އެއް ގެ އަކީ ޓެރަންޓްގެ ދައްތައެއް ނޫނީ ކޮއްކޮއެއްގެ ގެއެކެވެ. ފުލުހުން ބުނީ، އޮސްޓްރޭލިއާގައި ދިރިއުޅެމުންދާ ޓެރަންޓްގެ އާއިލާއިން މި ތަހުގީގުތަކަށް އެއްބާރުލުން ދެމުންދާކަމަށެވެ.
މިދިޔަ ހޮނިހިރު ދުވަހު، ނިއުޒީލަންޑްގެ ކޯޓަކަށް ޓެރަންޓް ހާޒިރުކޮށް އޭނާގެ މައްޗަށް ދައުވާ އުފުލާފައިވާއިރު، ޓެރަންޓް ވަނީ އޭނާ ވަކީލު ކަމުގައި ހުރި މީހާ އެ މަގާމުން ދުރުކޮށް، ސަރިޔަތުގައި އޭނާ ތަމްސީލުކުރާނީ ޚުދު އޭނާ އަމިއްލައަށް ކަމަށް ބުނެފައެވެ.
