މިދިޔަ ހުކުރު ދުވަހު ނިއުޒީލަންޑްގެ ކްރައިސްޓްޗާޗުގެ މިސްކިތްތަތަކަށް ބަޑީގެ ހަމަލާދިން މީހާއަށް ހިތުގެ އަޑިން މައާފު ދީފައިވާނެ ކަމަށް، އެދުވަހުގެ ހަމަލާތަކުގައި މިދުނިޔެއާއާއި ވަކިވެދިޔަ 44 އަހަރުގެ އަންހެނެއްގެ ފިރިމީހާ ކަމަށްވާ ފަރީދު އަހުމަދު ބުނެފިއެވެ.
ބަޑީގެ ހަމަލާތައް އަމާޒުވި ވަގުތު، ހުސްނަ ދުވެފައި ގޮސް މިސްކިތް ތެރެއަށް ވަނީ، ފުރޮޅުލީ ގޮނޑިއެއްގައި އިންނަ އޭނާގެ ފިރިމީހާ ސަލާމަތް ކުރުމަށެވެ. ނަމަވެސް އެ ހަމަލާތަކުން ސަލާމަތް ވެވޭ ގޮތް ނުވެ، ހުސްނާ މަރުވީއެވެ.
މީޑިއާއާއި ވާހަކަ ދައްކަމުން ފަރީދު ބުނީ އޭނާގެ އަނބިމީހާ މަރުވެދިޔައެއް ކަމަކު، ބަޑިޖެހި މީހާއަށް ނަފުރަތު ނުކުރާ ކަމަށެވެ. އިންސާނެއްގެ ހައިސިއްޔަތުން އެމީހާއަށް ލޯބިކުރަން ކަމަށާއި، ނަމަވެސް އެއްވެސް ހާލެއްގައި އެމީހާ ހިންގި އެ އަމަލަށް ތާއީދު ނުކުރާ ކަމަށްވެސް ފަރީދު ވަނީ ބުނެފައެވެ.
ފަރީދު ބުނީ ބަޑިޖެހި މީހާއަކީ އޭނާގެ ދިރިއުޅުމުގެ ކޮންމެވެސް ހިސާބެއްގައި ބޮޑު ހިތާމައަކާއި ކުރިމަތިލާންޖެހުނު މީހެއް ކަމަށް ގަބޫލުކުރާ ކަމަށާ، އެ ހިތާމަ އެދެވޭ ފިކުރުތަކަކަށް ބަދަލުކުރަން އެމީހާއަށް ނޭނގުނީ ކަމުގައިވެސް ވެދާނެ ކަމަށެވެ.
ޓެރަރިސްޓް ހަމަލާ ދޭ މީހުންނަކީ އަނެކުން ބިރު ގަންނަވަން އުޅޭ ބައެއް ކަމަށާ، އެމީހުންގެ މަގުސަދަކީ އެއް ބަޔަކު އަނެއް ބަޔަކާއި ދެމެދު ހަމަނުޖެހުން އުފެއްދުން ކަމަށްވެސް ފަރީދު ވަނީ ސިފަކޮށްފައެވެ. ނަމަވެސް މުސްލިމުންނަކީ ރައްދުގައި ހަމަލާތަކެއް ދޭނެ ބައެއް ނޫންކަމަށްވެސް ފަރީދު ވަނީ ބުނެފައެވެ.
ހަމަލާ ދިން މީހާއާއި މެދު އެއްވެސް ހަސަދަވެރިކަމެއް ނެތް ކަމަށާ، އަދި އޭނާއަށް ހެޔޮ މަގު ދައްކަވާތޯ ހެއްދެވި ފަރާތަށް ދުއާ ދަންނަވާކަމަށްވެސް ފަރީދު ވަނީ ބުނެފައެވެ.
ކްރައިސްޓްޗާޗްގެ މަސްޖިދުއްނޫރްގެ އިތުރުން ލިންވުޑް އެވެނިއު މިސްކިތަށް އަމާޒުކޮށް މާޗު 15 ވަނަ ދުވަހު މީހަކު ދިން ބަޑީގެ ހަމަލާތަކުގައި މަރުވި މީހުންގެ އަދަދި މިހާރު 50 އަށް އަރާފައިވާއިރު، މި ހަމަލާތަކާއި ގުޅިގެން 1 މައްޗަށް ވަނީ، ގަސްތުގައި މީހަކު މެރިކަމުގެ ދައުވާ އުފުލާފައެވެ. އޮސްޓްރޭލިއާގެ ރައްޔިތެއް ކަމަށްވާ އުމުރުން 28 އަހަރުގެ ބްރެންޓޮން ޓެރަންޓްއާއި ދެކޮޅަށް ނިއުޒީލަންޑްގައި ހިންގާ ސަރިޔަތުގެ އިތުރު އަޑުއެހުމެއް ދެން އޮންނާނީ އަންނަ އޭޕްރިލް މަހުގެ 5 ވަނަ ދުވަހުއެވެ.
