ވެދިޔަތަން ހަނދާން ނައްތާލާ ނުރަނގަޅު އެއްޗެއް ރަނގަޅު ގޮތުގައި ގަބޫލު ކުރަން އަދި މާ އަވަސްކަމަށް ނައިބު ރައީސް ފައިސަލް ނަސީމު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންތިހާބުގައި އެމްޑީޕީން ފޮނަދޫ ދާއިރާއަށް ވާދަކުރާ ކެންޑިޑޭޓް މޫސާ ސިރާޖުގެ ކެމްޕޭން ޖަގަހަ ފޮނަދޫގައި ހުޅުއްވާ ދެއްވާ ވާހަކަފުޅު ދައްކަވަމުން، ނައިބު ރައީސް ވިދާޅުވީ، ވޭތިވެދިޔަ ފަސް އަހަރު ރައްޔިތުންނަށް އަނިޔާ ދިން މީހުންނަށް މާފު ކުރެއްވުމެއް ނެތް ކަމަށެވެ. އަދި ރައްޔިތުންގެ ފައިސާއަށް ހިޔާނާތްތެރިވެ، އެ ފައިސާ ގައި ޖެހުނު އެއްވެސް މީހަކަށް ސަރުކާރުގެ ތާއީދު ނޯންނާނެ ކަމަށް ވެސް ފައިސަލް ވިދާޅުވިއެވެ.

ފައިސަލް ވިދާޅުވީ، ހުޅުތަކުގައާއި ހަށިގަނޑުގައި އެވޭން އަދިވެސް ނުފިލާ އެބަ ހުރި ކަމަށެވެ. އަދި އެއީ ހަނދާނުން ފިލައިގެން ދާނެ ކަންކަމެއް ނޫން ކަމަށް ވެސް އޭނާ ވިދާޅުވިއެވެ.

މީގެ އިތުރުން ފައިސަލް ވިދާޅުވީ، ސަރުކާރުން ކުރަމުންދާ މަސައްކަތަކީ ރައްޔިތުންނަށް ފާގަތި ދިރިއުޅުމެއް ފަހިކޮށްދިނުމާ، ހަމަޖެހިލައިގެން ރައްޔިތުންނަށް ދިރިއުޅެވޭނެ މާހައުލެއް ކަށަވަރު ކޮށްދިނުމުގެ މަސައްކަތް ކަމަށެވެ. އަދި އެކަމަށް ހުރަސްއަޅާ އެއްވެސް ބަޔަކަށް ސަރުކާރުގެ ތާއީދު ނެތް ކަމަށްވެސް ފައިސަލް ވިދާޅުވިއެވެ.

ފައިސަލް މިހެން ވިދާޅުވެފައި މިވަނީ، އޭނާ ނިސްބަތްވެ ވަޑައިގަންނަވާ ޖުމްހޫރީ ޕާޓީ(ޖޭޕީ) ގެ ލީޑަރު ގާސިމް އިބްރާހީމް، މިފަހަރުގެ މަޖިލިސް އިންތިހާބުގައި ޕްރޮގްރެސިވް ކޯލިޝަން ގެ ކެންޑިޑޭޓުންނަށް ތާއީދު ކުރައްވަން ނިންމަވާ އެކަން އިއުލާނު ކުރައްވާފައި ވަނިކޮށެވެ.

ސިޔާސީ