ދީނަށް އަންނަ ގޮންޖެހުންތަކާ، އިންޑިޔާ ސިފައިން ރާއްޖޭގައި ގާއިމުވެ ތިބުމާ ގުޅިގެން އާޓިފިޝަލް ބީޗުގައި ކުރީގެ ހޯމް މިނިސްޓަރު ބާއްވަވަން އުޅުއްވި ޖަލްސާ މާލެ ސިޓީ ކައުންސިލްގެ އެދުމުގެ މަތިން ފުލުހުން ހުއްޓުވައިފިއެވެ.

މިކަމާއި ގުޅޭގޮތުން ފުލުހުން ބުނެފައިވަނީ، މާލެ ސިޓީ ކައުންސިލުން މިއަދު ޕީއެންސީ އަށް އާޓިފިޝިއަލް ބީޗް ދޫކޮށްފައި ވަނީ ފަސް ގަޑި އިރަށް އެ ޕާޓީގެ ހަރަކާތެއް ބޭއްވުމަށް ކަމަށެވެ. ނަމަވެސް އާޓިފިޝަލް ބީޗްގައި ހަރަކާތެއް ބޭއްވުމަށް މަސައްކަތް ކުރައްވަމުން ގެންދެވީ އުމަރު ކަމަށެވެ. އަދި ސިޓީ ކައުންސިލްގެ އެދުމުގެ މަތިން އާޓިފިޝަލް ބީޗް އެގަޑީގައި ދޫކޮށްފައިވާ ފަރާތް، ޕީއެންސީއަށާއި އުމަރަށް އެކަންތައް އަންގާ އާޓިފިޝަލް ބީޗް ރަސްމީކޮށް ދޫކޮށްފައިވާ ގޮތާއި، އެގޮތަށް ތަންފީޒު ކުރުމަށް މާލެ ސިޓީ ކައުންސިލްގެ އެދުމުގެ މަތިން އެހީތެރިކަން ފޯރުކޮށްދީފައިވާ ކަމަށެވެ.

ޕީއެންސީގެ އިސް ބޭފުޅުން ހިމެނޭގޮތަށް އުމަރު ނަސީރު ބާއްވަވަން އުޅުއްވި ޖަލްސާ ފެށުނު ތަނާހެން، ފުލުހުން އައިސް ސިޓީކައުންސިލުން އެކަން ހުއްޓުވައިދިނުމަށް އެދިފައިވާކަމަށް ބުނުމުން، ޕީއެންސީން ވަނީ ޖަލްސާ ހުއްޓާލައި އެއާ އެއްގޮތަށް އަމަލުކޮށްފައެވެ.

ދީނަށް އަންނަ ގޮންޖެހުންތަކާ، އިންޑިޔާ ސިފައިން ރާއްޖޭގައި ގާއިމުވެ ތިބުމާ ގުޅިގެން އާޓިފިޝަލް ބީޗުގައި ބާއްވަން އުޅުނު ޖަލްސާގައި އިންޑިއާ ސިފައިން ރާއްޖޭގައި ތިބި ތިބުމާ، އެކަމުގެ ސަބަބުން ކުރިމަތި ވެފައިވާ ކަންބޮޑުވުންތައް ހިއްސާ ކުރައްވާނެ ކަމަށް ވެސް އުމަރު ވިދާޅުވެފައިވެއެވެ.

ޕްރޮގްރެސިވް ކޯލިޝަންގެ ބައެއް ބޭފުޅުންވެސް ވާހަކަ ދެއްކެވުމަށް ރޭވި މި ޖަލްސާއަކީ އިހްތިޖާޖެއް ނުވަތަ އަޑު އުފުލުމެއް ނޫން ކަމަށް އުމަރު ވިދާޅުވިއެވެ. އަދި ޖަލްސާ ގެ ސަބަބުން ހާސިލު ކުރައްވަން ބޭނުންވެލައްވާ ނަތީޖާއަކީ، މި ކަންކަމާ ގުޅޭ ގޮތުން، ރައްޔިތުންނަށް އިތުރު މައުލޫމާތު ތަކެއް ފޯރުކޮށްދެއްވުން ކަމަށްވެސް އޭނާ ވިދާޅުވިއެވެ.

މި ޖަލްސާގައި އުމަރު ފިޔަވައި އިސް އެހެން ބޭފުޅެއް ބައިވެރިވެފައިވާ ނުވާއިރު، ޖަލްސާ ހުއްޓާލާފައިވަނީ ކުރީގެ ނޫސްވެރިޔާ ލަޔާލް މަނިކު ވާހަކަ ދައްކާ ނިމުނު ހިސާބުންނެވެ. މި ޖަލްސާއަކީ ޕީއެންސީއަށް ހުއްދަ ދިން ޖަލްސާއެއް ނަމަވެސް، އުމުރު މި ޖަލްސާގައި ބައިވެރިވެލައްވާފައިވަނީ، އިންޑިއާ ސިފައިން ރާއްޖޭގައި ތިބުމާ ދެކޮޅަށް އިހުތިޖާޖުކުރުމަށް ސަރުކާރުން ފުރުސަތު ނުދިނުމުން ކަމަށް ވިދާޅުވެއެވެ.

ސިޔާސީ