ޖުމްހޫރީ ޕާޓީ (ޖޭޕީ) ނިކަމެތި ނަމަވެސް އެ ލިބުނު ކަމެއް (ސަރުކާރުން ލިބުނު މަގާމެއް) ލިބިފައިވަނީ، ޖޭޕީ އާ ހުރެ ކަމަށް ސަރުކާރުގެ މަތީ މަގާމު ތަކުގައި ތިއްބެވި ޖޭޕީގެ މެންބަރުންނަށް ނިސްބަތްކުރައްވައި، އެ ޕާޓީގެ ލީޑަރު ގަސިމް އިބްރާހީމް ވިދާޅު ވެއްޖެއެވެ.

ގާސިމް ވިދާޅުވީ، ވަޒީފާއެއްގައި ހުރި މީހަކަށްވެސް އެ މަގާމު ލިބިފައިވަނީ "ޖޭޕީގެ ބުރަކަށި މައްޗަށް ސަވާރު ވެގެން" ހުރެގެން ކަމަށެވެ. އަދި އިހުލާސްތެރި ވުމަކީ، ތެދުވެރި ވުމަކީ، އަމަނާތްތެރި ވުމަކީ އަދި އިންސާނިއްޔަތުވަންތަ ކަމަކީ "ނިކަމެތި" ޖޭޕީއަށް ހިދުމަތް ކޮށްދިނުން ކަމަށް ވެސް އޭނާ ވިދާޅު ވިއެވެ. އޭނާ ވިދާޅުވީ، އިހުލާސްތެރި ވުމަކީ، ޖޭޕީ ނިކަމެތި ވާނެ ކަމެއް ނުވަތަ ބަހެއްވެސް ނުބުނުން ކަމަށެވެ.

އެގޮތުން ގާސިމް ވިދާޅުވީ، ފިރިހެން ވަންތަ ކަމަކީ ނުވަތަ އަންހެން ވަންތަ ކަމަކީ، މަގާމުގެ ބޭނުމުގައި ޖޭޕީން ވަކިވުމުގެ ކުރިން، ހުރި މަގާމުން އިސްތިއުފާ ދިނުން ކަމަށެވެ.

މީގެ އިތުރުން ގާސިމް ވިދާޅުވީ، ޖޭޕީން މިގޮތަށް (ޕުރޮގްރެސިވް ކޮންގްރެސް އާ ގުޅިގެން) މަޖިލީހުގެ ގޮނޑި ތަކަށް ނުކުންނަން މަޖުބޫރުވީ، އެމްޑީޕީން "ވައުދު އުވާލާ" ހިޔާނަތްތެރިވެ މަކަރު ވެރިވެ އަނިޔާ ވެރި ވުމުން ކަމަށެވެ. އަދި އެހެން ނޫންނަމަ ޖޭޕީއިން ކުރިމަތިލީހީ 22 ގޮނޑިއަކަށް ކަމަށްވެސް ގާސިމް ވިދާޅުވިއެވެ.

ގާސިމް މިހެން ވިދާޅުވެފައި ވަނީ، ޖޭޕީން ރައްޔިތުންގެ މަޖިލީހުގެ އިންތިހާބުގައި، ޕުރޮގްރެސިވް ކޮންގްރެސްއާ ގުޅިގެން ވާދަ ކުރުމަށް ނިންމުމުން، ސަރުކާރު ގެ އިސް މަގާމުތަކުގައި ތިއްބެވި، ޖޭޕީގެ ބައެއް މެންބަރުން، ޖޭޕީ ކައުންސިކް ގްރޫޕްގައި އެކަމާ ނުރުހުން ފާޅުކުރައްވަމުން ގެންދަވަނި ކޮށެވެ. އޭގެ ތެރޭގައި، އޭނާގެ އަނބިކަނބަލުން އަދި ޓްރާންސްޕޯޓު މިނިސްޓަރު އާއިޝަތު ނަހުލާއާ، ޓޫރިޒަމް މިނިސްޓަރު އަލީ ވަހީދު އަދި އެންވަޔަރްމަންޓް މިނިސްޓަރު ޑރ.ހުސެއިން ރަޝީދު ހިމެނި ވަޑައިގަންނަވައެވެ.

ސިޔާސީ