އެޖެންޑާ 19 ތަންފީޒު ކުރެވޭނީ ރައްޔިތުންގެ މަޖިލީހުގައި ސަރުކާރު ތަމްސީލުކުރައްވާ ބޭފުޅުންގެ އިތުރުން އެޖެންޑާ 19 ގަބޫލު ކުރައްވާ ބޭފުޅުން ތިއްބަވައިގެން ކަމަށް ދިވެހިރާއްޖޭގެ ރައީސް އިބްރާހިމް މުހައްމަދު ސާލިހް ވިދާޅުވެއްޖެއެވެ.
ކެޔޮދޫ ދާއިރާއަށް ވާދަކުރައްވާ ކެންޑިޑޭޓުގެ ކެމްޕޭން ފެށުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މި ހުށަހަޅާ އިސްލާހުތައް، ގާނޫނުތަކަށް ގެންނަންޖެހޭ ބަދަލުތައް ގެނައުމުގައި އެޖެންޑާ 19 ގަބޫލުކުރާ، މިކަމަށް ތާއީދުކުރާ ބަޔަކު މަޖިލީހުގައި ތިއްބަވަން ޖެހޭކަމަށެވެ.
އެޖެންޑާ 19ގެ މުހިންމުކަން ހާމަކުރަމުން ރައީސް ވިދާޅުވީ އޭގައި ހުރީ އެމަނިކުފާނުގެ ވެރިކަމުގައި ކުރައްވަން ވައުދުވެފައިވާ ކަންތައްތަކުގެ ތަފްސީލުކަމަށެވެ. އޭގެތެރޭގައި ހިމެނޭ ބައެއް ވައުދުތަކުގެ ޔަގީންކަން އެ ޖަލްސާގައި އެމަނިކުފާނު ވަނީ އަރުއްވާފައެވެ.
އެގޮތުން ތަރައްގީގެ މަޝްރޫއަކީ ވަކިރަށެއް، ވަކި އަތޮޅެއް ނުވަތަ އާބާދީއަށް ނުބަލާ، އެއްވެސް ރަށެއް ބާކީ ނުކޮށް ތަރައްގީކުރުމަށް ވީ ވައުދުފުޅެއް ކަމަށް ވިދާޅުވިއެވެ. މީގެ އިތުރުން ވެރިކަމުގެ ފުރަތަމަ ތިން އަހަރު ތެރޭގައި ރާއްޖޭގެ ހުރިހާ ރަށަކަށް ފެނާއި ނަރުދަމާގެ ހިދުމަތް ދިނުމުގެ މަސައްކަތް ފެށޭނެ ކަމަށާޢި، މިސަރުކާރުގެ ފަސް އަހަރު ނިމޭ އިރު ހުރިހާ ރަށަކަށް މި ހިދުމަތްތައް ފޯރުކޮށްދެވޭނެ ކަމަށް ވެސް ރައީސް ވިދާޅުވިއެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނު ރިޔާސީ އިންތިހާބު ކާމިޔާބު ކުރެއްވީ ކޯލިޝަންގެ ބުރަ މަސައްކަތުން ކަމަށެވެ. އަދި ކޯލިޝަންގެ އެއްވެސް ބޭފުޅަކަށް ނުވަތަ ޕާޓީއަކަށް ދެރަގޮތެއް ވިޔަ ނުދެއްވާނެ ކަމަށެވެ.
ރައީސް މިހެން ވިދާޅުވެފައިވީ ނަމަވެސް ކޯލިޝަންގެ ބައެއް ބޭފުޅުން ދަނީ ކުރިއަށް އޮތް މަޖިލީސް އިންތިހާބުގައި އިދިކޮޅު ކޯލިޝަނަށް ތާއިދުކުރަމުންނެވެ.
