ރަލުގެ ވިޔަފާރީގެ ފައިދާ ބޮޑުކަމަށް ވިދާޅުވެ، ކުރީގެ ރައީސް މުހައްމަދު ނަޝީދު ދެއްކެވި ވާހަކަފުޅަށް ރައްދު ދެއްވުމުން، ޑރ. މުހައްދު އިޔާޒް އަބްދުއްލަތީފަށް ވަރަށް ގިނަ އިންޒާރުތައް ލިބެމުން ދާކަމަށް އޭނާ ވިދާޅުވެއްޖެއެވެ.
އިޔާޒް ވިދާޅުވީ ވަކި ބޭފުޅަކު ވިދާޅުވީތީ އެއީ ހައްގު ބަހަކަށް ވާ އުސޫލެއް ނޯންނަކަމަށެވެ. އަދި ކޮންމެ މީހަކު ނަމަވެސް ގޯސްކޮށް އެއްޗެއް ބުނެފި ނަމަ ވާނީ ގޯހަކަށް ކަމަށް ވެސް އިޔާޒް ވިދާޅުވިއެވެ.
އއ. ތޮއްޑޫގައި ރޭ ބޭއްވި ކެންޕޭނު ޖަލްސާއެއްގައި ވާހަކަފުޅުދައްކަވަމުން ނަޝީދު ވިދާޅުވީ، ދުނިޔޭގައި އެންމެ ގިނައިން ވިކޭ އެއްޗަކީ ސެންޓާ ޗޮކުލެޓާ، ރާ އަދި ސިނގިރޭޓު ކަމަށެވެ. އަދި މި ތަކެތީގެ ވިޔަފާރީގެ ފައިދާ ބޮޑުކަމަށް ވެސް ނަޝީދު ވިދާޅުވިއެވެ.
"ދުނިޔޭގައި އެންމެ ގިނައިން ވިކޭ އެއްޗަކީ ސެންޓު. ދެން އެންމެ ގިނައިން ވިކޭ އެއްޗަކީ ޗޮކުލެޓާ ރަލާ ސިނގިރޭޓު. އަޅުގަނޑު މެންނަށް އެނގޭ މިއެއްޗެހިން ވިޔަފާރި ކުރީމާ އިންތިހާޔަށް ފައިދާ ބޮޑުވާނެކަން. މުއްސަނދި ވާކަން." ނަޝީދު ރޭ ވިދާޅުވިއެވެ.
ނަޝީދުގެ މި ވާހަކަފުޅަށް ރައްދު ދެއްވާ ޑރ.އިޔާޒް ވިދާޅުވީ، ނަޝީދު ފަތުރަމުން ގެންދާ ފިކުރުތަކަކީ އިންތިހާއަށް ނުރައްކާތެރި ފިކުރުތަކެއް ކަމަށާއި މި ނުރައްކަލުން ސަލާމަތްވުމަށް ކޮންމެ މީހަކުވެސް ފަރުދީ ޒިންމާ ނަގަން ޖެހޭކަމަށެވެ.
މިކަމާ ގުޅިގެން ޑރ.އިޔާޒްގެ އިތުރުން އެހެން ބައެއް ދީނީ އިލްމުވެރިންވެސް، ނަޝީދުއަށް ވަރަށް ބޮޑަށް ފާޑުވިދާޅުވެފައިވެއެވެ.
