ހެންވޭރު ދެކުނު ދާއިރާގެ ގެތަކުން، ކުރީގެ ރައީސް މުހައްމަދު ނަޝީދަށް ފުރިހަމަ މެހެމާން ދާރީއެއް އަދާކުރުމަށް، ދާއިރާގެ މެންބަރެއްގެ ހައިސިއްޔަތުން އިލްތިމާސް ކުރައްވާ ކަމަށް، މަޖިލިސް އިންތިޚާބުގައި ވާދަކުރައްވާ ހެންވޭރު ދެކުނު ދާއިރާގެ މެންބަރު މުހައްމަދު އަބްދުލްކަރީމް (ރުކުމާ) ވިދާޅުވެއްޖެއެވެ.
ރުކުމާ މިހެން ވިދާޅުވީ، ތޮއްޑޫ ދާއިރާއަށް ވާދަކުރާ އެމްޑީޕީގެ ކެންޑިޑޭޓް ހަސަން ޝިޔާންގެ ކެންޕޭން ޖަލްސާއެއްގައި، ރުކުމާގެ ނަން އަނބުރާ ގެންދެވުމަށް ގޮވާލައްވައި ނަޝީދު ދެއްކެވި ވާހަކަފުޅަށް ރައްދުދެއްވާ ރުކުމާ ކުރެއްވި ޓްވީޓެއްގައެވެ.
ނަޝީދު މިއަދު ވިދާޅުވީ، ރުކުމާގެ ނަން ވީހާވެސް އަވަހަކަށް އަނބުރާ ގެންދަވާނެ ކަމަށް އުއްމީދު ކުރައްވާ ކަމަށެވެ. އަދި އެ ދާއިރާއަށް ވާދަ ކުރައްވާނަމަ، ހެންވޭރުގެ ހުރިހާ ގެއަކަށް ވަޑައިގަންނަވާނެ ކަމަށާއި، މާ ރަނގަޅަށްވެސް އެ ދާއިރާ ކާމިޔާބު ކުރައްވާނެ ކަމަށް ވެސް ނަޝީދު ވިދާޅު ވިއެވެ.
"86 ދާއިރާގެ ތެރެއިން، މި ދެރަ އަހުލާގެއްގެ މި ފެނުނީ އެންމެ ކުއްޖެއް، އަޅުގަނޑު އުއްމީދު ކުރަން އަހުމަދު (ރުކުމާ) ވެސް ވީހާވެސް އަވަހަކަށް ނުކުންނަވާ އޭނާ އަލުން އަނބުރާ ރިވެތިގޮތަށް އެނބުރިއްޖެ ކަމަށް ބުނެ މި މަސައްކަތް އެތަނުގައި ނުކުރައްވާނެ ކަމަށް. ކުރައްވައިފިއްޔާ ހުރިހާ ހެންވޭރު ގެއަކަށް އަޅުގަނޑު ވަންނާނަން، އިރާދަ ކުރެއްވިއްޔާ އަޅުގަނޑު ދެން އެގޮނޑި މާ ބޮޑަށް ނަގާނަން" ނަޝީދު ވިދާޅުވިއެވެ.
ޕާޓީތަކުގެ، ޕްރައިމަރީން ބަލިވާ ކެންޑިޑޭޓުންނަށް އަމިއްލަ ގޮތުން އިންތިޚާބުގައި ވާދަ ކުރެވޭނެ ކަމަށް ސުޕްރީމް ކޯޓުން މިދިޔަ މަހުގެ ފަހުކޮޅު ކުރި ހުކުމަށް ފަހު ރުކުމާ ވަނީ، އެމްޑީޕީން ވަކިވެވަޑައިގެން އަމިއްލަ ގޮތުން، އިންތިހާބުގައި ވާދަ ކުރެއްވުމަށް ނިންމަވާފައެވެ.
މިކަމާ ގުޅިގެން، މީގެ ކުރިން ވެސް ނަޝީދު ވަނީ، ރުކުމާ އަހުލާގު ދަސްކުރެއްވުމަށް ގޮވާލައްވައި، ވަރަށް ބޮޑަށް އޭނާއަށް ފާޑުވިދާޅުވެފައެވެ.
އެމްޑީޕީގެ ޕްރައިމަރީން ބަލިވި މީހުންގެ ތެރެއިން ޖާބިރުވެސް އަމިއްލަ ގޮތުން ކާށިދޫ ދާއިރާއަށް ކުރިމަތި ލައްވައެވެ. ރައީސް ނަޝީދު ޖާބިރަށް ފާޑު ވިދާޅުނުވާތީ ގިނަބަޔަކު އެކަން ދަނީ ފާހަގަ ކުރަމުންނެވެ.
