އަތްފޯރާ ފަށުގައި ބޯހިޔާވަހިކަން ފޯރުކޮށްދިނުމަށް ސަރުކާރުން ވެފައިވާ ވައުދު، ފުއްދުމަށްޓަކައި ރައީސް އިބްރަހީމް މުހައްމަދު ސާލިހު، ކުންފުންޏެއް އުފައްދަވައިފިއެވެ.
"ފަހި ދިރިއުޅުން ކޯޕަރޭޝަން ލިމިޓެޑް"ގެ ނަމުގައި ރައީސް ކުންފުންޏެއް އުފެއްދެވީ، ބޯހިޔާވަހިކަމުގެ ވައުދު ފުއްދެވުމަށްޓަކާ، އެކަމަށް ޚާއްޞަކޮށްފައިވާ ކުންފުންޏެއް ގާއިމުކުރުމަކީ މުހިއްމުކަމެއެގެ ގޮތުގައި އެމަނިކުފާނު ދެކިވަޑައިގަންނަވާތީ ކަމަށް ރައީސް އޮފީހުން ބުނެއެވެ.
މިއަދު ރައީސް އުފެއްދެވި ކުންފުނީގެ މަސްއޫލިއްޔަތު ތަކުގެ ތެރޭގައި، ސަރުކާރުން ފޯރުކޮށްދޭ ބޯހިޔާވަހިކަމުގެ މަޝްރޫޢުތައް އެއްފުރާޅެއްގެ ދަށުން ހިންގުމާ، ބޯހިޔާވަހިކަމާއި ގުޅޭގޮތުން ހިންގޭ މަޝްރޫޢުތައް ކުރިއަށް ގެންދިއުމާ، އަތްފޯރާފަށުގައި ބޯހިޔާވަހިކަން ފޯރުކޮށްދިނުމާ، މާލީ ހާލަތު ދަށް ފަރާތްތަކަށް ސަބްސިޑައިޒް ރޭޓެއްގައި ބޯހިޔާވަހިކަން ފޯރުކޮށްދިނުން އަދި އަލަށް ގެދޮރު ގަންނަން ބޭނުންވާ ފަރާތްތަކަށް މާލީ އެހީތެރިކަން ފޯރުކޮށްދިނުމަށްޓަކައި ކުރަންޖެހޭ އެންމެހައި މަސައްކަތްތައް ކުރުން ހިމެނެއެވެ.
