ސަރުކާރުގެ މަސް ކުންފުނި މިފްކޯއިން ލިޔެކިޔުން ނެތި ނުވަތަ ވީނުވީއެއް މިހާތަނަށްވެސް އެނގިފައި ނުވާ އެތައް މުއާމަލާތެއް ހިންގާފައި އެބަހުރި ކަމަށް އެކުންފުނީ ސީއީއޯ އިސްމާއީލް ފައުޒީ ވިދާޅުވެއްޖެއެވެ.
"ދަޕްރެސް" އަށް ދެއްވި ބަސްދީގަތުމެއްގައި ފައުޒީ ވިދާޅުވީ މިފްކޯއިން އާންމުކޮށް ވިއްކާ މަސްދަޅުތަކުންވެސް ވީ ނުވީއެއް ނޭނގޭ ގޮތަށް ނުވަތަ ލިޔެކިޔުން ފެންނަން ނެތް މުއާމަލާތް ކޮށްފައި އެބަހުރި ކަމަށެވެ. އަދި ކުންފުނިން އެކި ކަންކަމަށް ހަރަދު ކުރުމުގައިވެސް ހަރުދަނާ އުސޫލުތަކެއް ނެތި ހަރަދު ކޮށްފައި އެބަހުރި ކަމަށާ ލިބިފައިވާ މާލީ ގެއްލުން ދެނެގަތުމުގެ މަސައްކަތް ކުރައްވަމުން ގެންދަވާ ކަމަށެވެ.
"މަސްދަޅު ދިނުމުގައި ކޮރަޕްޝަނަށް މަގު ފަހިވާގޮތަށް އެބަހުރި ކަންކޮށްފައި، އެއަށް މިފްކޯއަށް ލާރިވެސް ނުލިބޭ" ފައުޒީ ވިދާޅުވިއެވެ. ފައުޒީ އިތުރަށް ވިދާޅުވީ އޭގެ ތެރެއިން ބައެއް މަސްދަޅުތަކަށް ވާ ފައިސާ ހޯދުމުގެ މަސައްކަތް މިހާރު ގާނޫނީ މަރުހަލާގެ ތެރެއިން ކުރެވެމުން ދާ ކަމަށެވެ. އެގޮތުން ކޯޓު އަމުރަކާ އެއްގޮތަށް ބައެއް ފައިސާ ލިބެމުން ދާ ކަމަށާ ނަމަވެސް ބައެއް މަސްދަޅު ދޫކޮށްފައި ހުރި ގޮތުގެ އެއްވެސް ލިޔެކިޔުމެއްވެސް ފެންނަން ނެތް ކަމަށެވެ.
"މަދުމަދުން މިހެން ފައިސާ ލިބުނަސް، ޖުމްލަ ގޮތެއްގައި އެއްގޮތަކަށްވެސް ނުލިބޭ އެއްޗެހި އެބަހުރި" ފައުޒީ ވިދާޅުވިއެވެ.
ފައުޒީ ވިދާޅުވީ އެއްގޮތަކަށްވެސް ރިކަވާ ނުކުރެވޭ އެއްޗެހީގެ ފުރިހަމަ މައުލޫމާތު ދެނެގަތުމަށްޓަކައި އޮޑިޓެއް ކުރައްވަމުން ގެންދަވާ ކަމަށެވެ. އަދި ޗެލެންޖަކީ އޮޑިޓަށްފަހުވެސް ލިޔެކިޔުން ނެތި ކޮށްފައި ހުރި މުއާމަލާތްތައް ދެނެ ނުގަނެވިދާނެތީ ކަމަށެވެ.
މިފްކޯއާ ފައުޒީ ހަވާލުވެވަޑައިގަތުމުގެ ކުރިން މިފްކޯ އޮތީ ވަރަށް ބޮޑަށް ސިޔާސީ ވެފައި ކަމަށް ގިނަ ބަޔަކު ވާހަކަ ދެއްކިއެވެ. އެއީ އޭރު މިފްކޯގެ އެމްޑީއަކަށް ހުންނެވީ ރައީސް ޔާމީނުގެ ކެމްޕޭން މެނޭޖަރު ކަމަށް ވާތީއެވެ.
މިފްކޯގެ ދަޅުމަހުގެ 250 ކޭސް ކޮރަޕްޝަނަށް މަގުފަހިވާގޮތަށް ދޫކުރި މައްސަލައެއް 2013 ވަނަ އަހަރު އޭސީސީވެސް ބަލާފައިވެއެވެ.
