ޕްރޮގްރެސިވް ކޯލިޝަނުން މަސައްކަތް ކުރަމުން ދަނީ މުޒާހަރާގެ މަގު ދޫކޮށް އެހެން މަގުތަކުން، ކުރީގެ ރައީސް އަބްދުﷲ ޔާމީން ހައްޔަރު ކުރި މައްސަލަ އަށް ހައްލު ހޯދުމަށް ކަމަށް، ޕީޕަލްސް ނޭޝަނަލް ކޮންގްރެސް(ޕީއެންސީ) ގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.

ޕްރޮގްރެސިވް ކޯލިޝަންގެ ފަރާތުން މިއަދު ބޭއްވި ނޫސްވެރިންގެ ބައްދަލު ވުމެއްގައި އަދުރޭ ވިދާޅުވީ، ޔާމީން ހައްޔަރު ކުރުމާ ގުޅިގެން މުޒާހަރަ ނުކުރައްވަނީ، އެނޫން ގޮތްގޮތުން ހައްލު ހޯއްދެވުމަށް ކަމަށެވެ. އެކަމަކު އެކި ގޮތްގޮތުން މަސައްކަތް ކުރައްވައިގެން މިހާތަނަށް އައި އިރު ވެސް އެ ކަމަށް ހައްލެއް ލިބިފައި ނުވާކަމަށް އޭނާ ވިދާޅުވިއެވެ.

އަދުރޭ މިއަދު ވިދާޅުވީ، ޔާމީންގެ ސިއްހީ ހާލު ކޮޅާ ގުޅޭ ގޮތުން، އިތުރަށް ހަދަންޖެހޭ ޓެސްޓު ތަކަކީ ރާއްޖެއިން ހެދޭނެ ޓެސްޓު ތަކެއް ނޫން ކަމަށް މިއަދު ޑޮކްޓަރު ލިޔުން ދެއްވާފައިވާކަމަށެވެ. އަދި މިހިސާބަށް ދިޔަ އިރުވެސް އެއްވެސް އަލިމަގެއް ފެނިވަޑައި ނުގަންނަވާ ކަމަށާއި އެކަމުގައި ވަޑައިގަންނަވަންޖެހޭ ހުރިހާ ތަނަކަށް ވަޑައިގެންފާ ވާނެކަމަށެވެ.

އެގޮތުން އަދުރޭ ވިދާޅުވީ، އެ މައްސަލައަށް ހައްލު ލިބުން ވަރަށް އަވަސް ވާނެ ކަމަށާ، ލަހެއް ނުވާނެ ކަމަށް ވިދާޅުވެ، ރާއްޖޭގެ ވަރަށް ބޮޑެތި ބޭފުޅުންވެސް މުއާމަލާތް ކުރައްވައިފައިވާކަމަށެވެ. އެހެން ނަމަވެސް، އެ ގޮތަށް ވިދާޅުވިތާ 10 ވަރަކަށް ދުވަސް ފާއިތުވެގެން ދާއިރުވެސް އަލިމަގެއް ފެނިޑައިގެންފައި ނުވާ ކަމަށެވެ.

އަދުރޭ އިތުރަށް ވިދާޅުވީ، 'ޕާޓީ ޓޯކްސް' އަށް ވެސް ރައީސް އޮފީހުގައި މިހާރު އެދިވަޑައިގެންފައި ވާނެ ކަމަށެވެ. އަދި އެކަމަށް 15 ދުވަސް ފާއިތުވެގެން ދިޔަ އިރުވެސް، ޖަވާބެއް ލިބިވަޑައިގެންފައި ނުވާކަމަށް އަދުރޭ ވިދާޅުވިއެވެ.

މީގެ އިތުރުން އަދުރޭ ވިދާޅުވީ، ހޯމް މިނިސްޓަރު ޝެއިން އިމްރާނާވެސް ވާހަކަ ދެއްކެވުމަށް މަސައްކަތް ކުރައްވާފައި ވާނެ ކަމަށެވެ. ފޯނުން، އެމަނިކުފާނަށް އެއްދުވަހު ގުޅުއްވުނު ކަމަށާއި، އެމަނިކުފާނު އޭރު ވިދާޅުވީ، ރާއްޖޭގެ ކޮންމެވެސް އަތޮޅެއްގައި ހުންނެވި ކަމަށާއި، މާލެ ވަޑައިގެން ބައްދަލުކުރައްވަން ވަގުތު ދެއްވާނެ ކަމަށެވެ. އޭގެ ފަހުން މިހާރު 3 ދުވަސް ވެގެން ގޮސްފައި ވާއިރު، އަދުރޭއަށް ގުޅުއްވާފައި ނުވާ ކަމަށާއި، ފޯނުވެސް ނުނަންގަވާ ކަމަށް އަދުރޭ ވިދާޅުވިއެވެ.

އަދި ކުރީގެ ރައީސް މުހައްމަދު ނަޝީދަށް ވެސް މިކަމާ ގުޅިގެން 3 ފަހަރަށް ގުޅުއްވާފައި ވާނެ ކަމަށާއި، އެރޭ ނަޝީދު ވިދާޅުވީ ކެންޕޭނު ދަތުރެއްގައި އައްޑޫގައި ހުންނެވި ކަމަށާއި، ފަހުން ގުޅުއްވާނެ ކަމަށް ވިދާޅުވި ކަމަށެވެ. އެކަމަކު ނަޝީދު އަދި ގުޅުއްވާފައި ނުވާކަމަށް އޭނާ ވިދާޅުވިއެވެ.

މިއަދުގެ ނޫސްވެރިންގެ ބައްދަލު ވުމުގައި އަދުރޭ ވިދާޅުވީ، ޕީޕީއެމްގެ ވެރިކަމުގައި ހައްޔަރުކުރި، ކުރީގެ ރައީސް ނަޝީދުއާ، ޖުމްހުރޫ ޕާޓީގެ ލީޑަރު ގާސިމް އިބްރާހީމާއި، ދިއްގަރު ދާއިރާގެ ކުރީގެ މެންބަރު އަހްމަދު ނާޒިމް އަދި ކުރީގެ ޑިފެންސް މިނިސްޓަރު ކާނަލް ރިޓަޔާޑް މުހައްމަދު ނާޒިމް ވެސް ޑޮކްޓަރުގެ ލިޔުން ދެއްވުމުން އޭރުގެ ސަރުކާރުން ބޭރަށް ފޮނުވާފައި ވާނެކަމަށެވެ. އެހެންކަމުން، މިއަދުވެސް އެހެން އެކަންތައް ކުރައްވަން ޖެހިވަޑައިގަންނާވާނެކަން، ރައީސް އިބްރާހީމް މުހައްމަދު ސޯލިހުއަށް ވެސް އެނގިވަޑައިގަންވާނެ ކަމަށް އޭނާ ވިދާޅުވިއެވެ.

ސިޔާސީ