މި ފަހަރުގެ ރައްޔިތުންގެ މަޖިލިސް އިންތިހާބަކީ، ބަދުރު ހަނގުރާމަ ކަހަލަ ހަނގުރާމައެއް ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.

ޕްރޮގްރެސިވް ކޮންގްރެސް އިން މިއަދު ބޭއްވި ނޫސްވެރިންގެ ބައްދަލުވުމުގައި އަދުރޭ ވިދާޅުވީ، މި ފަހަރުގެ ރައްޔިތުންގެ މަޖިލީސް އިންތިހާބު މީ ސަމާސާއެއް ނޫންކަމަށާއި، މި ނިކުންނަނީ ވަރަށް ބިރުވެރި ނުރައްކާތެރި ހަނގުރާމައަކަށް ކަމަށެވެ. އަދި މަޖިލިސް އިންތިހާބަކީ، މި ގައުމުގައި އޮންނަންޖެހޭނީ އިސްލާމް ދީންތޯ ނުވަތަ ނޫންތޯ ނިންމަން ކުރާ ހަނގުރާމައެއް ކަމަށްވެސް އޭނާ ވިދާޅުވިއެވެ.

އަދުރޭ މިހެން ވިދާޅުވެފައި މިވަނީ، ޖަރުމަނުވިލާތުގެ ބާލިންގައި ކުރިއަށްދާ ފަތުރުވެރިކަމުގެ ފެއާ، އައިޓީބީގައި ދިވެހި ބަހުން ތައްޔާރު ކޮށްފައި ހުރި ކްރިސްޓިއަން ދީނުގެ ފޮތްތަކެއް ބެހުމާ ގުޅިގެންނެވެ. އޭނާ ވިދާޅުވީ، މި ފެއާގައި ރާއްޖޭގެ ނައިބު ރައީސް ފައިސަލް ނަސީމް ވެސް ބައިވެރިވެ ވަޑައި ގަންނަވާ ކަމަށާ، ނަމަވެސް މި ކަމާ ގުޅިގެން ސަރުކާރުން އެއްވެސް އެއްޗެއް ނުބުނާ ކަމަށެވެ.

"ފައިސަލް ވީ ނޫންތޯ އެތާ ހުރެގެން އިންޓަވިއު ދެއްވަން، ނޫނީ އެކަން ހުއްޓުވަން، ކޮންމެވެސް ބަޔަކު ގައިމު އޭގެ އަޑީގަ ތިބެގެންތާ ގައިމު ދިވެހި ބަހުންނޭ އެ ފޮތްތައް ލިޔެފަ ހުރީ" އަދުރޭ ވިދާޅުވިއެވެ.

މި ކަމާ ގުޅިގެން އަދުރޭ އިތުރަށް ވިދާޅުވީ، އެމްޑީޕީ އަށް ބާރު ލިބިއްޖެނަމަ މި ގައުމު ހަލާކު ކޮށްލާނެ ކަމަށް ކުރިންވެސް އޭނާ ތަކުރާރުކޮށް ވިދާޅުވެފައި ވާނެކަމަށެވެ. އަދި މި ގައުމުގައި ދިނީ ހިޔާލު ތަފާތު އުފެދުމަށްވުރެ ނުރައްކާތެރި އެއްވެސް ކަމެއް ނޯންނާނެ ކަމަށްވެސް އަދުރޭ ވިދާޅުވިއެވެ.

މި ދުނިޔޭގެ ގައުމުތައް ބައިބައި ކުރުމަށް ބޭނުންކުރާ އެންމެ ވަރުގަދަ އެއްކަމަކީ، ދީނީ ބައިބައިވުން އުފެއްދުން ކަމަށް ވެސް، މިއަދު އަދުރޭ ވިދާޅުވިއެވެ. އަދި ހުޅަނގުގެ ގައުމުތަކުން އައިސް އެހީތެރިވެގެން މިހާތަނަށް އެއްވެސް ގައުމަކަށް ހަމަޖެހުން އައިސްފައި ނުވާކަމަށް ވެސް އޭނާ ވިދާޅުވިއެވެ.

އަދުރޭ އިތުރަށް ވިދާޅުވީ ކުރީގެ ރައީސް މުހައްމަދު ނަޝީދަކީ އިސްލާމް ދީނުގެ [އަދުއްވެއް] ކަމަށާ، މިނިވަންކަމާ ދެކޮޅު ބޭފުޅެއް ކަމަށެވެ. އަދި އެއީ އިސްލާމް ދީން މި ގައުމުން ފުހެލަން މަސައްކަތް ކުރަމުން ގެންދަވާ ބޭފުޅެއް ކަމަށާ އެމަނިކުފާނަށް ތާއިދު ކުރާ ކޮންމެ މީހަކީ ވެސް އޭގެ މީހެއް ކަމަށް ވެސް އަދުރޭ ވިދާޅުވިއެވެ.

މީގެ އިތުރުން އަދުރޭ ވިދާޅުވީ، އޭނާ މި ވާހަކަ ވިދާޅުވުމުގެ ސަބަބުން ކޮންމެ ތާކަށް ގެންދިޔައަސް ފަރުވާލެއް ނެތްކަމަށާ، ޖަލަށް ދާން ޖެހުނަސް ދާނީ އުފަލުން ހެމުން ކަމަށެވެ. އަދި މި ގައުމުގެ ހައްގުގައި މުޅި އުމުރު އޮންނަން ޖެހުނަސް ކަންބޮޑުވެވަޑައި ނުގަންނަވާ ކަމަށްވެސް އޭނާ ވިދާޅުވިއެވެ.

ސިޔާސީ