ޖުމްހޫރީ ޕާޓީގެ ރައީސް އަދި މިހާރުގެ ޓޫރިޒަމް މިނިސްޓަރު އަލީ ވަހީދު، ރައީސް ޔާމީންގެ ފިކުރަށް ތާއީދު ނުކުރުމަށް ނިންމެވި ނިންމެވުމަށް، ކުރީގެ ރައީސް މައުމޫން އަބްދުލްގައްޔޫމް ޝުކުރު ދަންނަވައިފިއެވެ.
މިކަމާ ގުޅޭ ގޮތުން މައުމޫން މިއަދު ކުރެއްވި ޓުވީޓެއްގައި ވަނީ، އަލީ ވަހީދަށް ޝުކުރު އަދާ ކުރައްވާ، އެ ނިންމެވުމާ މެދު އުފާ ކުރައްވާ ކަމަށް ވިދާޅުވެފައެވެ.
އަލީ ވަހީދު ވިދާޅުވީ، އޭނާ މާތް ﷲ ގަންދީ ހުވާ ކުރައްވައިގެން ހުންނެވީ ދިވެހި ރައްޔިތުންނަށާއި ގައުމަށް، އަދި ރައީސް އިބްރާހީމް މުހައްމަދު ސާލިހަށް އިހުލާސްތެރިވެ ވަޑައިގަތުމަށް ކަމަށެވެ. އަދި އެމްޑީޕީ އާއި އިސްލާހީ މަސައްކަތުގައި ގުރުބާންވި ޖެޕީ، އޭޕީ އަދި އެމްއާރުއެމްގެ މީހުން ދޫކޮށް ޕީޕީއެމާއި ޕީއެންސީގެ ފިކުރާއެކު ވަޑައި ނުގަންނަވާނެ ކަމަށެވެ. އަދި ސަރުކާރު ދިފާއު ކުރެއްވުމުގައި ސާބިތުވެ ހުންނަވާނެ ކަމަށްވެސް އޭނާ ވިދާޅުވެއެވެ.
އޭނާ މިހެން ވިދާޅުވެފައި މިވަނީ ޕްރޮގްރެސިވް ކޯލިޝަނުން މަޖިލީހަށް ވާދަކުރާ ކެންޑިޑޭޓުންނަށް ތާއީދު ކުރައްވާނެ ކަމަށް ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ ރައީސް ގާސިމް އިބްރާހީމް ރޭ އިއުލާނު ކުރެއްވުމާ ގުޅިގެންނެވެ.
ޖޭޕީން ރޭ ވަނީ އެ ޕާޓީން ވާދަ ކުރާ 32 ދާއިރާ ފިޔަވާ، ޕްރޮގްރެސިވް ކޯލިޝަނުން ވާދަކުރާ 32 ދާއިރާއަށާއި އެމްޑީއޭގެ ފަރާތުން ވާދަ ކުރާ ހަތަރު ދާއިރާއަށް ތާއީދު ކުރުމަށް ނިންމާފައެވެ. މީގެ އިތުރުން ޖޭޕީގެ 36 ކެންޑިޑޭޓަކަށް ތައީދު ކުރުމަށް އިދިކޮޅު ކޯލިޝަނުން ވެސް ނިންމާ އެކަން ވަނީ އިއުލާންކޮށްފައެވެ.
