ކުރީ ސަރުކާރުގެ ޑިފެންސް މިނިސްޓަރުކަން ކުރެއްވި ކާނަލް ރިޓަޔާޑް މުހައްމަދު ނާޒިމްގެ ނަމުގައި އޮންނަ “ނާޒިމް އަފާފު ފައުންޑޭޝަނުން” ރައްޔިތުންގެ މަޖިލީހުގެ 2019ގެ އިންތިޚާބާ ދިމާކޮށް، ދަނގެތީ ދާއިރާގެ ރަށްރަށަށް ވަކިކަންތައްތަކެއް ކޮށްދޭނެ ކަމަށް ބުނަމުންދާތީ، އެމައްސަލަ އެންޓި ކަރަޕްޝަން ކަމިޝަން (އޭސީސީ) އަށް ހުށައެޅުމަށް، އިލެކްޝަންސް ކަމިޝަން (އީސީ) އިން ލަފާ ދީފައި ވާކަމަށް، ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީއިން) މިއަދު ބުނެފިއެވެ.
އަދި، އީސީން މިހެން ބުނެފައިވަނީ ދަނގެތީ ދާއިރާއަށް، ޖުމްހޫރީޕާޓީން ކުރިމަތިލެއްވި ކެންޑިޑޭޓް، ނާޒިމް އާ ގުޅުން ހުރި މި މައްސަލަ، ބުރާސްފަތި ދުވަހު އެމްޑީޕީން ހުށައަޅާފައިވާތީ އެކަމުގެ ޖަވާބެއްގެ ގޮތުން އެޕާޓީއަށް އީސީއިން ފޮނުވި ސިޓީއެއްގައި ކަމަށް އެމްޑީޕީއިން މައުލޫމާތު ދެއެވެ.
އެމްޑީޕީން އީސީއަށް މި މައްސަލަ ހުށައަޅާފައިވަނީ، ކެނޑިޑޭޓް މުޙައްމަދު ނާޒިމުގެ ކެމްޕޭނު ވައިބާ ގްރޫޕް ކަމަށްވާ "ދަނގެތި2019" ގައި، ދަނގެތީ ކައުންސިލަރު ރަމްޒީ ލިޔުނު ޕޯސްޓެއްގައި، ދަނގެތީ ހަނދުރުނބާ ގިޑިގޭގެ ހުރިހާ ޚަރަދެއް ފަންޑު ކޮށްދިނީ ނާޒިމް އަފާފް ފައުންޑޭޝަނުން ކަމުގައި ބުނާތީ ކަމަށް، އެ ޕާޓީން ބުނެއެވެ.
އަދި މައްސަލައިގެ ޖަވާބުގައި، މައްސަލައަކީ ރިޝްވަރުގެ މައްސަލައަކަށް ވާތީ މި މައްސަލަ އޭސީސީއަށް ފޮނުވުމަށާއި، އިންތިޚާބުތަކާ ގުޅިގެން ހުށަހެޅޭ ރިޝްވަތާބެހޭ މައްސަލަތައް ބަލާ ތަޙްޤީޤު ކުރާނީ އޭސީސީއިން ކަމަށް، މިދިޔަ އަހަރު ޤާނޫނަށް ގެނައި އިޞްލާޙުގައި ބަޔާންކޮށްފައި ވާކަމަށް އީސީން ބުނެފައި ވާކަމަށް ވެސް އެމްޑީޕީއިން ބުނެއެވެ.
މީގެ އިތުރުން އެމްޑީޕީން ބުނީ، މި މައްސަލަ އޭސީސީއަށް ހުށައެޅުމަށް އެ ޕާޓީއިން ގަސްތުކުރާ ކަމަށެވެ.
