އަމިއްލަ ގޮތުން ވާދަކުރަން ނިންމުމުން، ކުރީގެ ހޯމް މިނިސްޓަރު އަޒްލީން އަހުމަދު ޕީޕީއެމުން ވަކިކުރަން އެ ޕާޓީގެ ސްލޫކީ ކޮމިޓީން ނިންމައިފިއެވެ.
އަޒްލީން ޕާޓީން ވަކިކުރަން ނިންމާފައިވަނީ، ޕީޕީއެމާއި ޕީއެންސީ ގުޅިގެން އުފައްދާފައިވާ ޕްރޮގްރެސިވް ކޯލިޝަނުން ހުޅުމާޅެ ދާއިރާއަށް ކެންޑިޑޭޓަކު ނެރެފައި ވަނިކޮށް، އެ ދާއިރާއަށް އަމިއްލަގޮތުން ވާދަކުރައްވަން ނިންމެވުމުންނެވެ. ޕީޕީއެމްގެ ސްލޫކީ ކޮމިޓީން މިދިޔަ ހުކުރު ދުވަހު އަޒްލީންގެ މައްސަލަ ބެލުމަށްފަހު ނިންމާފައިވަނީ އޭނާ ޕާޓީގެ އަސާސްތަކާއި ހިލާފުވެވަޑައިގެންފައިވާ ކަމަށެވެ.
އަޒްލީން އަމިއްލަ އަށް ވާދަކުރަން ނިންމެވި ހުޅުމާލެ ދާއިރާއަކީ، ޕީއެންސީގެ ވަގުތީ ރައީސް އަބްދުއްރަހީމް އަބްދުﷲގެ ދަރިކަލުން އިބްރާހީމް ފައިސަލް ޕީޕީއެމްގެ ޓިކެޓްގައި ވާދަކުރާ ދާއިރާއެވެ. އަދި އަޒްލީން ޕީޕީއެމުން ވަކިކުރަން ނިންމީ މި ސަބަބާހެދި ކަމަށް މައުލޫމާތު ލިބެއެވެ.
ޕީޕީއެމްގެ ސުލޫކީ ކޮމިޓީން އަޒްލީންގެ މައްސަލަ ބެލުމަށްފަހު ފޮނުވި ސިޓީގައި ބުނެފައިވަނީ، ޕްރޮގްރެސިވް ކޯލިޝަނުން ފެބްރުއަރި 1 ގައި ހަދާފައިވާ އެއްބަސްވުމާ ހިލާފުވެފައިވާ ކަމަށެވެ.
"ޕީޕީއެމް އާއި ޕީޕަލްސް ނޭޝަނަލް ކޮންގްރެސް އާއި ދެމެދު 1 ފެބްރުއަރީ 2019 ގައި ހަދާފައިވާ އެއްބަސްވުމާއި އަޒްލީން ހިލާފުވެފައިވާކަން ވަނީ ސާބިތުވެފައެވެ. އެގޮތުން ސުލޫކީ ކޮމެޓީގެ އަގްލަބިއްޔަތުން އަޒްލީން އަހުމަދު ޕާޓީން ވަކިކޮށްދިނުމަށް އެދި، ޕާޓީގެ ސެކްރެޓަރީ ޖެނެރަލަށް ސުލީކީ ކޮމެޓީގެ ފަރާތުން މައްސަލަ ހުށަހަޅަމެވެ" ސުލޫކީ ކޮމިޓީން ފޮނުވި ސިޓީގައިވެއެވެ.
އަޒްލީން ޕީޕީއެމުން ވަކިކުރަން ނިންމި އިރު، އޭނާއަކީ ޕީޕީއެމްގެ ކައުންސިލް މެންބަރެއްވެސްމެއެވެ. އޭނާ އަމިއްލަ ގޮތުން ވާދަކުރައްވަން ނިންމެވީ ރައްޔިތުންގެ މަންދޫބެއްގެ ގޮތުގައި ހުންނަވަންކަމަށް އޭނާ ވަނީ ކުރިން ހާމަކުރައްވާފައެވެ.
ތިޔައީ މާ ބޮޑަށް ވެސް ލަސް ވެއްޖެ ކަމެއް ޔާމީން ސަރުކާރު ހަލާކު ކުރި އެކަކު.