ޝަރީއަތް ނިމެންދެން ޖަލުގައި ބަހައްޓަވާފައި ހުންނެވި ކުރީގެ ރައީސް އަބްދުﷲ ޔާމީން ވަގުތުން ދޫކޮށްލުމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ގޮވާލައްވައިފިއެވެ.
ޔާމީން ވަގުތުން މިނިވަން ކުރުމަށް ގާސިމް ގޮވާލައްވާފައި ވަނީ، ސިއްހީ ހާލުކޮޅު ހުރި ގޮތުން، ތިން ފަހަރެއްގެ މަތިން ޔާމީން އައިޖީއެމްއެޗަށް ގެންގޮސް ފަރުވާ ދީފައިވަނިކޮށެވެ. ޔާމީން ވަގުތުން މިނިވަން ކުރުމަށް ގާސިމް ގޮވާލައްވާފައި ވަނީ، އިދިކޮޅު ޕީޕީއެމް އަދި ޕީއެންސީ ކޯލިޝަންގެ ބައެއް މެންބަރުން ބައިވެރިވެވަޑައިގެންނެވި، ޖޭޕީގެ ކެންޑިޑޭޓް އަލްހާން ފަހުމީގެ ކެމްޕޭން އިވެންޓެއްގައެވެ.
ޔާމީން ވާނުވާގައި ނުބަހައްޓާ ދޫކޮލުމަށް ގޮވާލައްވައި، ގާސިމް ވިދާޅުވީ މި ސަރުކާރުން ވެރިކަމާއި ހަވާލުވީ ސިޔާސީ މީހުންނާއި، ކުރީގެ ރައީސުން ޖަލަށްލުމާ ދެކޮޅަށް ވާހަކަ ދެއްކުމަށް ފަހުގައި ކަމަށެވެ. ނަމަވެސް، މިއަދު އެނަމުގައި ތޮފި އަޅައިގެން ތިބެ، ސަރުކާރުން އަމަލުކުރަމުން ދަނީ ވެރިކަމަށް ވަޑައިގެންނެވުމަށް ވި ވައުދުތަކާ ހިލާފަށް ކަމަށެވެ.
"އިންޓެލިޖަންސް ރިޕޯޓެއްގެ މައްޗައް ބިނާކޮށް ކުރީގެ ރައީސަކު ހައްޔަރެއް ނުކުރެވޭނެ. އަޅުގަނޑު ގޮވާލަން ބޭނުންވަނީ އަބްދުﷲ ޔާމީން އަބްދުލް ގައްޔޫމް ވާނުވާ ޖަހާފަ ޖަލުގައި ނުބޭންދޭނޭ ދޫކުރައްވާށޭ މިހާރުން މިހާރަށް. އަނިޔާވެރި ނުވާނަމޭ ކިޔާފަ އެ ތޮފި އަޅައިގެން ތިބެ، ރައީސް އަބްދުﷲ ޔާމީން ޖަލަށްލައިފި. ނުކުރެވޭނެ އެކަމެއް، ދޫކޮށްލަން ޖެހޭނީ، އަދުލު އިންސާފު ލިބެން ޖެހޭނީ ހުރިހާ އެންމެންގެ މައްޗައް ހަމަހަމަކޮށް" ގާސިމް ވިދާޅުވިއެވެ.
ގާސިމް ވިދާޅުވީ އިންސާފުވެރި ޝަރީއަތެއް ޔާމީންގެ މައްޗަށް ހިންގެން ޖެހޭނެ ކަމަށާއި، ޝަރީއަތް ނުކޮށް ޖަލުގައި ނުބެހެއްޓޭނެ ކަމަށެވެ. ނަމަވެސް، ޔާމީންގެ މައްޗަށް އިންސާފުވެރި ޝަރީއަތެއް ކޮށް އެމަނިކުފާނުގެ މައްޗަށް ކުށް ސާބިތުވެއްޖެ ނަމަ ޔާމީން ޖަލަށް ލުމުގައި މައްސަލައެއް ނެތްކަމަށް ގާސިމް ވިދާޅުވިއެވެ.
"ރަނގަޅަސް ނުބަޔަސް ގައުމަށް އެހާ ބޮޑެތި ހިދުމަތްތަކެއް ކޮށްފައި ގައުމުގެ އެންމެ މަތީ ވެރިކަން ކޮށްފައި ތިބޭ ބޭފުޅުން އެގޮތަށް ރަހުމެއް ނެތި ހަމްދަރުދީއެއް ނެތި ހައްޔަރު ކޮށްގެން ނުވާނެއޭ އަޅުގަނޑު މި ދަންނަވަނީ. މިނިވަން ކަމޭ ބުނެގެން އައިސް އަޅުގަނޑުމެންގެ އަހުންނާއި އުހުތުން އެގޮތަށް ޖަލަށް ލައިގެން ނުވާނެ" ގާސިމް ވިދާޅުވިއެވެ.
ކޯލިޝަން ތެރޭގައި މައްސަލަ އުފެދިފައި ވާއިރު، ގާސިމް ގެންދަވަނީ ސަރުކާރަށާއި، ވެރިކަން ކުރާ މައި ޕާޓީ އެމްޑީޕީއާއި، ކުރީގެ ރައީސް މުހައްމަދު ނަޝީދަށް ވެސް ވަރަށް ވަރަށްބޮޑަށް ފާޑު ވިދާޅުވަމުންނެވެ. ގާސިމް ވަނީ އޭނާ ދައްކަވާ ވާހަކައަކުން އޭނާ މިހާރު ވެސް ހައްޔަރުކޮށްގެން ގެންގޮސްފާނެ ކަމަށް ވިދާޅުވެފައެވެ. ނަމަވެސް ދައްކަވަން ޖެހިވަޑައިގަންނަވާ ވާހަކައެއް ޖެހިލުމެއް ނެތި ދައްކަވާނެކަމަށް އޭނާ ވިދާޅުވިއެވެ.
ގާސިމްއަށް ހެޔޮވިސްނޭ. މުއްދަތެއް ނެތް ގޮތައް މީހުން ބަންދުކުރުން ހުއްޓާލަން ޖެހޭ! އެއީ އިންސާފެއް ނޫން. އަދަބު ލިބެންޖެހޭނީ އޮންނަ އުސޫލެއް އޮވެ ކަނޑައެޅޭ ހަމަތަކެއްގެ މަތިން. ހަމަ ތިގޮތައް އުމުރު ދުވަހުވެސް މީހަކު ޖަލުގައި ބޭންދިދާނެ. އެއީ އިންސަަފެއް ނޫން. ޝަރީއަތްތައް އަވަސް ކުރަންޖެހޭ!