ކުރީގެ ރައީސް އަބްދުﷲ ޔާމީން ގެ އަރިހުގައި މީހަކުނެތި އެންމެ ހިނދުކޮޅަކު ވެސް ނުބަހައްޓަން، ޑޮކްޓަރުން ވަރަށް ބޮޑަށް ލަފާދީފައި ވާކަމަށް، ޕީޕަލްސް ނޭޝަނަލް ކޮންގްރެސް ޕާޓީ (ޕީއެންސީ) ގެ ރައީސް އަބުދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
ޕްރޮގިރެސިވް ޕާޓީ އޮފް މޯލްޑިވްސް (ޕީޕީއެމް) އަދި ޕީއެންސީ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި އަދުރޭ ވިދާޅުވީ، ރައީސް ޔާމީން އަލުން ޖަލަށް ބަދަލު ކޮށްފައި ވަނީ، ޑޮކްޓަރުން އެހެން ނުހެދުމަށް ލަފާދީފައި ވަނިކޮށް ކަމަށެވެ.
އެކަމާ ގުޅިގެން އަދުރޭ ވިދާޅުވީ، ޔާމީން އަކީ ވަރަށް ގިނައިން ކަސްރަތު ކުރައްވާ ބޭފުޅެއް ކަމަށާއި، ގިނަ ސަބަބުތަކަށްޓަކާ ވަރަށް ގިނައިން ކަސްރަތު ކުރައްވަން ޖެހިވަޑައިގެންފައިވާ ބޭފުޅެއް ކަމަށެވެ.
އޭނާ އިތުރަށް ވިދާޅުވީ، އެންމެ ކަންބޮޑުވެލަށްވަނީ ޔާމީންގެ ސިއްހީ ހާލުކޮޅާ މެދުގައި ކަމަށެވެ. އެހެންކަމުން މިހާރުން މިހާރަށް ޔާމީން ގެއަށް ބަދަލުކޮށްދޭން ޖެހޭ ކަމަށްވެސް އަދުރޭ ވިދާޅުވިއެވެ.
މީގެ އިތުރުން އަދުރޭ ވިދާޅުވީ، ޔާމީން ބަންދުކޮށްފައި ވަނީ އުސޫލުން ބޭރުން ކަމަށާއި، ބަންދުގައި ބެހެއްޓުމަށް އަމުރު ކުރީ ހެކި ފޮރުއްވަފާނެތީ ކަމަށް ހުކުމުގައި ބުނެފައިވާކަމަށެވެ. އެކަމަކު އެންމެ ބޮޑަށް ހައިރާން ވެވަޑައިގަންނަވާން ޖެހިވަޑައިގަންނަވަނީ ޖަލުގައި ހުންނަވާތާ، ވިއްސަކަށް ދުވަސް ވީއިރުވެސް، އަދި މިހާތަނަށް އެމަނިކުފާނަށް ޝަރީއަތުގެ އެއްވެސް ސުވާލެއް ކޮށްފައިނުވާތީ ކަމަށެވެ. އަދި މިއީ ސިޔާސީ ގޮތުން ކޮށްގެން އުޅޭ ކަމެއްކަމަށް މި ކަމުން އެނގިގެން ދާ ކަމަށްވެސް އަދުރޭ ވިދާޅުވިއެވެ.
އަދުރޭ އިތުރަށް ވިދާޅުވީ، ދުވަހަކުވެސް ދުނިޔޭގެ ގައުމެއްގައި އިންތިހާބަކަށް ނުފޫޒު ނުފޯރުވާ ވަރަށް ވުރެ ބޮޑަށް، ކުރިއަށް އޮތް މަޖިލިސް އިންތިހާބަށް މި ސަރުކާރުން ނުފޫޒު ފޯރުވާނެ ކަމަށާއި، މިހާރުވެސް ނުފޫޒު ފޯރުވަމުން އެބަ ގެންދާކަމަށެވެ. އަދި އޭގެ އެންމެ ފާޅުކަންބޮޑު އެއް ހެއްކަކީ މިރާއްޖޭގައި މިވަގުތު ހުރި ހަމައެކަނި އިދިކޮޅު ލީޑަރު ގެންގޮސް ހައްޔަރުކޮށްފައި ބެހެއްޓުން ކަމަށެވެ. މިނިވަން އިންސާފުވެރި އިންތިހާބެއް ބާއްވާނެ މާހައުލެއް މިވަގުތު މިރާއްޖޭގައި ނެތް ކަމަށާއި، ޔާމީން ޖަލުގައި ބަހައްޓައިގެން މިނިވަން އިންސާފުވެރި އިންތިހާބެއް ބޭއްވޭނެ ކަމަށް ގަބޫލުފުޅު ނުކުރަށްވާ ކަމަށްވެސް އަދުރޭ ވިދާޅުވިއެވެ.
އޭނާ ވިދާޅުވީ، ޔާމީން ގެ މައްސަލާގައި ރައީސް އިބްރާހިމް މުހައްމަދު ސޯލިހްއާ ބައްދަލުކުރައްވައިގެން ވެސް ހައްލެއް ލިބިގެން ގޮސްފައިނުވާ ކަމަށެވެ. އަދި އެކަމާ ގުޅިގެން އެ މައްސަލަ ވަރަށް ގާތުން ބައްލަވާ އެޓެންޑް ކުރައްވާނެކަމަށް އެމަނިކުފާނު ވިދާޅުވި ނަމަވެސް އޭގެ ފަހުން މިއަދާ ހަމައަށް އެއްވެސް އަލިމަގެއް ފެނިގެން ގޮސްފައިނުވާ ކަމަށް އަދުރޭ ވިދާޅުވި އެވެ.
އަދުރޭ ކުރިން ވިދާޅުވީ، ރައީސް ސޯލިހު އެހެން ވިދާޅުވި ފަހުން އަދުރޭގެ ފޯނު ކޯލުތަކަށް ޖަވާބު ނުދެއްވާ ކަމުގައެވެ.
މަނީ ލޯންޑަރިންގެ ތުހުމަތުގައި މިދިޔަ ފެބުރުވަރީ މަހުގެ 18 ވަނަ ދުވަހު ޔާމީން ހައްޔަރު ކުރުމަށް ފަހު ޝަރީއަތް ނިމެންދެން ބަންދުގައި ބަހައްޓަން ކުރިމިނަލް ކޯޓުން ވަނީ އަމުރުކޮށްފަ އެވެ. މި މައްސަލަ މިހާރު ވަނީ ހައިކޯޓުގައި އިސްތިއުނާފު ކޮށްފައެވެ.
