ފްލެޓު ބެހުމުގައި ޖަރީމާ ހިންގައި ނާޖާއިޒު ފައިދާ ނަގާފައި ހުރި މީހުން ބަލައި ތަހުގީގުކޮށް އެކަމާ ގުޅޭ ރަނގަޅު ޝަރީއަތާއި އެހެން ވެސް ގޮތް ގޮތުން އަޅަން ހުރި ފިޔަވަޅުތައް އެޅުމަށް މިނިސްޓަރު މައިއްޒު ވަނީ ވަރަށް ބޮޑަށް އިހުމާލުވެފައި ކަމަށް ނަޝީދު ވިދާޅުވެއްޖެއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި ކުރީގެ ރައީސް މުހައްމަދު ނަޝީދު ވިދާޅުވީ ހިޔާ މަޝްރޫއުގެ ދަށުން 7،000 ފްލެޓު ރައްޔިތުންނަށް ބެހި ގޮތާ މެދު ވަރަށް ގިނަ މީހުން ތިބީ ކަންބޮޑުވެފައި ކަމަށެވެ. ބައެއް މީހުންނަށް ފްލެޓު ހައްގުވި ނަމަވެސް، އެއްގޮތަކަށް ހައްގު ނުވާ މީހުންނަށް ވެސް ފްލެޓު ދީފައި ވާކަމަށް ވިދާޅުވި އެވެ.
މިސާލެއްގެ ގޮތުގައި ނަޝީދު ވިދާޅުވީ ރައްޔިތުންގެ މަޖިލިހުގެ މެމްބަރަކާ ގުޅުން ހުރި 37 މީހަކަށް ފްލެޓު ލިބުމެވެ. ނަޝީދު އެ އިޝާރާތް ކުރެއްވި މެމްބަރަކީ ޕީޕީއެމްގެ ކުރީގެ ސެކްރެޓަރީ ޖެނެރަލް އަދި މަޖިލިހުގެ ނިލަންދޫ ދާއިރާގެ އަބްދުﷲ ހަލީލަށެވެ. ހަލީލްގެ އިތުރުން އެގޮތަށް ފްލެޓުތައް ދީފައި ހުރީ ކޮންކޮން ބޭފުޅުންނަށްތޯ އެމްޑީޕީން ސާފުކުރަމުން އަންނަ ކަމަށް ވެސް ވިދާޅުވި އެވެ.
"އަޅުގަނޑުމެން ޔަގީންކަން އަރުވަން ހައްގުވާ މީހަކަށް ލިބިފައިވާ ފްލެޓެއް އެއްވެސް ހާލެއްގައި ގެއްލިގެން ނުދާނެ" ނަޝީދު ވިދާޅިވިއެވެ.
ފުލެޓް ދިނުމުގެ ކަންކަން ކުރިއަށް ގެންގޮސްފައިވާ ގޮތް ރިވިއުކޮށް، ފްލެޓް ހައްގުވާ ފަރާތްތަކަށް އެންމެ އިންސާފުވެރިކޮށް ފްލެޓް ދިނުމަށް ރައީސް އިބްރާހިމް މުހައްމަދު ސޯލިހު އުފައްދަވާފައިވާ ކޮމެޓީންވެސް މީގެ ކުރިން ބުނެފައިވަނީ، ކުރީގެ ސަރުކާރުން ރައްޔިތުންނަށް ފުލެޓް ދިނުމުގައި އިހުމާލު ވެފައިވާކަމަށެވެ.
މިކަމާ ގުޅިގެން އޭރުގެ ހައުސިން މިނިސްޓަރު ޑރ.މުހައްމަދު މުއިއްޒު ވިދާޅުވީ، ފުލެޓު ދިނުމުގައި އޭރުގެ ސަރުކާރުން ކަނޑައެޅި އެއްވެސް މިންގަނޑަކާ ހިލާފުވެވަޑައިގެންފައި ނުވާނެ ކަމަށެވެ.
