ކުރީ ސަރުކާރުގެ ހިޔާ މަޝްރޫގެ ދަށުން ދޫކޮށްފައިވާ، ފުލެޓްތަކުގެ ތެރެއިން ދަފްތަރު ކެޓަގަރީއިން، ދަފްތަރުގައި އޮތްކަން ފެންނަން ނެތް އެތައް ބަޔަކަށް ފުލެޓް ދީފައިވާކަން ހާމަވެއްޖެއެވެ.
އިއްޔެ ރައީސުލްޖުމްހޫރިއްޔާގެ އޮފީހުން އާންމުކުރި، ފުލެޓް ދޫކޮށްފައިވާ މީހުންގެ މައުލުމާތު ހިމެނޭ ލިސްޓުން އެނގޭ ގޮތުގައި، އެޗް9 (ދަފްތަރުގައި ރަޖިސްޓްރީ ވެފައިވާ މީހުންނަށް ހާއްސަ) ކެޓަގަރީއިން ޖުމްލަ 1545 ފުލެޓު ދޫކޮށްފައިވެއެވެ.
އެކަމަކު އޭގެ ތެރެއިން، ދަފްތަރުގައި ރަޖިސްޓްރީ ވެފައިވާ ކަމަށް ނުވަތަ ދަފްތަރުގެ އެޑްރެހެއްގައި އޮތްކަމަށް ދައްކަނީ 695 ފަރާތެކެވެ. އަނެއް 350 ފަރާތެއްގެ އެޑްރެސް ކަމުގައި ދައްކަނީ މާލެއާ އަތޮޅުތެރޭގެ އެޑްރެހެވެ.
"ދަޕްރެސް" އިން ބެލި ބެލުމުން އެނގިފަވަނީ މީގެ ތެރެއިން ބައެއް ފަރާތްތައް މި ކެޓަގަރީއަށް ފޯމު ލުމަށްޓަކައި ދަފްތަރުގައި ޖެހުމަށް ހުޅުވަލި ފުރުސަތުގައި ދަފްތަރުގައި ޖެހިފައިވާ ކަމެވެ. ނަމަވެސް އޭގެ ސާފު އަދަދެއް އެނގޭގޮތް ވަނީ ނުވެފައެވެ.
މީގެ އިތުރުން އެޗް9 ކެޓަގަރީގައި ދެމަފިރިން ހިމެނޭ ގޮތުން ފްލެޓް ދީފައިވާ 171 ފަރާތެއް ހިމަނާފައިވެއެވެ.
ފުލެޓް ދިނުމުގެ ކަންކަން ކުރިއަށް ގެންގޮސްފައިވާ ގޮތް ރިވިއުކޮށް، ފްލެޓް ހައްގުވާ ފަރާތްތަކަށް އެންމެ އިންސާފުވެރިކޮށް ފްލެޓް ދިނުމަށް ރައީސް އިބްރާހިމް މުހައްމަދު ސޯލިހު އުފައްދަވާފައިވާ ކޮމެޓީންވެސް މީގެ ކުރިން ބުނެފައިވަނީ، ކުރީގެ ސަރުކާރުން ރައްޔިތުންނަށް ފުލެޓް ދިނުމުގައި އިހުމާލު ވެފައިވާކަމަށެވެ.
މިކަމާ ގުޅިގެން އޭރުގެ ހައުސިން މިނިސްޓަރު ޑރ.މުހައްމަދު މުއިއްޒު ވިދާޅުވީ، ފުލެޓު ދިނުމުގައި އޭރުގެ ސަރުކާރުން ކަނޑައެޅި އެއްވެސް މިންގަނޑަކާ ހިލާފުވެފައި ނުވާނެ ކަމަށެވެ.
