އެންޓި ކޮރަޕްޝަން ކޮމިޝަން(އޭސީސީ)ގެ ތަހުގީހު ރިޕޯޓެއް ލީކުވެފައިވާ މައްސަލައެއް ބަލަމުން ނުދާކަމަށް އޭސީސީއިން ބުނެފިއެވެ.
އޭސީސީގެ ތަހުގީގު ރިޕޯޓެއް ލީކުވެފައިވާތީ، އެކަން ތަހުގީގު ކުރަމުން ދާކަމަށް ބައެއް މީޑިއާ ތަކުން ރިޕޯޓުކޮށްފައި ވީނަމަވެސް، ރަސްމީ ސިފައެއްގައި އެފަދަ އެއްވެސް މައްސަލައެއް ބަލަމުން ނުދާކަމަށް އެކޮމިޝަނުން މައުލޫމާތު ދެއެވެ. އަދި އެފަދަ ރިޕޯޓެއް ލީކުވެފައި ވާނަމަ އެ މައްސަލައެއް ތަހުގީގު ކުރާނެކަމަށް ވެސް އޭސީސީއިން ބުނެއެވެ.
އޭސީސީން ރިޕޯޓެއް ލީކުވެފައި ނުވާކަމަށް ބުނި ނަމަވެސް، ބައެއް މީޑިއާތަކުން ވަނީ ލީކުވެފައިވަނީ އޭސީސީގެ ރިޕޯޓެއް ކަމަށް ބުނެ ހަބަރު ފަތުރާފައެވެ. މިކަމާއި ގުޅިގެން އޭސީސީން ބުނެފައިވަނީ މީޑިއާތަކަށް އެ ރިޕޯޓެއް ލިބިފައިވަނީ ކިހިނެތް ކަމާއި، އެއީ ލީކުވެފައިވާ ރިޕޯޓެއްތޯ ބަލާނެ ކަމަށެވެ. ތަހުގީގު ރިޕޯޓެއްގެ މައުލޫމާތު ލީކުވެފައިވާކަމުގެ ހަބަރު އޭސީސީއަށް ވެސް ލިބިފައިވަނީ މީޑިއާ މެދުވެރިކޮށްކަމަށް އޭސީސީއިން ބުނެއެވެ.
ލީކުވެފައިވާ އޭސީސީގެ ރިޕޯޓާއި ގުޅިގެން އެކޮމިޝަންގެ ނައިބުރައީސް މުއައްވިޒް ރަޝީދު ބައެއް މީޑިއާތަކަށް ވިދާޅުވެފައިވަނީ "އެކޮމިޝަނުގެ ތަހުގީގު ރިޕޯޓެއް އާންމު ނުކުރާނެ ކަމަށާއި، އެކޮމިޝަނުގެ ތަހުގީގު ރިޕޯޓެއް ލީކުވެފައިވާނަމަ އެއީ ބޮޑު މައްސަލައެއް" ކަމަށެވެ. އެހެންނަމަވެސް ތަހުގީގު ރިޕޯޓެއް ލީކުވެފައި ވާކަން މުއައްވިޒް ވެސް ކަށަވަރު ކޮށްދެއްވާފައެއްނުވެއެވެ.
އޭސީސީގެ ތަހުގީގު ރިޕޯޓާ ހަވާލާދީ ބައެއް މީޑިއާތަކުން މިއަދު ރިޕޯޓުކޮށްފައިވަނީ އާސަންދަ އާއި އެންސްޕާގެ އިސް ވެރީންތަކަކާ ގުޅޭ ކޮރަޕްޝަންގެ މައުލޫމާތުތަކެކެވެ. އެގޮތުން ރާއްޖެއިން ލިބެން ހުންނަ ފަރުވާއަށް ރާއްޖެއިން ބޭރުން ފަރުވާ ހޯދުމަށް ހަރަދުކޮށްފައި ވުމާއި، އާސަންދަ މެދުވެރިކޮށް ރާއްޖެއިން ބޭރުން ހޯދާ ސިއްހީ ފަރުވާއަށް ހޮސްޕިޓަލްތަކުން ބިލްކުރާ އަދަދަށްވުރެ އިތުރަށް ބައެއް ހޮސްޕިޓަލްތަކަށް ފައިސާ ދޫކޮށްފައިވާކަމަށް ވެސް އެ މީޑިއާ ރިޕޯޓުތަކުގައި ވެެއެވެ.
