މި ދުވަސްވަރު ރާއްޖޭގެ އެކި ހިސާބުތަކުގައި ބޭރަށް ހިންގުމާއި ހޮޑުލުން އިތުރުވަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާއިރު، ފާއިތުވި ހަފުތާތަކުގައި ބޭރަށް ހިންގުމާއި ހޮޑުލުން ޖެހިގެން ރިޕޯޓްކުރާ މިންވަރު ވަނީ މަތިވެފައެވެ. މި ބަލި ފެތުރުން ކޮންޓްރޯލް ކުރުމަށާއި، ބަލިން ރައްކާތެރިވުމަށްޓަކައި ހާއްސަ ސަމާލުކަމެއް ދިނުމަށް އެ އެޖެންސީން ވަނީ އިލްތިމާސްކޮށްފައެވެ.
ބަލިން ރައްކާތެރިވުމަށް އެޅިދާނެ އެންމެ މުހިންމު ފިޔަވަޅެއްގެ ގޮތުގައި އެޗްޕީއޭއިން ފާހަގަކުރަނީ އަމިއްލަ ސާފުތާހިރުކަމަށް ސަމާލުކަން ދިނުމެވެ. ވަކިން ހާއްސަކޮށް، ކާބޯތަކެތި ތައްޔާރުކުރުމުގެ ކުރިންނާއި، ކެއުމުގެ ކުރިން އަދި ފާހާނާ ކުރުމަށްފަހު ސައިބޯނި ލައިގެން ރަނގަޅަށް އަތް ދޮވުމުގެ އާދަ ހަރުދަނާ ކުރުމަށް އެޗްޕީއޭއިން ވަނީ ނަސޭހަތްތެރިވެފައެވެ.
މީގެ އިތުރުން، ބޭރަށް ހިންގުން ފަދަ ބަލިތަކަކީ ފަސޭހައިން ފެތުރޭ ބަލިތަކަކަށް ވާތީ، ކާބޯތަކެތީގެ ރައްކާތެރިކަމަށް ސަމާލުވުމަށާއި، ބަލީގެ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިކަން ހޯދުމަށްވެސް ކަމާބެހޭ ފަރާތްތަކުން އިރުޝާދު ދެއެވެ. އަދި ބޭރަށް ހިންގާ ހޮޑުލާނަމަ، ގޭގައި މަޑުކުރުމަށާއި ވަޒީފާ އަށް އަދި ސްކޫލަށް ނުދިއުމަށް ވެސް އެޗްޕީއޭ އިން ވަނީ ބުނެފައެވެ.
