އެމެރިކާއާ އިސްރާއީލުން އިސްވެ އީރާނަށް ދިން ހަމަލާތަކާ އެކު ފެށިގެން ކުރިއަށްދާ ހަނގުރާމައިގެ ދެން އޮތް މަރުހަލާއާ ބެހޭ ގޮތުން އެމެރިކާގެ މަޝްހޫރު ޓީވީ ޗެނަލެއްގެ ނޫސްވެރިޔަކު ކުރި ސުވާލެއްގެ ޖަވާބުގައި އީރާނުގެ ހާރިޖީ ވަޒީރު އައްބާސް އަރާޗީ ދެއްވި ޖަވާބު މުޅި ދުނިޔޭގެ ސަމާލުކަމަށް އަތުވެއްޖެއެވެ.
އެމެރިކާގެ އެން.ބީ.ސީގެ ޓޮމް ލަމާސްއަށް ދެއްވި ހާއްސަ އިންޓަވިއުއެއްގައި އީރާނުގެ ހާރިޖީ ވަޒީރު އައްބާސް އަރާޗީ ވަނީ އެމެރިކާގެ ނޫސްވެރިޔާ ބަސްހުއްޓުވާލާފައެވެ. އިންޓަވިއުގެ ތެރޭގައި ހަނގުރާމައާ ބެހޭ ގޮތުން ލަމާސް ކުރި އެކި އެކި ސުވާލުތަކަށް އަރާޗީ ހަމަޖެހިލައިގެން އިންނަވާ ޖަވާބު ދެއްވަމުން ގެންދެވި އިރު އެމެރިކާގެ އަސްކަރީ ސިފައިން އީރާނަށް އެއްގަމު މަގުން އަރާފާނަ ކަމާ މެދު ބިރު ނުގަންނަވާތޯ ލަމާސް އެހިއެވެ.
އެސުވާލާ މެދު އިތުރަށް ވިސްނާލުމެއް ވެސް ނެތި އީރާނުގެ ހާރިޖީ ވަޒީރު ޖަވާބުގައި ދެންނެވިއެވެ.
"ނޫން (ބިރެއް ނުގަނޭ). އަޅުގަނޑުމެން މިތިބީ އެމެރިކާ ސިފައިންގެ އިންތިޒާރުގައި"
މި ޖަވާބު އިވި، ލަމާސް ވަގުތުކޮޅަށް މަޑު ޖެހިލާތަން ފެންނަ އިރު އަރާޗީގެ ޖަވާބު އިވުނީ ރަނގަޅަށްތޯ ޔަގީން ކުރުމަށް އަލުން އަހައެވެ. ދެން ވެސް އަރާޗީ ޖަވާބު ދެއްވީ ވަރަށް ހަމަޖެހިލައިގެން އިންނަވައެވެ. މޫނުމަތީގައި އެއްވެސް ނުތަނަވަސްކަމެއް ނެތެވެ.
"އާނއެކެވެ. އީރާނަށް އަރާ އެމެރިކާ ސިފައިންނާ ކެރިގެން ކުރިމަތިލެވޭނެ ކަމުގެ ފުރިހަމަ އިތުބާރު އީރާނަށް އެބައޮތެވެ. އަދި އެކަން ވާނީ އެމެރިކާއަށް ބޮޑު މުސީބާތަކަށް"
ސޯޝަލް މީޑިއާގެ އެކި ޕްލެޓްފޯމްތަކުގައި މި ކްލިޕް އެކި އެކި އެކައުންޓްތަކުުން ޝެޔާ ކުރަމުންދާ އިރު އެމެރިކާ ސިފައިން އީރާނަށް އަރާ ހަނގުރާމަކުރާނެ ކަމުގެ އިޝާރާތެއް އެމެރިކާގެ ރައީސް ޑޮނާލްޑް ޓްރަމްޕް ވެސް އަދި އެމެރިކާގެ އަސްކަރިއްޔާއިން ވެސް ނުދެއެވެ. އެހެން ނަމަވެސް އެމެރިކާއިން ވަނީ އީރާނާ ދެކޮޅަށް ދެމުންދާ ވައިގެ ހަމަލާތައް އިތުރަށް ވަރުގަދަ ކުރާނެ ކަމަށް ބުނެފައެވެ.
ސްރީލަންކާ ކައިރިން އީރާނުގެ މަނަވަރަށް ދިން ހަމަލާއަކީ ހަނގުރާމައިގެ ޖަރީމާއެއް
އެމެރިކާގެ އެން.ބީ.ސީއަށް ދެއްވި ބަސްދީގަތުމުގައި އީރާނުގެ ހާރިޖީ ވަޒީރު އިތުރަށް ވިދާޅުވީ، ސްރީލަންކާގެ ކައިރިން ދަތުރުކުރަމުން ދިޔަ އީރާނުގެ މަނަވަރު އައިއާރްއައިއެސް ޑެނާ އަށް އެމެރިކާގެ ސަބްމެރީނަކުން ދިން ޓޮޕީޑޯ ހަމަލާއަކީ ހަނގުރާމައިގެ ޖަރީމާއެއް ކަމަށެވެ.
މިދިޔަ މަހު އިންޑިއާގައި ކުރިއަށް ދިޔަ ކަނޑުގެ އަސްކަރީ ތަމްރީނުތަކެއްގައި ބައިވެރިވުމަށް އެސަރަަހައްދަށް ދިޔަ މި މަނަވަރަށް ދިން ހަމަލާގައި 78 މީހުން މަރުވި އިރު 100 އަށް ވުރެ ގިނަ މީހުން ވަނީ ގެއްލިފައެވެ.
އީރާނުގެ ހާރިޖީ ވަޒީރު ވިދާޅުވީ، މިމަނަވަރަކީ އީރާނުގެ ކަނޑުގެ އަސްކަރިއްޔާގެ މަނަވަރެއް ނަމަވެސް އިންޑިއާގައި ކުރިއަށް ދިޔަ ތަމްރީނުގައި ބައިވެރިވާން އެސަރަހައްދަށް ދިޔަ މަނަވަރަކަށްވާތީ އެއުޅަނދުގައި އެއްވެސް ހަތިޔާރެއް ނެތް ކަމަށެވެ. އަރާޗީ ވިދާޅުވީ، އަސްކަރީ ތަމްރީނުތަކުގައި ބައިވެރިވުމަށް ފަހު އެމަނަވަރު ގެންދިޔައީ އެނބުރި ގައުމަށް އައުމަށް މަސައްކަތް ކުރަމުން ކަމަށެވެ. އަދި ހަތިޔާރެއް ނެތް މަނަވަރަކަށް ބައިނަލްއަޤްވާމީ ކަނޑުގެ ސަރަހައްދުގައި މި ގޮތަސް ހަމަލާ ދިނުމަކީ ހަނގުރާމައިގެ ޖަރީމާއެއްގެ ގޮތުގައި ސިފަ ކުރައްވާ އީރާނުގެ ހާރީޖީ ވަޒީރު ވިދާޅުވީ، އެމެރިކާއިން މި ދެއްކީ އެއްވެސް ހާލެއްގައި އެގައުމުން ދައްކަން ބޭނުން ނުވާނެ ފަދަ ނަމޫނާއެއް ކަމަށެވެ. އެއީ ހަނގުރާމަ ހިނގަމުންދާ ސަރަހައްދާ މާ ދުރުގައި އެއްވެސް ހަތިޔާރަކާ ނުލާ އޮތް އުޅަނދަކަށް ހަމަލާއެއް ދިނުމަކީ ބައިނަލްއަޤްވާމީ ކަނޑުތަކުގެ ގާނޫނުތަކާ ވެސް ހިލާފުކަމެއް ކަން އޭނާ ފާހަގަކުރެއްވިއެވެ.
އީރާނުގެ މަނަވަރަށް ހަމަލާ ދިން ކަން އެމެރިކާއިން ވެސް ކަށަވަރުކޮށްދީފައިވާ އިރު އެމެރިކާއިން ބުނެފައިވަނީ މިއީ ދެވަނަ ބޮޑު ހަނގުރާމައިގެ ފަހުން އެގައުމާ އިދިކޮޅު ގައުމެއްގެ މަނަވަރެއް ސަބްމެރީނެއް ބޭނުންކޮށްގެން ފައްތާލި ފުރަތަމަ ފަހަރު ކަމަށެވެ.
