ޟިރާރުގެ އަނގައިން ނުކުތީ ތެދު ވާހަކަތަކެކެވެ. އެވާހަކަތައް އަޑުއަހަން ލަތީފާއަށް އުނދަގޫވިއެވެ. ދެއަތަށް ބޯހޫރުވަމުން އޭނާ ނޫނެކޭ ކިޔާ ރޯން ފެށިއެވެ.
"ނޫން.... ނޫން... އަހަރެން އެކަމެއް ކުރީ މަގޭ އާއިލާއަށް ރަނގަޅަކަށް... ޝާކިރު ވަރަށް ބަލިކޮށް އުޅުނު ދުވަސްވަރެއް އެއީ... އަހަރެމެންނަކީ ފަގީރުން.. ޝާކިރު ބަލިވުމުން އަހަރެމެން އަތުގަ ހަމަ އެންމެ ފައިސާއެއް ވެސް... އަހަންނަށް އެހީވާން އައި އީސަ އަހަންނަށް ފައިސާ ދެމުން ބުނީ ސީމާއާ ކައިވެނިކުރަން ބޭނުމޭ... އަހަންނަށް އިތުރުގޮތެއް ނެތިގެން އެ ފައިސާ ނެގީވެސް... ސީމާ ކައިވެންޏަށް އެއްބަސްކުރުވަން އީސަ ވަރަށް މަސައްކަތް ކުރި އެކަމަކު ސީމާ ގަބޫލެއް ނުވިއޭ... ދެން އަހަރެން އެކަމެއް ކުރީ އަހަންނަށް އެފައިސާ ދެއްކޭނެ ގޮތެއް ނެތީމަ... ޝާކިރަށް މިއިން އެއްވެސް ކަމެއް ނޭނގޭނެ..." ދެލޮލުން އޮހެމުން ދިޔަ ކަރުނަތައް ބުރުގަލުޣޭ ކަނުން ފޮހެމުން ލަތީފާ ވާހަކަ ދެއްކިއެވެ.
"ދެން ތިބުނާ އީސައެއް ސީމާއާ ކައިވެނި ކުރިތަ؟... ކޮބާތަ އީސަ؟.. އެއީ ކާކު؟.. މިރަށު މީހެއްތަ؟.." ދެންވީ ގޮތް އޮޅުން ފިލުވަން ބޭނުންވެފައި ހުރިވަރުން އެއްފައްޗަކަށް އެތައް ސުވާލެއް ޟިރާރު އަމުނާލިއެވެ.
"އޭނަ އިންނާނަމޭ ކިޔާފަ އުޅުނީ... އެކަމަކު އަސްލު އޭނާ ބޭނުންވީ އެހެންކަމެއް... އެއަށްފަހު އެ ކުއްޖާ މޮޔަވާން ފެށީ.. އީސަ އޭނާ ދޫކޮށްލާފަ ދިޔަ ފަހުން..." ލަތީފާއަށް އަޑުން އަޑުނަގާ ރޯން ފެށިއެވެ. މިއޮއްހާ ދުވަހު ލަތީފާ ހީކޮށްގެން ހުރީ ސީމާ މޮޔަވީ އީސަ އޭނާ ދޫކޮށްލާފަ ދިޔައިމަ ކަމަށެވެ. ލަތީފާ ހެދި ފަންޑިތައާ ގުޅުމެއް އޮތްކަމަކަށް އެނާ ހިތަކަށް ވެސް ނާރައެވެ.
ތަންކޮޅެއް ދުރުގައި ހުރި ޟިރާރާ ދިމާއަށް ހިނގައިގަންނަމުން ލަތީފާ ވާހަކަ ދެއްކިއެވެ. "އަހަންނަށް ކަމެއްކޮށްދެންނާ މިވާހަކަތައް ސިއްރެއް ގޮތުގައި ބާއްވަދީ.. އަދި ސީމާ ރަނގަޅުކޮށްދީ..." ލަތީފާ އާދޭހުގެ ރާގަކަށް ދަމާލާފަ ވާހަކަ ދެއްކިއިރު ޟިރާރުގެ ބޭނުން ހިފަންވީ ވަގުތު އައިސް ޖެހުނީކަން އެނގުމުން އޭނާގެ ތުންފަތާ ކުޅެލީ ލާނެއް ހިނިތުންވުމެކެވެ.
ލަތީފާއާ ކުރިމަތިލާން ޟިރާރު އެނބުރުނު އިރުވެސް ހުއްޓުމެއްނެތި އޭނާ އާދޭސްކުރަމުން ދިޔައެވެ. ލަތީފާ ބޭޒާރުނުކޮށް ހުރިހާ ކަމެއް ހަމައަކަށް އަޅުވާނަންކަމަށް ޟިރާރު ބުނުމުން ލަތީފާގެ ހިތަށް ތަސައްލީއެއް ލިބުނެވެ. ހަމަ އެވާހަކައާ ވިދިގެން ޟިރާރުގެ އެދުން ހާމަކުރުމުން ލަތީފާގެ މޫނުމައްޗަށް ވެރިވި ފަނޑު ހިނިތުންވުން އެކީ މިލާ މޯޅިވިއެވެ.
ބަހެއް ނުބުނެ ލަތީފާ ގަބުވެފައި ހުއްޓާ ޟިރާރު އެއްގަމާ ދިމާއަށް ހިނގައިގަތީ އެތާހުރި ފަންޖިފުޓިގެއާ ދިމާއަށެވެ. ލަތީފާގެ އަތުގައި ހިފަމުން ޟިރާރު އެގެއާ ދިމާއަށް މިސްރާބުޖެހިއިރު އޭނާގެ ފަހަތުން ލަތީފާ ދިޔައީ ގަބުވެފައިހުރި ބުދެއްހެނެވެ. އެ ޖިފުޓިގެއަށް ވަދެ ރޯނުން ފުރާފައިވާ އެނދުގައި ލަތީފާ ބޭންދިއެވެ. އެއަށްފަހު ޟިރާރުގެ ހަށިގަނޑުން އަންނައުނުތައް ވަކިކުރަމުން ދިޔައިރު އޭނާގެ ދިގު އިންތިޒާރެއްގެ ނިމުން އަންނަނީކަން އެނގި ދަތްކޮޅު ދިލުވާލިއެވެ.
ލަތީފާގެ ހަށިގަނޑަށް ޟިރާރު އަރައިގެންއިރު ވެސް ލަތީފާގެ ފަރާތުން އެއްވެސް ހަރަކާތެއް ފެންނާކަށް ނެތެވެ. އޭނާގެ ބޮލުގައި އަޅާފައިވާ ބުރުގާ ނަގާ އެއްފަރާތަކަށް ހޫރާލަމުން ޟިރާރު ހިނިގަނޑެއް ޖަހާލިއެވެ. އެހަށިގަނޑަށް އޭނާގެ ބާރު ފޯރުވަމުން ދިޔައިރު އޭނާއަށް ކުރީގެ ހަނދާންތަކާއި އެ މަންޒަރު ސިފަވެގެން ދިޔައެވެ.
ލަތީފާގެ ލޯބި ހާސިލްކުރަން ޟިރާރު އެތައް މަސައްކަތެއް ކުރުމުންވެސް ޟިރާރާ ކައިވެނި ނުކުރާނަން ކަމަށް ލަތީފާ ބުނަމުން ދިޔައެވެ. ރަށުގައި ވަރަށް ވަރުގަދަ ފުޓުބޯޅަ މެޗެއް ބާއްވައިގެން އުޅުނު ދުވަހެއްގައި ސަޕޯޓްކުރަން ދަނޑަށް ގޮސް ތިބި އެންމެންތަކުގެ މެދުގައި އައިސް ލަތީފާގެ އަތުގައި ޟިރާރު ހިފިއެވެ. ކުރު ހެދުން ބުރިއެއް ލައިގެން ހުރި ލަތީފާ ބަލައިލީ ވަށައިގެން އެއްވެގެން ތިބި މީހުންތަކާ ދިމާއަށެވެ. ލަތީފާގެ އަތުގައި ހިފާ ޟީރާރު އޭނާގެ ގަޔާ ދިމާއަށް ދަމައިގަތެވެ. އެކަމަށް ނުވިސްނާ ހުރުމުން ލަތީފާ އައިސް ޟިރާރުގެ މޭގައި ލައްވިއެވެ.
ހުރިހާ ފިރިހެނުންތައް ހޭން ފެށުމުން އައި ރުޅިއާ އެއްވަރަށް ލަތީފާ ލަދުވެސްގަތެވެ. ހޫނު އެތިފަހަރެއް ޟިރާރުގެ ކަންކަށިމަތީ ޖެހުމަށްފަހު ރުޅިވެރި ބަސްތަކުގެ ހަމަލާއެއް ޟިރާރާ ދިމާއަށް ލަތީފާ ގޮވަމުން ދިޔައީ ދަތްކުނި ވިކަމުންނެވެ. "ކިހާ ދެރަކަމެއް... ކަލޭ ހީކުރީތަ މަކަލެއާ ހެދި ހޭބަލިވެދާނޭ... މަށެއް ނޫޅެން.. ވައިވެސް ނޭޅޭނަން... ކަލެއަށް މިރަށުތެރެއިން ކޮންމެ ކޮންމެ އަންހެނަކު ލިބުނަސް މި ލަތީފާއެއް ނުލިބޭނެ އިނގިއްޖެތަ؟..."
ރޯނު އެނދުމައްޗަށް ލަތީފާ ހޫރާލި އިރު އޭނާގެ ހަށިގަނޑުގައި އެއްވެސް ނިވާކަމެއް ނެތެވެ. އެނދުގައި އޮވެ ކުރުގެޅެމުން އޭނާގެ ހަށިގަނޑު ފޮރުވަމުން ދިޔައިރު ލަތީފާ ގިސްލަގިސްލާފައި ރޮނީއެވެ.
ފަޓުލޫނުގެ ޒިބުއަޅުވަމުން ލަތީފާއާ ދިމާއަށް ޟިރާރު ބަލާލިއެވެ. އަދި އޭނާގެ ކަންކަށިމަތީ ފިރުމާލަމުން ވާހަކަ ދެއްކިއެވެ. "ހަނދާންވޭތަ އެދުވަހު ބުނި އެއްޗިހި... ތި އޮތީ ހަމަ އެލަތީފާއާ މޮ*ފަ... މަ ބުނާގޮތަށް ކަންކުރަންވާނީ.. އޭރުން ޝާކިރަކަށް ސީމާއަށް ވީ ކަންތަކުގެ ދޮންކަޅުމިން ވެސް ދައްކާނުލާނަން..." ގަމީހުގެ ގޮށްތައް އަޅުވަމުން ޟިރާރު އެ ޖިފުޓިގެއިން ނިކުމެގެން ދިޔައިރު ލަތީފާ އެ އޮތްގޮތަށް އޮތީއެވެ. ބިންމަތީ ހުރި އޭނާގެ ހެދުންތަކާ ދިމާއަށް ނަޒަރު ހިންގާލި އިރު އަޑުގެ ނެތްތަނަށް ލަތީފާ ހަޅޭއްލަވައިގަތީ ދެއަތުން މޫނު ނިވާ ކުރަމުންނެވެ.
*** *** *** *** *** ***
އެނދުގައި ގަދައަށް ނިދާފައި އޮތް ނައުރީނަށް ސިއްސައިގެންގޮސް ހޭލެވުނީ އޭނާގެ ގައިމަތީގައި އަޅާފައިވާ ކަފަ ރަޖާގަނޑު ނެތުމުންނެވެ. ދެލޯ ހަނިކޮށްލަމުން އެނދުގައި އަތާއި ފައި ކާއްތާލީ އެ ރަޖާގަނޑު ހޯދާށެވެ. އަތުޖެހޭ ގޮތް ނުވުމުން ކުޑަކޮށް އެނދުމަތީ އޮވެ ބޯހިއްލާލަމުން ބަލާލިއެވެ. އަޒީމް ނާންނަނީސް އެހެންއޮވެ ނައުރީންއަށް ނިދުނީކަން އެނގުމުން ފާރުގައި ހަރުކޮށްފައިވާ ގަޑިއާ ދިމާއަށް ބަލާލިއެވެ. ގަޑިން ދަންވަރު 3 ޖެހީއެވެ.
ބާލީސް ދަށަށް އަތްކޮށްޕާލީ ފޯނުމަތިން ހަނދާންވުމުންނެވެ. ބާލީސްދަށަށް އަތްލަމުން ފޯނުނަގާ އަޒީމްގެ ނަންބަރަށް ގުޅާލިއެވެ. އަޒީމަކީ އެހާ ލަސްވަންދެން ބޭރުގައި އުޅޭ މީހެއް ނޫނެވެ. މިރޭ އޭނާ ނައިސް ލަސްވުމުން ނައުރީން ހައިރާންވިއެވެ. ފޯނުން މީހަކު ވާހަކަ ދައްކާހެން ހީވުމުން ކަންފަތުގައި ފޯނު ޖަހާލަމުން ނައުރީން ވާހަކަ ދެއްކިއެވެ. "ހަލޯ އަޒީމް..."
ވާހަކަ އެހިސާބުން މެދުކަނޑާލީ އެކޮޅުން ވާހަކަ ދައްކަމުން އައި އަޑަކީ އަޒީމްގެ އަޑު ނޫންކަން އޭނާއަށް އެނގުމުންނެވެ.
"ތި ގުޅުއްވި ނަންބަރ ވަނީ ގުޅޭ ސަރަހައްދުން ބޭރުގަ... ފަހުން ގުޅުއްވުން އެދެން..." ނައުރީންގެ ކަންފަތުން ފޯނު ދުރުކޮށްލުމަށްފަހު ބާލިސް ދަށަށް ފޯނު ކޮއްޕާލިއެވެ. މިހާ ދަން ގަނޑިއެއްގައި އަޒީމް ދާނީ ވަކި ކޮންތާކަށް ބާވައޭ ހިތަށް އެރިއެވެ. އެ ހަމަހިމޭން ދަންވަރުގެ ވަގުތު ނައުރީންގެ ކަންފަތަށް އިވުނު އަޑާ އެކު ދެލޯ ބޮޑުވިއެވެ. ނުނިދޭ ރޭރޭ ނައުރީން ހެއްލަން އިންނަ ގޮނޑި ހެއްލޭ އިރު ގޮވާ އަޑުކަން އެއީ ނައުރީނަށް އެނގުނެވެ. އަޒީމް އޭނީ ގޮނޑީގައޭ ހިތާ ހިނިތުންވަމުން ގޮނޑިއާ ދިމާއަށް ނައުރީން އެނބުރިލިއެވެ.
އޭރުވެސް އެ ގޮނޑި މަޑުމަޑުން ހެއްލެމުން ދިޔައެވެ. ނައުރީންގެ ގައިމަތީގައި އަޅާފައިވާ ބްލޭންކެޓް އަޅައިގެން އެގޮނޑީގައި އެއޮތީ އަޒީމް ހެއްޔެވެ. ކުޑަދޮރުގެ ދޮރުފަތް ހުރީ ކޮންމެވެސް ވަރަކަށް ހުޅުވިފައެވެ. ކޮޓަރި ތެރެއަށް ވަންނަމުން ދިޔަ ވައިރޯޅީގައި ފިނިކަމެއް އެކުލެވިފައި ވިއެވެ.
"އަޒީމް... އޭސީ ޖައްސާފަ ކީއްކުރާކަށްތަ ކުޑަދޮރު ހުޅުވައިގެން ތީނީ... އާދޭ އެނދަށް... ކުޑަދޮރު ލައްޕާފަ ދެން އާދެބަލަ.. މުޅި ބޮލާއެކީ ރަޖާ އަޅައިގެން ތިއޮތީއްޔޯ... ދެން އާދެބަލަ... ވަރަށް ހީކަރުވާ އެބަ..." އެއްފަރާތަކަށް އޮށޯވެގެން އޮވެ ނައުރީން ވާހަކަ ދައްކަމުން ދިޔައެވެ. ކުއްލިއަކަށް ގޮނޑި ހެއްލުން ހުއްޓުނެވެ. އަޒީމް އަންނާނެކަމުގެ އުންމީދުގައި އޮވެ ނައުރީން ދެލޯ މަރާލިއެވެ. ހަމައެވަގުތު ކުޑަދޮރު ލެއްޕުނު އަޑު އިވުނެވެ.
ލޮލަށް ބަރުވެފައި ވުމުން ނައުރީން ލޯ ހުޅުވާކަށް ގަސްތެއް ނުކުރެއެވެ. "ނުނިދުނީމަ ކީއްވެ އަހަންނަށް ނުގޮވީ... ދެން އާދޭ ކައިރިއަށް... ވަރަށް މިސްވެފައޭ މިއޮތީ..."
ނައުރީންގެ ގައިމަތީގައި ކަފަ ރަޖާގަނޑު އެޅުނުކަން އިހްސާސް ވިއެވެ. ހީ ކަރުވާފައި ވުމުން ރަނގަޅަށް ފޮތިގަނޑުގައި ހިފާ މެއާ ހަމައަށް ނިވާކޮށްލަމުން އެނދުގައި ހަމަޖެހިލިއެވެ. އެނދުގައި މީހަކު އިށީންކަން ނައުރީނަށް އެނގުނެވެ. އަޒީމް ހަދާގޮތެއް ބަލަން ދެލޯ މަރައިގެން އޮންނަން ނައުރީން ނިންމިއެވެ. ބްލޭންކެޓްގެ ތެރެއިން ނައުރީންގެ ފައިގައި ފިނި އަތްތިލައެއް ޖެހުނުކަން އިހްސާސްވިއެވެ. ހަށިގަނޑަށް ލޮޅުމެއް ނުގެނެސް އޮތް ނައުރީނަށް ތުންފަތުގައި ދަތްއަޅާލިއެވެ. އަޑެއްބަޑެއް ނުލައްވާ އޮންނަން އޭނާ ބޭނުންވީމައެވެ. އެއަތް ހަރަކާތް ކުރަމުން އައީ މައްޗަށެވެ.
އަޒީމްގެ ހިތް ނައުރީނަށް ލެނބިފައިވާކަން އެނގުމުން އޭނާގެ ރޭވުން ކާމިޔާބުވީކަން އެނގި ހިތް ފުރިގެން ދިޔައެވެ.
*** *** *** *** *** ***
މީހަކު ދޮރުގައި ޓަކި ޖަހާލިއަޑަށް މަންޝާގެ ދެލޯ ހުޅުވާލިއެވެ. ދޮރާ ދިމާއަށް މަންޝާ ބަލަން އޮތެވެ. މިހާ ދަންގަނޑިއެއްގައި އެ ދޮރުގައި ޓަކި ޖެހީ ކާކުބާވައޭ އޭނާގެ ހިތަށް އެރިއެވެ. ދެވަނަ ފަހަރަށް ޓަކި ޖެހިއަޑަށް މަންޝާ ތެދުވެ އޭނާގެ އިސްތަށިގަނޑު ރަނގަޅުކޮށްލިއެވެ. ހެދުން ރަނގަޅުކޮށްލަމުން ހަށަންބަނދެގެން ހުރެ ގޮސް ދޮރުގެ ތަޅު އަނބުރާލަމުން ދޮރު ހުޅުވާލިއެވެ. ހަމައެކަނި ސޯޓެއް ލައިގެން ކޮޓަރި ދޮރުމަތީ ހުރި އަޒީމް ފެނުމުން މަންޝާއަށް ހައިރާންކަމެއް ލިބުނެވެ.
"ކިހިނެއްވީ.. ނުނިދަނީތަ؟..." އަޒީމްގެ މޫނަށް ބަލާލަމުން މަންޝާ ސުވާލުކޮށްލީ ވަގުތުގެ ގޮތުންނެވެ.
"ހިނގާބަލަ ކޮފީއެއް ހަދާލަދޭން... ނައުރީނަށް ގޮވާ ގޮވާ ނުހޭލީމަ ބޭރަށް ނިކުތީ... ކޮފީއެއް ނުބޮއެ ނުނިދޭނެ.." މަންޝާއަށް ގޮވަން އޭނަ އައި ސަބަބު ހާމަ ކުރުމުން މަންޝާ ހިނިތުންވެލިއެވެ. ކޮޓަރިން ނިކުމެ ބަދިގެއާ ދިމާއަށް މަންޝާ މިސްރާބު ޖެހިއެވެ.
"މިރޭ ނުކައިދޯ ތިއުޅެނީ... ހިނގާ ކާން..." ކާގެއަށް ވަދެ ހޮޅިބުރި ދިއްލާލަމުން މަންޝާ ވާހަކަދެއްކިއެވެ. ބަނޑުހައިވެފައި ހުރުމުން އަޒީމް އާއެކޭ ބުނަމުން ބަނޑުގައި ފިރުމާލިއެވެ. އުނދުންމަތީ ހުރި ތެލިތަކުން ކާއެއްޗެހި ނަގާ ތަށިތައްޓަށް އަޅަމުން ދިޔައިރު އަޒީމް އިނީ ކަޅި ޖަހާނުލާ މަންޝާގެ ހަރަކާތްތަަކަށް ބަލާށެވެ. ހިކި އަނަރޫފަވެފައިވާ މަންޝާގެ ހަށިގަނޑަށް ބަލަން އިން އަޒީމަށް އޭނާގެ ހަށިގަނޑަށް އައިސްފައިވާ ބަދަލުތައް ކުރިން ދޭހަނުވީ ކީއްވެ ކަމާމެދު ހިތުގައި ސުވާލު އުފެދުނެވެ.
އަޒީމް ކައި ނިމެންދެން މަންޝާ މަޑުކޮށްގެން އިނީ ރިހަ ކޮޅު ހޫނުކޮށްލާފަ ބަދިގެއިން ނިކުންނާށެވެ. ކައިގެން އަތް ދޮންނަން ދިޔަ އިރުވެސް އެދެމެދުގައި އެއްވެސް ވާހަކައެއް ނުދެކެވެއެވެ. އަޒީމް އަތްދޮވެ ނިންމާލުމުން މަންޝާ ތަށިތައް ނަގާ ރިހަފޮދު ހޫނު ކުރުމަށް އަވަސްވެގަތެވެ.
"ނިދާފަ އޮއްވާ ދޯ މިގޮވުނީ..." އާފުރެމުން އަނގަމަތި ނިވާކުރަން އަތް އުފުލާލި މަންޝާގެ މޫނަށް ބަލާލަމުން އަޒީމް އަހާލިއެވެ. "މީ ދެން އެހާވަރު ކަމެއްތަ؟... އަޒީމް ދެން ދޭ ނިދަން...." ހަޑިވެފައިވާ ތަށިތައް ސިންކުތެރެއަށްލާ އިސްކުރު ދޫކޮށްލަމުން މަންޝާ ޖަވާބުދިނެވެ.
ކާގެއިން ނިކުމެގެން ދަމުން ފަހުފަހަރަށް މަންޝާގެ ހަށިގަނޑާ ދިމާއަށް އަޒީމް ބަލާލިއެވެ. ހަށިގަނޑު ހެސަކޮށް މަންޝާ ހުރި ދުވަސްތައް އޭނާގެ ހަނދާނަށް އައެވެ. އެހާ ބޮޑަށް މަންޝާ ހިކެންވީ ސަބަބެއް އަޒީމަކަށް ނުވިސްނުނެވެ. ލައިގެން ހުރި ހެދުން ގައިގާ ނުޖެހެއެވެ. ނަމަވެސް އަދިވެސް މަންޝާގެ ވަނާތަކާ ބައްޓަން އެހާމެ ރީތިވެފައި ފުރިހަމައެވެ.
ދަތްކޮއްޓާ އިލޮށިކޮޅަކުން ދަތްކޮއްޓަމުން އަޒީމް ގޮސް ކޮޓަރީގެ ދޮރު ހުޅުވާލިއެވެ. ފެނުނު މަންޒަރުން އަޒީމަށް ހައިރާންކަމެއް ލިބުނެވެ. މަޑުމަޑުން ދޮރުފަތް ލައްޕާލަމުން އަނދިރިކޮށް އޮތް ކޮޓަރިތެރެއަށް އޭނާގެ ލޯ ހާނުވަން މަސައްކަތްކުރަމުން ކުރިއަށް ޖެހުނެވެ. މުޅި ކޮޓަރިތެރޭ އެއް އަޑެއްހެން އިވެމުންދިޔައީ ނައުރީންގެ ކުކުރުމުގެ އަޑެވެ. ނައުރީންގެ އަޑު ހުރިގޮތުން އަޒީމަށް ހައިރާންކަމެއް ލިބުނެވެ. ނައުރީންގެ ގައިމަތީގައި އަޅާފައިވާ ރަޖާގަނޑުގެ ސަބަބުން އަޒީމަށް ކަމެއް ފެންނަވަރެއް ނުވިއެވެ.
އަޒީމް މަޑުހިނގުމެއްގައި ކުރިއަށް އައިއިރު އޭނާގެ ފައި ޑްރެސިންޓޭބަލްގައި ޖެހުނެވެ. ވީތަދުން އަޒީމަށް އަޑެއްލައްވާލެވުނެވެ. ހަމައެއާ އެކު ނައުރީންގެ އަޑު މުޅިންހެން ކެނޑުނެވެ. މުޅި ކޮޓަރި ތެރެއަށް ހަމަހިމޭންކަން ފެތުރިގެން ދިޔައެވެ. އެނދާ ހަމައަށް އަޒީމް ގޮސް ހުއްޓުނު އިރު އޭނާއަށް ފާހަގަވީ ކުޑަދޮރުގެ ދޮރުފޮތިތައް ވިހުރެމުން ދިޔަކަމެވެ. ދޮރުފޮތި ވަޔާ ވިހުރެންވީ ސަބަބެއް އަޒީމަކަށް ނުވިސްނުނެވެ.
ސައިޑް ޓޭބަލް މަތީ އޮތް އޭނާގެ ނަންބަރު އައިނު ނަގާ ލޮލުގައި އަޅާލަމުން ކުޑަދޮރާ ދިމާއަށް އަޒީމް ބަލާލިއެވެ. ކުޑަދޮރުވަނީ ހުޅުވިފައެވެ. އޭސީ ޖައްސާފަ ހުއްޓާ ނައުރީން ކުޑަދޮރު ހުޅުވީ ކީއްކުރަން ބާއޭ އަޒީމްގެ ހިތަށް އެރިއެވެ. އަވަހަށް ކުޑަދޮރު ލައްޕާލުމަށްފަހު އޮށޯންނަން އަޒީމް އަވަސް ވެގަތެވެ. ގަދައަށް ނައުރީން ނިދާފައި އޮތްކަން އެނގުމުން އަޒީމް އެނދުގައި އޮށޯވެ ގައިމަތީ ރަޖާގަނޑު އަޅަން ރަޖާގެ އެއްފަރާތުގައި ހިފާ ދަމާލިއެވެ. ނައުރީންގެ ހަށިގަނޑުގައި އެއްވެސް ނިވާކަމެއް ނެތްކަން އަޒީމަށް އެނގުމުން ހައިރާންވިއެވެ. އަޒީމް އެކޮޓަރިން ނިކުތްއިރު އޭނާ އޮތީ ހެދުން ލައިގެންކަން އަޒީމަށް އެނގެއެވެ.
ނިތްމަތީ އަތް ބާއްވާލައިގެން އޮވެ އަޒީމް އެކި ކަންކަމާއި ވިސްނަމުން ދިޔައެވެ.
*** *** *** *** *** ***
"މެހެކް... ކީއްވެތަ މޫދަށް ފުންމާލީ..." ފުން ވިސްނުމެއްގެ ތެރޭއިން މެހެކްގެ ހަރަކާތްތަކަށް ބަލަން އިން ޒޯއީ ސުވާލުކޮށްލިއެވެ.
"ރާއިދް މޫދަށް ގެނބޭ ތަން ބަލަން އަހަރެންނަށް ނުހުރެވުނީ.. އޭނަ ސަލާމަތްކުރަން އަހަރެން ފުންމާލީ... އޭނާއަށް އަހަރެން ނުފެންނާނެ... އޭނާ ހޭ ނާރަނީސް އަހަރެން ގޮއްސިން..." ރާއިދް ގެނބެމުން ދިޔަ ތަން ބަލަން ކެތްނުކުރެވިގެން މޫދަށް ފުންމާލީކަމަށް ބުނެ މެހެކް ވާހަކަ ދައްކަމުން ދިޔަ އިރު އޭނާގެ ލޯ މައްޗަށް އެމަންޒަރުތައް ސިފަވަމުން ދިޔައެވެ.
"އަސްލު އަހަރެމެން ދުނިޔެއަށް ފައިބާކަން އެނގިއްޖިއްޔާ ބައްޕަމެން ރުޅިއަންނާނެ..." ޒޯއީ އިސްތަށިގަނޑު ރަނގަޅުކޮށްލަމުން ވާހަކަ ދެއްކިއެވެ
.ފަތިސްވަމުން އައި ވަގުތު ކަމުން ގޭތެރޭގެ ހަމަހިމޭންކަން ނަގާލީ އެއްޗެއް ވެއްޓުނު އަޑެވެ. މެހެކް އާއި ޒޯއީ އެކަކު އަނެކަކުގެ މޫނަށް ބަލަން ހުރުމަށްފަހު މިވަގުތު ހޭލާ އުޅެނީ ކާކުތޯ ޔަގީންކުރަން ބޭރަށް ނިކުތެވެ. ކޮޓަރިން ބޭރަށް ސިއްރުސިއްރުން ބޯދިއްކޮށްލުމަށްފަހު ދެކުދިން ވިސްނާލިއެވެ. މިފަދަ ވަގުތެއްގައި ހޭލައި އެއުޅެނީ ކާކު ހެއްޔެވެ. ގޭގެ މައިދޮރު އެކީ ނުލެއްޕި ހުރިތަން ފެނުމުން ޒޯއީއަށް ކޮންމެވެސް މީހަކު ބޭރަށް ދިޔައީކަން ޔަގީން ވިއެވެ.
އަޑެއްނީވެނެހެން މަޑުމަޑުން ޒޯއީ ކުރިއަށް ހިނގައިގަތެވެ. ޒޯއީގެ ފަހަތުން މެހެކް ދިޔައިރު އޭނާގެ ހިތް ބާރުބާރަށް ތެޅެމުން ދިޔައެވެ. ޒޯއީ ހުއްޓުވަން މެހެކް މަސައްކަތް ކުރިއެވެ. ޒޯއީގެ އަތުގައި ހިފަމުން ކޮޓަރިއަށް ދާން ހިނގާށޭ މެހެކް ބުނީ ކަމެއް ގޯސްވެދާނެތީއެވެ.
ގެއިން ބޭރަށް ދެކުދިން ނިކުމެ ބޭރު ބަލައިލިއެވެ. މަޑުހިނގުމެއްގައި ޒިބާން ދާ މަންޒަރު ފެނުމުން ޒޯއީއަށް ހައިރާންކަމެއް ލިބުނެވެ. މިފަދަ ވަގުތެއްގައި އޭނާގެ ބައްޕަ އެދާ ތަނެއް އޮޅުން ފިލުވަން ބޭނުންވިއެވެ. ޒިބާންގެ ފަސްފަހަތުން ޒޯއީއާ މެހެކް ހިނގަމުން ދިޔައެވެ. ޒިބާންގެ ހަށިގަނޑުން މައްޗަށް އުފުލެން ފެށުމުން ދެކުދިން ބަލަން ތިއްބެވެ. ވާން އުޅެނީ ކިހާވަރެއްގެ ކަމެއްކަން އެކުދިންނަކަށް ނޭނގުނެވެ. ޒިބާންގެ މިސްރާބު ހުރީ ދުނިޔެއާ ދިމާއަށެވެ. ޒޯއީ ކުރިއަށް ޖެހިލަމުން މެހެކްއަށް އޭނާ އަތް ދިއްކޮށްލި އަތުގައި ހިފާށޭ ބުނާ ފަދައިންނެވެ. ނަމަވެސް މެހެކް ދެއަތަށް ބޯ ހޫރުވާލީ އޭނާގެ ބައްޕަގެ ފަހަތުން ދާން ފަސްޖެހޭތީއެވެ.
މެހެކް މަޑުކުރަން ބޭނުންވާކަމަށް ބުނެ ގެއާ ދިމާއަށް ބަލާލީ ޖެހިލުންވެ ހުރެއެވެ. "މަންމައަށް ބަލާތި... އަހަރެން ގެއަށް އަންނަންދެން މެހެކް ގޭގަ މަޑުކުރޭ..." ޒިބާންގެ ފަހަތުން ދާން އަވަސްވެގަންނަމުން ޒޯއީ ވާހަކަ ދެއްކީ ވަރަށް އަވަސްއަރުވާލަމުންނެވެ. ޒޯއީ ދިޔަ ދިމާއަށް ބަލަން މެހެކް ހުރީ މޭގައި އަތް އަޅައިގެންނެވެ.
ޒިބާންގެ ފަހަތުން އޭނާއަށް ނުފެންނާނެހެން ދުރުދުރުން ޒޯއީ ދަތުރު ކުރަމުން ދިޔައިރު އޭނަގެ ބައްޕަ ދުނިޔެއަށް ދާން ޖެހޭ ސަބަބު އޭނާ ދެނެގަންނަން ބޭނުންވިއެވެ. އާއިލާ އެންމެންވެސް ވަނީ އެކުދިންނަށް ދުނިޔެއަށް ފައިބެ އުޅެން މަނާކޮށްފައެވެ. އެކަމުގެ އަޑީގައި ބޮޑު ސިއްރެއް ވާނެކަމަށް ޒޯއީ ގަބޫލު ކުރެއެވެ. ދުނިޔޭގެ ވަށާ ލެވިފައި ވައިގެ ފަށަލަތައް ފޫދުއްވަމުން އެމީހުންނަށް ތުނި ވިލާތަކާ ހަމައަށް ވާސިލް ވެވުނެވެ. އޭރު ފެންނަން އޮތް ރީތި ފެހިކަން ގަދަ ރަށާ ދިމާއަށް ޒޯއީގެ ނަޒަރު ހުސްކޮށްލެވުނެވެ. މަތިން އެ މަންޒަރު ފެންނަ އިރު ވަރަށްވެސް ހިތްގައިމެވެ.
ކާށިދޫގެ މަލަމައްޗަށް ބަލަންހުރި ޒޯއީއަށް ތަފާތުކަމެއް އިހްސާސްވަމުން ދިޔައެވެ. ރަށުގެ ތުނޑިއާވީ ހިސާބަށް ޒިބާން ތިރިވަމުން ދިޔައިރު އޭނާގެ ފަހަތުން ޒޯއީ އައިސް ހުރިކަން ޒިބާނަކަށް ނޭނގެއެވެ. އެއްގަމުން ފެންނަމުން ދިޔަ ބިޔަ ބެރެބެދިގަހާ ޒިބާން ގާތްވެލިއެވެ. ފަސްފަހަތުން މީހެއްގެ ހިލަމެއްވީހެން ހީވުމުން ޒިބާން ފަސްއެނބުރި ބަލާލިއެވެ. މީހަކު ފެންނަން ނެތްކަން އެނގުމުން އޭނަގެ ހިތަށް ހަމަޖެހުމެއް ލިބުނެވެ. ގަސްދަށަށް ވެރިފައިވާ މާތަކަށް ނަޒަރު ހިންގާލަމުން ޒިބާން އިސްއުފުލާލިއެވެ. ގަހުގެ ހިޔަލުގެ ދަށުގައި ހުރިއިރު ޒިބާންގެ ލޮލަށް ކަރުނަ ޖަމާވަމުން ދިޔައެވެ. މަޑުމަޑުން ޒިބާންގެ ދޫ ހަރަކާތްކޮށްލިއެވެ.
"މަންޝާ... އަޅެ އެންމެ ފަހަރަކު ނަމަވެސް އަހަރެންގެ ނަމުން ގޮވާލަބަލަ... މަންޝާ ފެނޭތޯ ވިހި އަހަރު މަސައްކަތް މި ކުރީ... މަންޝާއާ ނުލާ އުޅުމަކީ ހާދަ ބޮޑު ވޭނެކޭ... އަހަރެންގެ ހިތް ކުދިކުދިވެއްޖެ... ޒޯއީ އާއި މެހެކް އެއީ އަހަރެންގެ ހުރިހާވެސް ހިތްވަރަކީ... މަންޝާއާ ނުލާ ދުވަސްތައް ހޭދަކުރަން ހާދަ އުނދަގުލޭ..." ޒިބާންގެ ލޮލުން އޮހެމުންދިޔަ ކަރުނަތައް ހިފަހައްޓާކަށް އޭނަ މަސައްކަތެއް ނުކުރެއެވެ. އޭނާ ބޭނުންވީ ގަދައަށް ރޯށެވެ. އޭނާގެ ހިތުގެ އުދާސްތައް ބޭރުކުރާށެވެ.
(ނުނިމޭ)
