މި އަހަރަށް ހާއްސަކޮށް ދިވެހިންގެ މެދުގައި ގުޅުން ބަދަހި ކުރުމުގެ ސަގާފަތާ ގުޅުވާލައި އުރީދޫ މޯލްޑިވްސް އިން "ޓީ ވިތު އުރީދޫ" ކަލަންޑަރު ނެރެފިއެވެ.
މިއަހަރު އުރީދޫ ކަލަންޑަރު ނެރެފައިވާ އިރު ޑެސްކް ކަލަންޑަރުގެ އިތުރުން ފާރުގައި އަޅުވާ ކަލަންޑަރަކާއި ޑިޖިޓަލް ކަލަންޑަރެއް ވެސް ވަނީ ތައާރަފްކޮށްފައެވެ.
އުރީދޫ މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު ހާލިދު އަލް ހަމާދީ ވިދާޅުވީ، އެ ކުންފުނިން ގަބޫލުކުރާ ގޮތުގައި ގުޅުންތަކަކީ ހަމައެކަނި ޓެކްނޮލޮޖީގެ ޒަރީއާއިން ބަދަހިވާ އެއްޗެއް ނޫން ކަމަށެވެ. ސައި ބުއިމުގެ ސަގާފަތަކީ ދިވެހިން އެކަކު އަނެކަކާ ގުޅުން ބަދަހިވުމުގެ އެއް މެދުވެރިއެއް ގޮތުގައި ފާހަގަކޮށް މިއަހަރުގެ ކަލަންޑަރު ހާއްސަކޮށްލާފައި ވަނީ އެ ސަގާފަތަށް ކަމަށް އޭނާ ވިދާޅުވިއެވެ.
މުހިންމު ގިނަ ވަގުތުތަކުގައި، އޮފީސް މަސައްކަތުގައި ވިޔަސް، ރައްޓެހިންނާއެކު ނުވަތަ އާއިލާ އެކު އެއްވެ ވަގުތު ހޭދަކުރާ އިރު ސައި ބުއީމަކީ ދިވެހިންގެ ތެރޭގައި ހިމެނޭ މުހިއްމު އާދަކާދައެއްގެ ގޮތުގައި ހާލިދު ފާހަގަކުރެއްވިއެވެ. އެގޮތުން މިއަހަރުގެ ކަލަންޑަރުގައި ބޭނުންވީ އެ ސަގާފަތް ދިރުވާ އާލާކުރުން ކަމަށް ވެސް އޭނާ ވިދާޅުވިއެވެ.
ކޮންމެ އަހަރަކު ވެސް އުރީދޫން ނެރޭ ކަލަންޑަރަކީ ތަފާތު ކަލަންޑަރެއް ގޮތުގައި ފާހަގަކޮށްލެވެއެވެ. މި އަހަރު ދިވެހިންނާ ގުލޭ ގޮތަށް ސައި ބުއިމުގެ އާދަކާދައާ ގުޅުވާލާފައިވާ މި ކަލަންޑަރުގައި ކޮންމެ މަހަކު ވެސް ތަފާތު ސައިގެ ބާވަތެއް ހިމަނާފައިވެއެވެ. އެގޮތުން ރާއްޖޭގެ އެކި ކަންކޮޅުތަކުގައި ލިބެން ހުންނަ މޭވާ އަދި މާމެލާމެލި ރަހަތައް ހިމޭ ސައިތައް މި ކަލަންޑަރުން ފެނިގެން ދާނެއެވެ.
