މުހައްމަދު އުމަރު މަނިކު (އެމްޔޫ މަނިކު) އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.
ދިވެހިރާއްޖޭގެ ފަތުރުވެރިކަމުގެ އެއް ބާނީ އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ ޗެއާމަން އެމްޔޫ މަނިކު އަވަހާރަވީ އާލާސްކަންފުޅު ބޮޑުވެ، ސިންގަޕޫރުގެ ހޮސްޕިޓަލެއްގެ އައިސީޔޫގައި ފަރުވާ ދެނިކޮށް ރޭ ފަތިހުއެވެ.
އެމްޔޫ މަނިކު އަވަހާރަވުމާ ގުޅިގެން ރައީސް އެކްސްގައި ހިއްސާ ކުރެއްވު ޕޯސްޓެއްގައި ވިދާޅުވީ، ރާއްޖޭގެ ފަތުރުވެރިކަން މިއަދާ ހަމައަށް ތަރައްޤީވެ ކުރިއަރައި ދިޔުމުގައި އެމަނިކުފާނު ކުރައްވާފައިވަނީ، ތައުރީފް ހައްގު މަސައްކަތްޕުޅުތަކެއް ކަމަށެވެ.
އަދި ރާއްޖެއަކީ ދުނިޔޭގެ ފެންވަރުގައި ފާހަގަކޮށްލެވޭ ފަތުރުވެރިންގެ ހާއްސަ މަންޒިލަކަށް ހެއްދެވުމުގައި އެމަނިކުފާނު ކުރެއްވި ބުރަ މަަސައްކަތްޕުޅުތަކާއި، އަދާކުރެއްވި ދައުރު ނުހަނު ބޮޑު ކަމަށް ވެސް އެމަނިކުފާނު ވިދާޅުވިއެވެ.
މުހައްމަދު އުމަރު މަނިކުގެ ޣައިބަޑް ކުރެވޭ ކަށުނަމާދު މިއަދު އަސްރު ނަމާދަށްފަހު އިސްލާމީ މަރުކަޒުގައި ކުރުމަށް ވަނީ ހަމަޖެހިފައެވެ.
އެމްޔޫ މަނިކު އެންމެފަހުން އަދާކުރައްވާފައި ވަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޗެއާމަންގެ މަގާމެވެ. އެ މަގާމުން އިސްތިއުފާދެއްވާފައި ވަނީ މިދިޔަ އަހަރުގެ ޖެނުއަރީ މަހުގެ ތެރޭގައެވެ. އެމްއޭސީއެލްގެ ބޯޑާ 2013 ވަނަ އަހަރު ގުޅިވަޑައިގެން އެމްޔޫ މަނިކު ވަނީ އެމްއޭސީއެލްއަށް 10 އަހަރު ހިދުމަތް ކުރައްވާފައެވެ.
އެމްޔޫ މަނިކުއަކީ ޔުނިވާސަލް އެންޓަޕްރައިސަސް ލިމިޓެޑްގެ ޗެއާމަންއެވެ. އެމަނިކުފާނަކީ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީޒް (މަޓީ)ގެ ކޯ-ފައުންޑާ އަދި ޗެއާމަންވެސް މެއެވެ. މީގެއިތުރުން އެމަނިކުފާނު ވަނީ ސަރުކާރުގެ އިސް މަގާމުތައް ވެސް އަދާކުރައްވާފައެވެ.
1982 ވަނަ އަހަރު އެމްޔޫ މަނިކަށް ފަތުރުވެރިކަމުގެ ދާއިރާއިން އާންމު ހިދުމަތުގެ ހިތްވަރު ދިނުމުގެ އިނާމު ލިބިވަޑައިގެންފައިވާއިރު އެ މަނިކުފާނަށް ވަނީ އެ ދާއިރާއިން 2002 ވަނަ އަހަރު ޝަރަފުވެރި ކަމުގެ އިނާމު ލިބިވަޑައިގެންފައެވެ. މިނިވަން 25ގެ އާންމު ހިދުމަތުގެ އިނާމުވެސް އެމަނިކުފާނަށް ވަނީ ލިބިވަޑައިގެންފައެވެ.
