"ނޫން... އަހަރެންނަކަށް ނުކެރޭނެ ތާރާއާ ކުރިމަތިލާކަށް... ތާރާ ދެއްކި ވާހަކަތައް އަހަރެން ހަނދާން އެބަހުރި... އޭނަ އަހަރެން ދެކޭކަށް ބޭނުމެއް ނޫން..." ފޮށިތަކުގައި ޓޭޕް އަޅާ ނިންމާލުމަށްފަހު ގޮނޑީގައި އިށީނދެ އިކާން ހަމަޖެހިލިއެވެ. ފޯނުގެ ސްކްރީން އޮންކޮށްލުމަށްފަހު ސްކްރީންގައިވާ އިކާނާ ތާރާގެ ކައިވެނި ޕާޓީގެ ފޮޓޯއަށް ބަލަން އިނދެ އިކާންގެ އަތުން އެ ތަސްވީރުގައި ފިރުމާލެވުނެވެ. އެންމެ ފަހު ފަހަރަށް ތާރާއާ އިކާނާ ދެމެދު ދެކެވުނު ވާހަކަތައް އިކާންގެ ސިކުނޑިތެރޭގައި ވަށާލިއެވެ.
*** *** *** *** *** ***
"ދައްތަ ދޯ އެކްސްއޯ އަކީ... އަހަރެމެންގެ ކައިވެންޏަށް ފަހުވެސް ދައްތައާ މީޓްކުރިންތަ؟..." ރީތިވާ މޭޒުމަތީ ހުރި ޓީޝޫ ފޮށިން ޓިޝުލެއް ނަގަމުން ތާރާ ވާހަކަ ދެއްކީ ޒުމްރާއާ އިކާންގެ ގުޅުން އޮތް ހިސާބު އޮޅުން ފިލުވާށެވެ. އިކާން ބޯ ޖަހާލީ ކުށްވެރިއެއް ފަދައިންނެވެ.
"އާން.. އެކަމަކު އަހަންނަކަށް އޭރު ނޭނގޭ އެއީ ތާރާގެ ދައްތަ ކަމެއް... ކައިވެނި ޕާޓީގެ ވީޑިއޯ ފެނުމުން އެއީ ތާރާގެ ދައްތަކަން އެނގުނީ... ސޮރީ ތާރާ އަހަންނަށް މާފް ކުރޭ... އަހަރެން އެހެން ނޫޅޭނަން... އަހަރެމެންގެ ދަރިފުޅައްޓަކާ ވެސް..."
"އިކާން... އަޅެ... ކީއްވެ ކައިވެންޏަށްފަހު އެހެން އުޅުނީ... އެއީ އިކާންގެ ޕާސްޓް ނަމަވެސް އަހަންނަށް މާފް ކުރެވުނީސް... އެކަމަކު އިކާން ކައިވެންޏަށްފަހު އެހެން އުޅުނީ.. އަދި އެވެސް ދައްތައާ އެކީ.. ޗީ... އިކާނަށް އެއީ އަހަރެންގެ ދައްތަކަން ނޭނގުނު ނަމަ އަދިވެސް އެފަދަ ސިއްރު ގުޅުމެއް ހިނގާނެއޭ ދޯ ތިބުނީ..... އަހަރެން މާފެއް ނުކުރާނަން.. އިކާން ތިކުރީ މާފް ލިބޭ ކަހަލަ ކަމެއް ނޫން.. އަހަރެން ކޮންކަމެއް ނުކޮށް ދެނީ... އެކްސްއޯ ގެ ކަންތައް އަހަންނަށް އެނގޭ... އެކަމަކު އެންމެ ފަހަރަކު ވެސް އެއީ ދައްތަ ކަމަކަށް ހިއެއް ނުކުރަން... އަހަރެން ހީކުރީ އެއީ ޒިވީއޭ.. އިކާންގެ ޕާސްޓޭ..." ޑްރެސިންގް ޓޭބަލް މަތީ ދެއަތް ވިއްދާލަމުން ތާރާ ވާހަކަ ދެއްކީ އޭނާއަށް ކޮޅަށް ހުންނަން އުނދަގޫވީމައެވެ.
ފުން ނޭވާއެއް ބޭރުކޮށްލުމަށްފަހު އެ ކޮޓަރީގައިވާ ހަމަހިމޭންކަން ނަގާލީ ތާރާއެވެ. "އިކާން... އަހަންނަށް ދެން އިކާނާ އެކީ ނޫޅެވޭނެ... އަހަންނަށް ކަމެއް ކޮށްދެންޏާ... އަހަރެންނާ ކޮންޓެކްޓް ނުކުރިއްޔާ ރަނގަޅީ... އަހަރެން ކުރިމައްޗަަށް އިކާން އަންނަ ކޮންމެ ފަހަރަކު އިކާންވީ ބޭވަފާތެރިކަން ހަނދާން ވަނީ... އަހަރެން ވެސް މީ އިންސާނެއް... އެދުވަސް ހަނދާންކޮށް ހިތާމަ ކުރާކަށް އަހަރެން ބޭނުމެއް ނޫން... މި ކުއްޖާއަށް ވެސް ރަނގަޅު ވާނީ އިކާންގެ ހިޔަނިވެސް ނޭޅުނިއްޔާ... މިގޭން އިކާން ދޭ... ދާށޭ.." ނުރޯން މަސައްކަތް ކުރަމުން ތާރާ ވާހަކަ ދެއްކީ ވަރަށް ހިތްވަރުކޮށްގެން ހުރެއެވެ.
ތާރާގެ ލޮލުން އޮހެމުން ދިޔަ ކަރުނަތައް ފޮހެދޭން އިކާން ބޭނުންވި ނަމަވެސް ތާރާއާ ގާތްވާކަށް އިކާނަކަށް ނުކެރުނެވެ. އިސްޖަހައިގެން ހުރެ ތާރާގެ ގެއިން އިކާން ނުކުމެގެން ދިޔައީ ތާރާ ކުރިމައްޗަށް ނުދާނަން ކަމަށް އަޒުމްކަނޑައަޅައިގެންނެވެ. ހިތްމަތީ ގާބުރިއެއް ބާއްވައިގެން ހުރެ އެ ދިޔަ ގޮތަށް އިކާން ދިރިއުޅެމުން އައީ އޭނާގެ ސްޓޫޑިއޯގައެވެ. ލިބުނު ހިތާމައާ ހިތްދަތިބކަމުގައި އެކަނި ދުވަސްތައް ހޭދަކުރަމުން ދިޔައިރު ވަގުތުން ވަގުތަށް ނަމާދުކޮށް ޒިކުރުކުރުން ނޫންކަަމެއް އިކާން ނުކުރެއެވެ. ތާރާއަށް އުފާވެރި ދިރިއުޅުމެއް ލިބުމަށާއި ޒުމްރާއަށް ހެޔޮމަގު ދެއްކެވުމަށް އެދި އިކާން ދުއާ ނުކުރާ ވަގުތެއް ނާދެއެވެ.
*** *** *** *** *** ***
"ރަށަށް ދިޔުން ހަމަޖެހިފަ އިނީ މާދަމާ... ސޯ ގުރައިދޫއަށް ދަންޏާ މިއަދު ދާން ޖެހޭނެ... އެކެއްވޖަހާއިރު އޮންނަ ފެރީގަ ދާން ހިނގާ... އަަހަރެންގެ ރައްޓެއްސެއް އެކޮޅުގަ އުޅޭނެ..." އިކާންގެ ކޮނޑުގައި ހިފާލަމުން ފިޒާމް ވާހަކަ ދެއްކީ އިކާން ގެއްލިފައި އިންހެން ހީވުމުންނެވެ.
"ހިނގާ ދަމާ..." ގޮނޑިން ތެދުވެ ބޯކޮށް ފަޅާފައިވާ ތުންބުޅީގައި އަތް ހާކާލަމުން ފުންނޭވާއެއް އިކާން ބޭރުކޮށްލިއެވެ. އެ ސްޓޫޑިއޯގައިވާ އިކާންގެ ސާމާނުތައް ފޮށިތަކަށް އަޅާ ބަންދުކޮށް ނިމުނީއެވެ.
މާލެއިން ގުރައިދޫއަށް ދަތުރުކުރާ ފެރީގައި އިން އިރު ބުނެދޭން ނޭނގޭ ކަަލަ އުނދަގޫތަކެއް އިކާނަށް އިހްސާސް ކުރެވުނެވެ. އެތައް ދުވަސްތަކަކަށްފަހު ޒުމްރާއަށް ބައްދަލުކޮށްލަން އޭނާ ހުރީ ބޭނުންވެފައެވެ. ޒުމްރާގެ ހާލު ބަލާ ނުލާ ފުރައިގެން ދާން އޭނާ ބޭނުން ނުވީއެވެ.
ކ. ގުރައިދޫގެ ބަނދަރަށް ފެރީ ގާތްކުރުމުން ފިޒާމް ގޮނޑިން ތެދުވެ އިކާނަށް ބަލާލިއެވެ. އެ ފެރީގައި ތިބި އެންމެން ފޭބި އިރު ވެސް ތެދުވަން ބޭނުން ނުވެފައި އިކާނަށް އިނދެވުނީ ކީއްވެކަމެއް ނޭނގެއެވެ. ހިޔާލަކަށް ގެއްލިފައި އިންހެން އިކާން އިނީ ހުއްޓުން އަރާފައެވެ.
"ހިނގާ ދާން... އަހަރެންގެ ރައްޓެއްސެއް އެހުރީ ބަލާ އައިސް..." ދެޖީބަށް އަތް ޖަހައިގެން ތޮށިގަނޑުމަތީ ހުރި ޒުވާނާއަށް އިޝާރާތްކޮށްލަމުން ފިޒާމް ވާހަކަ ދެއްކިއެވެ. ބޯޖަހާލަމުން އެފެރީއިން ފޭބުމަށްފަހު އެރަށުގެ މަލަމައްޗަށް އިކާން ނަޒަރު ހިންގާލިއެވެ.
ހާއްސަ އެހީއަށް ބޭނުންވާ މީހުންގެ މަރުކަޒަށް އާދެވުމުން ފިޒާމްގެ އެކުވެރިޔާ އެތަނަށް ވަދެ އެމީހުންނަށް ޒުމްރާއާ ބައްދަލު ކުރެވޭނެ ގޮތް ހަމަޖައްސައިދިނެވެ. އެތަނުގައި މަސައްކަތް ކުރާ މުވައްޒަފަކާ އެކީ އިކާން އެތެރެއަށް ވަންނަން ހިނގައިގަތުމުން ފިޒާމް ބޭރުގައި މަޑުކުރިއެވެ. ހަތް މަސް ފަހުން ޒުމްރާއާ ބައްދަލުކުރަން އިކާނަށް އާދެވުނު ފުރަތަމަ ދުވަހަށް ވީތީ އެމީހުންނަށް އެކަހެރި ވަގުތުކޮޅެއް ދޭން ފިޒާމް ބޭނުންވިއެވެ.
މަރުކަޒުގައި ބަލިމީހުން ދިރިއުޅޭ ކޮޓަރިބަރިން އެތެރެއަށް ވަދެގެން ދިޔައިރު ދެފަރާތުގައި ހުރި ކޮޓަރިތަކާ ދިމާއަށް އިކާން ބަލަމުން ދިޔައީ ޒުމްރާ ދެކޭ ހިތުން ކެތްމަދުވެފައި ހުރުމުންނެވެ. ޒުމްރާއަށް ދެރަގޮތެއް ވާކަށް އިކާން ބޭނުމެއް ނޫނެވެ. ރަނގަޅު މަގާ ހެޔޮވިސްނުން ޒުމްރާއަށް ދެއްވާތޯ އިކާން އަބަދުވެސް ދުއާ ކުރެއެވެ.
ހިނގަމުން ދިޔަ ކޮރިޑޯގެ އެންމެ އެތެރެއިން ފެންނަން ހުރި ދޮރު ހުޅުވާލުމަށްފަހު ޒުމްރާ ދައްކާލަމުން އެ މުވައްޒަފު ބޭރުގައި މަޑު ކުރިއެވެ. ކޮޓަރިތެރެއަށް އިކާން ވަދެ ވަށައިގެން ބަލާލިއެވެ. އެއީ ވަރަށް ކުޑަ ކޮޓަރިއެކެވެ. އާދައިގެ އެނދަކާ ކުޑަ ކަބަޑެއް ބަހައްޓާފައިވާ އެ ކޮޓަރީގެ އެއްފަރާތެއްގައި ހުރި ކުޑަދޮރު ކައިރިއަށް އިކާންގެ ނަޒަރު ހުސްކޮށްލެވުނެވެ.
ޒުމްރާ ހުރީ އެކުޑަދޮރު ކައިރީ ބޭރު ބަލާށެވެ. ނޫކުލައިގެ ގަޔަށް ދޫހެދުމެއްގައި ހުރިއިރު ޒުމްރާގެ އިސްތަށިގަނޑު ވަނީ އެއްވެސް ތަރުތީބެއް ނެތި ނިއުޅުވާލާފައެވެ. ކުޑަދޮރުން ބޭރުބަލަން ހުރެ ޒުމްރާ ވާހަކަ ދައްކަމުން ދިޔައީ އެކަނިމާ އެކަންޏެވެ.
އިކާން ކުރިއަށް ޖެހިލީ ޒުމްރާ ކިޔާއެއްޗެއް ސާފުވާނެހެން އަޑުއިވޭތޯއެވެ. "އިކާނާ ނުލާ އަހަންނަކަށް ނޫޅެވޭނެ.. އިކާން ދިޔައީ ކީއްވެ... އަހަރެން އެކަނިކޮށްލާފަ.. ބާކީ ކޮށްލާފަ... އަހަރެމެން ދެތަން ވިޔަސް އަހަރެން ލޯބި ވަނީ އިކާން ދެކެ.." އިވެމުން ދިޔަ ބަސްތައް އަޑުއަހަން ހުރި އިކާންގެ ލަގޮނޑީގައި ރިއްސާލިއެވެ. ޒުމްރާއަށް ގޮވާލަން ބޭނުންވި ނަމަވެސް އިކާންގެ ދުލުގައި ތަޅެއް ލެވުނު ކަހަލައެވެ.
ޒުމްރާއާ ކުރިމަތިލާނެހާ ހިތްވަރު އިކާންގެ ގައިގާނެތީއެވެ. އެ ކޮޓަރީގައި މަޑުކުރަން އިކާނަށް ކެތްނުވާނެތީ އިކާން ބޭނުންވީ އެތަނުން ދާށެވެ. މިހާ ހިސާބަށް އިކާނަށް އާދެވުނީ ވަރަށް ހިތްވަރުންނެވެ. ލޮލުން ފައިބަމުން ދިޔަ ކަރުނަތައް އަތުގެ ނުފުށުން ފޮހެލުމަށްފަހު ޒުމްރާ ނޭފަތް ދަމާލިއެވެ. އޭނާގެ ކުރަކި ވެފައިވާ އަޑުން ރާގެއް އަޅުވާލުމުން ކޮޓަރިން ނުކުންނަން އިކާން އެޅި ފިޔަވަޅު ހުއްޓުނެވެ. މަޑުމަޑުން ޒުމްރާއާ ދިމާއަށް ބަލާލިއިރު އޭރުވެސް އޭނާ ހުރީ ކުޑަދޮރުން ބޭރަށް ބަލާށެވެ.
ޒުމްރާ އެކިޔަނީ އިކާންއަށް އެންމެ ރީތި އެއްލަވައެވެ. ތާރާއާ ވަކިވި ހިސާބުން އިކާން ލަވައެއް ނުކިޔައެވެ. އަޑެއްވެސް ނާހައެވެ. ލަވައިގެ ދުނިޔެއިން އިކާން ވަކިވެގެން ދިޔައީ އެކަމުން ކުރިއަށް ދާން އިކާން ބޭނުން ނުވާތީއެވެ.
"އެ ހޯދި އުފާތަކާ، އެ ރޭތައް ގެއްލުނީ ނަޔާ މޫސުމް ބަހާރު، މިލާ ގޮސް މޯޅިވީ... އެ ވީ މަޖްބޫރުގާ. ދެތަން އަދު ވެއްޖެޔޭ. އުފާތައް ގެއްލިފާ ވަށާލީ ބަނަކަމޭ. އުދާހާ ކަރުނަޔާ ވަނީ މިހަޔާތުގާ ނިމެން ވީހޭ ވޭނުން... މި ވޭނުން..."
ޒުމްރާގެ އަޑުން އެލަވައިގެ ފަހު ބައިތުތައް އިވުމުން އިކާންގެ ދެލޯ ކަރުނުން ފުރުނެވެ. މިއަދު ޒުމްރާ އެވަނީ މުޅި ދުނިޔެއިން ބާކީ ވެފައެވެ. އަޅާލާނެ އާރެއް ޔާރެއް ނެތް މީހަކަށް ވެފައެވެ. ހިންދިރުވާލުމަށްފަހު އިކާން ވާހަކަ ދައްކަން އަނގަހުޅުވާލިއެވެ. "ޒުމް... ޒުމްރާ..."
މޫނުމައްޗަށް ވެއްޓިފައިވާ ކުރު އިސްތަށިތައް އެއްފަރާތްކޮށްލަމުން އިކާނާ ކުރިމަތިލާން ޒުމްރާ އެނބުރިލިއެވެ. ޒުމްރާއަށް ކުރިމަތީ ހުރީ ހިކިވެ އަނަރޫފަވެފައިވާ ޒުވާނެކެވެ. މީހާގެ މޫނުމަތި ނުފެންނަ ވަރަށް ތުނބުޅިފަޅާފައިވާ އިރު އިކާންގެ ހެދުން އެޅުމާ ސްޓައިލް ހުރިގޮތުން ޒުމްރާއަށް އެއީ ކާކުކަން ދެނެގަންނާކަށް ނޭނގުނެވެ.
"ތީކާކު... އަހަރެން ބުނީ މިތަނަށް އިކާން ގެނެސްދޭށޭ... ތީ ކާކުހޭ..." ދެލޯ އަޅާލަމުން އިކާން ކައިރިއަށް ޒުމްރާ ފިޔަވަޅު އަވަސްކޮށްލިއެވެ.
"ޒުމް.. މީ އަހަރެން.. މީ އިކާނޭ..." ޒުމްރާގެ ދެއަތުގައި ހިފަމުން އިކާން ވާހަކަ ދެއްކި އިރު އިކާނަށް ރަނގަޅަަށް ވެސް ރޮވިއްޖެއެވެ.
"ނޫން... ނޫން.. ކަލޭ މިތަނުން ދޭ.. އަހަރެންގެ އިކާން ގެނެސްދީ... އިކާން ގެނެސްދީ... އިކާން... އަހަރެން ބާކީ ވެއްޖެ.. އިކާން.. އަހަރެން ދޫކޮށްލާފަ ދިޔައީ... އަހަރެން އެކަނިކޮށްލާފަ އެންމެން ދިޔައީ... ކަލޭ މިތަނުން ދޭ... މިތަނުން ދާށޭ.. އިކާން ގެނެސްދީ... އިކާން ހުރިތަކުން ހޯދައިގެން ގެނެސްދީ..." އިކާންގެ ގަމީހުގައި ހިފަހައްޓައިގެން ހުރެ ޒުމްރާ ހަޅޭއްލަވަމުން ދިޔައީ މޮޔައެއްހެންނެވެ.
ޒުމްރާ ހަމައަކަށް އަޅުވަން އިކާން މަސައްކަތް ކުރި ނަމަވެސް އިކާން ދައްކަމުންދިޔަ އެއްވެސް ވާހަކައެއް ޒުމްރާއަށް ނީވޭ ކަހަލައެވެ. ޒުމްރާގެ އަޑުގަދަވަމުން ދާތީ އިކާން ހާސްވިއެވެ. އެވަގުތު ކޮޓަރިއަށް ވަދެގެން އައި ޑޮކްޓަރުންނާ ނަރުހުންގެ ޓީމް ޒުމްރާގެ އަތުގައި ހިފަހައްޓައިގެން އިކާނާ ދުރުކުރަން މަސައްކަތް ކުރިއެވެ. ގަދަ ބާރުން ޒުމްރާ ދުރުކުރުމަށްފަހު އިކާން ގާތު ބޭރަށް ދާށޭ ޑޮކްޓަރު ބުނެލުމުން އިކާން އިސްޖަހާލިއެވެ. އޭރުވެސް ޒުމްރާގެ ގަޔަށް ބާރު އަރުވަމުން އަޑުގެ ނެތްތަނަށް ހަޅޭއްލަވަމުން ދިޔައެވެ.
"އިކާން.. އިކާން... އިކާން.. އާދޭ.. އަހަރެން މިތަނުން ގެންދޭ... އިކާން... އަހަރެން މަރުވެދާނެ... އިކާން ގެނެސްދީބަލަ... ކޮބާހޭ އިކާން..." ޒުމްރާ ރޮމުން ގޮވަމުން ދިޔައީ އިކާނަށެވެ. އިކާން ފެނުމުންވެސް ޒުމްރާއަށް އެއީ ކާކުކަން ވަކި ކުރަން ނޭނގުނެވެ.
އިސް އޮބާލައިގެން ހުރެ އިކާން އެތަނުން ނިކުންނަން ހިިނގައިގަތީ މަންޒިލެއް ނެތް އޮޑިއެއް ފަދައިންނެވެ. އިކާން ބޭނުންވީ އޭނާގެ ރައްޓެހިންނާއި އާއިލާ މީހުންނާ ދުރަށް ދާށެވެ. މުޅި ދުނިޔެއިން އެކަހެރިވާށެވެ. އޭނާގެ އަމިއްލަ ނަފްސު ގަބޫލުކުރަމުން ދިޔައީ އޭނާއަކީ ބާކީ ވެފައިވާ މީހެއްގެ ގޮތުގައެވެ. އެކަނިވެރިއެއްގެ ގޮތުގައެވެ. އޭނާގެ އަތުގައި އަޅާފައިވާ ޗޭނަށް ބަލާލުމަށްފަހު އިކާންގެ ދެލޯ މަރާލުމށް ފަހު ކުރިއަށް ހިނގައިގަތެވެ.
(ނިމުނީ)
