ރިޔާސީ އިންތިހާބުގައި ވެވަޑައިގެންނެވި ވައުދުތަކަށް އަމަލީ ސިފަ ގެނައުމަކީ އަމާޒެއް ކަމަށާއި މާލޭގައި އަރާމުގައި ތިބުމުގެ ބަދަލުގައި ވަޒީރުންނާއެކު ރަށްރަށަށް ވަޑައިގަންނަވަނީ ސީރިއަސް މަސައްކަތްތަކެއް ކުރައްވައި އަވަސް ނަތީޖާއެއް ނެރެދެއްވުމަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، ހއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ހއ. މާރަންދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. ރިޔާސީ އިންތިހާބުގައި އެ ރަށަށް ވަޑައިގެން ވެވަޑައިގެންނެވި ވައުދުފުޅުތައް ހަނދުމަފުޅު ހުންނެވިކަން ހާމަ ކުރައްވަމުން ރައީސް ވަނީ، ކުރިން ފަށާފައިވާ މަޝްރޫއުތަކާއި ސޮއިކޮށްފައިވާ މަޝްރޫއުތަކެއް މާރަންދޫގައި ވެސް ކުރިއަށް ނުގޮސް ހުރިކަބް ފާހަގަކުރައްވާފައެވެ. އެކަމަށް މިދިޔަ އަހަރުގެ ބަޖެޓުގައި ފައިސާ ކަނޑައަޅާފައި ނެތުމުން އެ މަސައްކަތްތައް ނުކުރެވުނު ނަމަވެސް، މިއަހަރު އެ މަޝްރޫއުތައް ކުރިއަށް ގެންދިއުމަށް މިއަހަރުގެ ބަޖެޓުގައި ފައިސާ ކަނޑައަޅާފައިވާ ކަމަށް ރައީސް ވިދާޅުވިއެވެ.
އެގޮތުން މާރަންދޫގައި ސޮއިކޮށްފައިވާ ބަނދަރުގެ މަޝްރޫއު ކުރިއަށް ގެންގޮސް ބަނަދަރުގެ މައްސަލަ ހައްލުކޯށް ދެއްވާނެ ކަމުގެ ޔަގީން ކަން ރައީސް ދެއްވެވިއެވެ. ހަމައެއާއެކު ސްކޫލަށް ދިމާވެފައިވާ ޖާގައިގެ ދަތިކަމަށް ވެސް ހައްލު ގެނެސްދެއްވާނެ ކަމަށާއި މާރަންދޫ ސްކޫލްގައި ކްލާސް ރޫމް އިމާރާތް ކުރަން ހަވާލުކޮށްފައި ވަނީ އެއްފަހަރާ އެތައް މަޝްރޫއުތަކެއް ހަވާލުކޮށްފައިވާ ކުންފުންޏަކާ ކަމަށް ރައީސް ވިދާޅުވިއެވެ. އެކަން ކުރިއަށް ނުގޮސް އޮތް ނަމަވެސް، މިހާރު އެމަޝްރޫއުތައް ކުރިއަށް ގެންދެވޭނެ ގޮތް ހޯދާފައިވާ ކަމަށާއި ކުރިއަށް ނުގެންގޮސްފި ނަމަ އެ މަޝްރޫއުގެ އެއްބަސްވުން ބާތިލް ކުރައްވާނެ ކަމަށް ރައީސް ވިދާޅުވިއެވެ. އަދި ސަރުކާރުގެ ތެރެއިން އެހެން ގޮތްތަކެއް ހޯދައި އެހެން ބަޔަކާ ހަވާލުކޮށްގެން އެ މަޝްރޫއު ކުރިއަށް ގެންދަވާނެ ކަމަށް ރައީސް މުއިއްޒު ވިދާޅުވިއެވެ.
މާރަންދޫގައި ކުޅިވަރުގެ ވަސީލަތްތައް ވެސް ތަރައްގީކޮށް ދެއްވާނެ ކަމަށާއި، އާ ފުޓްބޯޅަ ދަނޑެއް ތަރައްގީކޮށް ދެއްވާނެ ކަމަށް ރައީސް ވަނީ ވިދާޅުވެފައެވެ. އަދި މާރަންދޫ ސިއްހީ މަރުކަޒުން މިހާރު 16 ގަޑިއިރު ހިދުމަތް ދިން ނަމަވެސް މުވައްޒަފުންގެ ދަތިކަން އޮތުމުން އެކަމަށް ހައްލު ގެނެސް، ލެބޯރެޓަރީގެ ހިދުމަތް މިއަހަރު ފައްޓަވާނެ ކަމަށް ވެސް ރައީސް ވިދާޅުވިއެވެ. އެހެންކަމުން ކުރިއަށް އޮތް ދުވަސްތަކުގައި ފެންނާނީ މައްސަލަތައް ހައްލުކޮށް އަމަލީގޮތުން ކުރިއަށްދާނެ ދުވަސްތަކެއް ކަމުގެ އުފާވެރި ހަބަރު ކަމަށް ރައީސް ވިދާޅުވިއެވެ.
ބޭނުންފުޅުވަނީ މަޝްރޫއުތައް އަވަހަށް ކުރިއަށް ގެންގޮސް ނަތީޖާ ނެރެން ކަމަށާއި ވަޒީރުންނާއެކު ރަށްރަށަށް ވަޑައިގަންނަވަނީ ސީރިއަސް މަސައްކަތްތަކެއް ކުރެއްވުމަށް ކަމަށް ވެސް ރައީސް ވިދާޅުވިއެވެ. މާލޭގައި އަރާމުގައި ތިބުމުގެ ބަދަލުގައި ކަމާ ގުޅުން ހުރި ވަޒީރުން އެމަނިކުފާނާއެކު ވަޑައިގެން ކައުންސިލާ ޒިންމާދާރު ފަރާތްތަކާއެކު މަޝްވަރާކޮށް، ވީހާވެސް އަވަހަށް ކުރިއަށްދެވޭނެ ގޮތްތަކެއް ހޯދުމަށް މަސައްކަތް ކުރައްވާ ކަމަށް ރައީސް ވިދާޅުވިއެވެ. ސީރިއަސް ވަގުތުތަކެއް ހޭދަކުރަނީ މައްސަލަތަކަށް ހައްލު ގެނައުމަށް ކަމަށާއި، މާރަންދޫގެ ތަރައްގީއަށް މަސައްކަތްކޮށް، ދެ އަހަރު ދުވަހުގެ ތެރޭގައި މަޝްރޫއުތައް ނިންމުމަށް މަސައްކަތް ކުރައްވާނެ ކަމަށް ރައީސް ވިދާޅުވިއެވެ. އަދި ކުރިއަށް އޮތީ ތަރައްގީގެ ދުވެލީގައި ބައިވަރު މަޝްރޫއުތަކެއް ކުރިއަށްދާނެ ދުވަސްތަކެއް ކަމަށް އެމަނިކުފާނު ވިދާޅުވިއެވެ.
