ރާއްޖެ އާއި އިންޑިއާގެ ދެމެދު އޮތް ޒަމާންވީ ގާތް ގުޅުން އިތުރަށް ފުޅާކޮށް ވަރުގަދަ ކުރަން ތައްޔާރަށް ހުންނެވިކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
ރާއްޖެ އާއި އިންޑިއާ އާ ދެމެދު ޒަމާނުއްސުރެ އުފެދިފައި އޮތް ގާތް ރަހުމަތްތެރި ގުޅުން ބިނާވެފައި އޮތީ، އެއް ގައުމުން އަނެއް ގައުމަށް ކުރާ އިހްތިރާމާއި ގަދަރާއި އިތުބާރުގެ މައްޗަށް ކަމަށް ރައީސް ޑރ.މުހައްމަދު މުއިއްޒު ވަނީ ވިދާޅުވެފައެވެ. އިންޑިއާގެ ގައުމީ ދުވަހުގެ ތުހުނިޔާ ވިދާޅުވެ ރައީސް ވަނީ ދެ ގައުމާއި ރައްޔިތުންގެ ލާބަ އާއި މަންފާއަށްޓަކައި، މި ގުޅުން މި ސަރުކާރުގައި ވެސް އިތުރަށް ފުޅާކުރައްވާނެކަމުގެ ޔަގީންކަން ދެއްވާފައެވެ. މި ދެ ގައުމުގެ ވަރުގަދަ ކުރުމުގައި ދެމިތިބޭނެ ކަމުގެ ޔަގީންކަންވެސް ރައީސް ވަނީ އިންޑިއާ ސަރުކާރަށް އަރުވައިފައެވެ.
ރައީސްގެ ތަހުނިޔާގެ މެސެޖަށް ޖަވާބު ދެއްވަމުން މޯދީ ވިދާޅުވީ ދެ ގައުމުގެ ޒަމާންވީ ގާތް ގުޅުން އިތުރަށް ފުޅާކޮށް ވަރުގަދަ ކުރަން، ރައީސް ޑރ. މުހައްމަދު މުއިއްޒުއާއި އެއް ވިސްނުމެއްގައި ހުންނެވިކަމަށެވެ. އަދި މި އެކުވެރިކަމާއި އެއްބާރުލުމުގެ ގުޅުންތައް އިތުރަށް ފުޅާކުރުމުގެ ޔަގީންކަން މޯދީވަނީ ދެއްވާފައެވެ.
ސަރުކާރު ވެރިކަމަށް އައި ފުރަތަމަ ދުވަސްކޮޅު ދެ ގައުމުގެ ގުޅުން ވަރަށް ބޮޑަށް ހީނަރުވެފައިވީ ނަމަވެސް މި ސަރުކާރުން ގެންދަނީ އިންޑިއާ އާއި އެކުވެސް ރަނގަޅު ގުޅުމެއް ގާއިމުކުރުމަށް މަސައްކަތް ކުރަމުންނެވެ.
