މި އަހަރުގެ ތެރޭގައި ރާއްޖޭގެ ކޮންމެ އަތޮޅެއްގައި ޕަބްލިކް ވޯކްސް ޔުނިޓެއް ގާއިމުކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ކޮންމެ އަތޮޅެއްގައި ވެސް މަދުވެގެން، ޕަބްލިކް ވޯކްސް ހިދުމަތް ދޭނެ އެއް ޔުނިޓް ގާއިމުކުރައްވާނެ ކަމުގެ ޔަގީންކަން ރައީސް ދެއްވާފައި ވަނީ ރ. މާކުރަތަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.
އެގޮތުން ރ. އަތޮޅުގައި ޕަބްލިކް ވޯކްސް ހިދުމަތް ދޭ މަރުކަޒު ގާއިމުވެގެން ދާނީ މާކުރަތުގައިކަން ރައީސް ވަނީ އިއުލާނުކުރައްވާފައެވެ.
ޕަބްލިކް ވޯކްސް ހިދުމަތަކީ އިންތިހާއަށް މުހިންމު ކަމެއްކަން ފާހަގަކުރައްވާ ރައީސް ވިދާޅުވީ މިއީ އެއްވެސް ހާލެއްގައި ބޭކާރުވެގެންދާ ހަރަދެއް ނޫން ކަމަށެވެ. އަދި ދުރު ރާސްތާއަށް ބަލާއިރު، އުމްރާނީ ގޮތުން ރަށްރަށަށް ގެނެވޭ ތަރައްގީ ބެލެހެއްޓުމަށް ޕަބްލިކް ވޯކްސް ޔުނިޓެއް ހުރުމަކީ އެތައް ހަރަދެއް ސަލާމަތް ކުރެވޭނެ ކަމެއް ކަމަށެވެ.
ރާއްޖޭގެ ކޮންމެ އަތޮޅެއްގައި ޕަބްލިކް ވޯކްސް ހިދުމަތް ދިނުމަށްޓަކައި އެންމެ މަދުވެގެން، އެއް ޔުނިޓް ގާއިމުކުުރުމުގެ އިތުރުން، ރާއްޖޭގެ އުތުރު އަދި ދެކުނުގެ ސަރަހައްދު ހިމެނޭ ގޮތަށް، ހުރިހާ ވަސީލަތަކާއެކު އެއްތަނުން އަނެއް ތަނަށް އުފުލައި، ބަދަލު ކުރެވޭ މޯބައިލް ޕަބްލިކް ވޯކްސް ޔުނިޓްގެ 2 ޔުނިޓް އުފައްދަވާނެ ކަން ވެސް ރައީސް ވަނީ އިއުލާންކުރައްވާފައެވެ. މި މަސައްކަތްތަކަކީ މި ހިނގާ 2025 ވަނަ އަހަރުގެ ބަޖެޓުން ހަރަދު ކުރައްވައިގެން ކުރިއަށް ގެންދަވާނެ މަސައްކަތްތަކެއް ކަމުގައިވެސް ރައީސް ވިދާޅުވިއެވެ.
މާޅޮސްމަޑުލު އުތުރުބުރިއަށް ރައީސް ކުރައްވަމުން ގެންދަވާ ދަތުރުފުޅު، މިރޭ ނިންމަވާލައްވާއިރު، އެ އަތޮޅުގެ 11 ރަށަކަށް އެމަނިކުފާނު މި ޒިޔާރަތުގައި ވަޑައިގެންނެވިއެވެ.
