އެމްޑަބްލިޔުއެސްސީއިން ރ.ފައިނު ގައި ކުރިއަށް ގެންދިޔަ ފެނާއި ނަރުދަމާ ނިޒާމް ގާއިމްކުރުމުގެ މަސައްކަތްތައް ނިންމައި އިފްތިތާހްކޮށްފިއެވެ.
ފައިނުގެ ފެނާއި ނަރުދަމާ ނިޒާމް އިފްތިތާހް ކޮށްދެއްވާފައި ވަނީ އެ ރަށުގައި މިއަދު ބޭއްވި ރަސްމިއްޔާތެއްގައި ރައީސް ޑރ. މުހައްމަދު މުއިއްޒުއެވެ.
އެމްޑަބްލިޔުއެސްސީއިން ބުނީ މި މަޝްރޫއުގެ ދަށުން ފައިނުގައި ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިން ގާއިމްކޮށް، ދުވާލަކު 20 ޓަނުގެ ފެން އުފެއްދޭ 2 އާރުއޯ ޕްލާންޓް ބަހައްޓާފައިވާ ކަމަށެވެ. އަދި ފެނާއި ނަރުދަމާ ހޮޅީގެ މައި ނެޓްވޯކް އަޅައި، 130 ގެޔަށް ފެނާއި ނަރުދަމާ ކަނެކްޝަން ގުޅައިދީފައިވާކަން ވެސް އެމްޑަބްލިޔުއެސްސީއިން ވަނީ ފާހަގަކޮށްފައެވެ.
މީގެއިތުރުން 490 ޓަނުގެ އެއް ފެން ތާންގީ އަދި 175 ޓަނުގެ ފެން ރައްކާކުރެވޭ 2 ފެން ތާންގީ ބަހައްޓާފައިވާ ކަމަށް ވެސް އެމްޑަބްލިޔުއެސްސީއިން ވަނީ ބުނެފައެވެ. އަދި ނަރުދަމާގެ އިދާރީ ބިލްޑިންނާއި 3 ޕަންޕް ސްޓޭޝަން ގާއިމްކޮށް، ސީ އައުޓްފޯލް އާއި ރިޖެކްޓް ލައިން ވެސް އެމްޑަބްލިޔުއެސްސީއިން ވަނީ އަޅާފައެވެ.
އެމްޑަބްލިޔުއެސްސީއިން ފާހަގަކޮށްފައިވާ ގޮތުގައި ފެން ތަހުލީލު ކުރުމަށް ބޭނުންވާ ސާމާނާއި ނަރުދަމާ ނިޒާމް ހިންގައި ބެލެހެއްޓުމަށް ބޭނުންވާ ވެހިކަލް ފޯރުކޮށްދިނުން މި މަޝްރޫއުގެ ތެރޭގައި ހިމެނެއެވެ.
ފައިނުގެ ފެނާއި ނަރުދަމާ ނިޒާމް ގާއިމްކުރުމުގެ މަޝްރޫއުގެ އަމަލީ މަސައްކަތް ފަށާފައިވަނީ މާޗު 1، 2021 ގައެވެ. އަދި މި މަސައްކަތް ނިންމައި ކޮމިޝަން ކުރެވިފައިވަނީ މާޗު 2، 2024 ގައެވެ. މި މަޝްރޫއަކީ ހައުސިން މިނިސްޓްރީގެ ފަރާތުން އެމްޑަބްލިޔުއެސްސީއާ ހަވާލުކޮށްގެން ކުރިޔަށްގެންދިޔަ މަޝްރޫއެކެވެ.
