ރަށްރަށުގެ ތަރައްގީ އަށް ސަރުކާރުން ކޮށްދޭން ހުރި ކަންކަން ބާރު ދުވެލީގައި ކޮށްދެއްވާނެ ކަމުގެ ޔަގީންކަން ދެއްވައި، މި އަހަރު ތަރައްގީގެ ހަގީގީ ކުލަ ޖައްސުވަދިދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރ. އަތޮޅަށް ފެއްޓެވި ދަތުރުފުޅުގައި އެ އަތޮޅުގެ ރަސްގެތީމަށާއި އަނގޮޅިތީމަށް ވަޑައިގަންނަވައި ދެއްކެވި ވާހަކަފުޅުގައި ރައީސް ވިދާޅުވީ، މިދިޔަ އަހަރު ތަރައްގީގެ މަޝްރޫއުތައް ނުހިންގުނީ ގައުމަށް ދިމާވި އިގްތިސޯދީ ދަތިކަމާއި މިދިޔަ އަހަރުގެ ބަޖެޓުގެ ތާށިކަމުގެ ސަބަބުން ކަމަށާއި، އެހެންވެ މަޝްރޫއުތައް ހިންގޭގޮތް ނުވި ކަމަށެވެ.
"އޭރުގަ އޮތީ ވަރަށް ވެސް ބޮޑު ދަރަންޏަކުން އަޅުގަނޑުމެން އަރައިގަންނަން ޖެހޭ ހާލަތުގަ، ގައުމުގެ ބޭރުގެ ދަރަނިތައް ދައްކަން ގައުމު ނުކުޅެދޭ ހާލަތަކަށް ގޮސް ޑިފޯލްޓްވެ ބަނގުރޫޓުވާ ހާލަތަށް އިގްތިސޯދު ގޮސްފަ އޮތުމުގެ ސަބަބުން އަޅުގަނޑުމެންނަށް ޖެހުނީ ވަރަށް ބޮޑު އިސްކަމެއް ދީގެން ގައުމުގެ އިގްތިސޯދު ހަމަމަގަށް އަޅުވަން،" ރައީސް ވިދާޅުވިއެވެ.
ނަމަވެސް އާ މަޝްރޫއުތައް ފަށައި މެދުކެނޑިފައިވާ މަޝްރޫއުތައް ކުރިޔަށް ގެންގޮސް ނިންމާލުމަށް މަގުފަހިވެފައިވާ ކަމަށް އެމަނިކުފާނު ވިދާޅުވިއެވެ.
ހަމަ އެހެންމެ، ކުރިއަށް ހުރި ދުވަސްތަކުގައި ސަރުކާރުގެ ވުޒާރާތަކާއި ކުންފުނިތަކާއި ރަށްރަށާއި ސިޓީތަކުގެ ކައުންސިލްތައް ގުޅިގެން ކަންކަން ތަރުތީބުވެ، ގިނަ މައްސަލަތައް ހައްލުކުރެވި ރަށްރަށަށް ކުރިއެރުން ލިބިގެން ދާނެ ކަމުގެ ޔަގީންކަން ރައީސް ދެއްވިއެވެ.
ރަސްގެތީމަށާއި އަނގޮޅިތީމަށް ރައީސް ކޮށްދެއްވާނެ ކަމަށް ވިދާޅުވި ބައެއް ކަންކަން:
- ދެ ރަށުގެ ފެނާއި ނަރުދަމާ ހައްލުކޮށް އޭގެ ފަހުން ދެ ރަށުގެ މައި މަގުތައް ތަރައްގީކުރުން
- ދެ ރަށުގެ ބަނދަރު ތަރައްގީކުރުން
- ދެ ރަށުގެ ސްކޫލްގެ ކްލާސްރޫމްތަކާއި މަލްޓި-ޕާޕަސް ހޯލުގެ މަސައްކަތްތައް ނިންމުން
- އަނގޮޅިތީމުގެ ސްކޫލްގައި ކޮމްޕިއުޓަރު ލެބަކާއި ސްޓާފް ރޫމެއް އިމާރާތްކުރުން
- އަނގޮޅިތީމުގައި އަންހެނުން ބޭނުންވާ ގޮތަށް ހޭންޑްބޯލް ކުޅޭނެ ކޯޓެއް އެޅުން
